jawapos.com/radarmadura |
Carpan Ma Leo*
RASSANA panas onggu sonarra are.
Kole’ rassana eobbar,
epanggang. Adaddiyagi posang nyare ong-naong se macellep dha’ badan se kantha eobbar. Tape bila enga’ dha’ kaodhi’an ana’ ban bine se badha e roma, elang rassana panassa are se ngobbar kole’. Sabab ana’ bine
e roma jellas ngabutowagi
dha’ napaka kaangguy ibada ban
kaodhi’an e dunnya. Saengga
neyat se nyorot
epatanyeng pole.
Kateppa’an sateya
nandha’agi pokol
settong seyang. Aba’ la
manjeng e penggir
tase’ ban parao se aguli ka bara’ ka temor. Pakakas la padha atompo’ e dhalem
parao tor kakanan la ragap kaangguy bandha neng
tengnga tase’.
Aba’
mangkat bakto seyang sabab ta’ mangga
dha’ serrona ana’ bine se ta’ andhi’ kacokopan dhalem asakola ban ngakan e
roma. Biyasana neng
bakto sobbu aropa’agi bakto se teppa’ mangkat alajar. Tape ta’ arapa
pangrasana dhalem pekker, Pangeran noronnagi dha’
rajekke neng bakto se ta’ eka-sangka. Contona, neng bakto seyang padhana sateya.
Kabadhaan tase’ abasanna tenggi omba’na. Apapole ojan ta’
bu-ambu. Parao se lanjang dhubellas meter ban
lebar dhumeter rassana
ongga toron ngadhebbi omba’. Kadiya se egulunga omba’. Rassa kobater ban
tako’ ngandha’ dhalem
pekker. Enga’
kadaddiyan dhubulan se
tapongkor.
Settong
parao dhari lowar polo nyellem
egulung omba’, karem, abeli’ sampe’ ancor sakabbina. Tim dhari
Polres Songennep otaba dhari Kapolisian Daerah (Polda) Jaba Temor toron dibi’ dha’
lokasi kadaddiyan. Sapolo oreng se badha e dhalem parao mate kakabbi, ta’ bisa
etolong. Tape
bila enga’ dha’ kabadha’an ana’ bine e
roma rassana elang
sakabbina tako’
se anong-gunong.
Jaring
se arombai duli eontallagi dhalem
tase’. Teppa’ neng tengnga tase’. Bannya’ ngabala,
juko’ biyasa atompo’
neng tengnga’an, neng aeng
se dhalem. Sampe’ satengnga ejjem tadha’ tandha-tandha badha juko’ se
maso’ ka dhalem jaringnga. Kalaban
sabbar Matra’e adhante’. Sambi
ngabas kabadha’an ka bara’ ka
temor. Sambi nembang:
Ngapote
wa’ lajarra
etangale
Reng
majang tantona la padha
mole
O... Mon ajelling odhi’na
oreng majangan
Abantal
omba’ sapo’ angen salanjangnga
Dek…! Berra’
rassana jaring se badha dhalem tase’. Duli onggu etaja’ talena bi’ Matra’e. Settong, dhuwa’, tello’.
Alhamdulillah bannya’ onggu rassana juko’ se maso’ dhalem jaringnga. Kadiya juko’
karapo, pendhang, ban kendhuy la nompo’ e dhalem. Ta’
bannya’ mekker pole, Matra’e laju ngodhi’i messinna kaangguy duli
mole ka romana. Abareng ban tera’na are se burung torona aeng ojan.
Sumini
ban ana’ tong-settongnga se anyama Jamila ta’ bisa notope kasennengnganna. Pekker
kobater se adhante’ kadhatengnganna elang daddi kasennengngan se talebat. Juko’ se etengteng Matra’e ekala’ ban binena.
Epalebbu ka dhapor kaangguy emassa’. Kobi panas laju ebagi ka lakena. Ma’ le cellep bandanna bisa ondur
laonan.
”Duli massa’ juko’na, Le’? Bula lapar onggu
sateya.”
”Enggi, Ka’, dhante’
sakejja’ aggi.”
Matra’e
ban kalowargana odhi’ coma bisa
ngarep pangaselan dhari
majang e tase’. Kancana se
laen bannya’ se mele arantau
dha’ tana
Malaju otaba Bali ban
Arab Saudi. Saenggana bannya’ oreng bine’ se badha, adaddiyagi Polo Tondhu’ e jajuluk Polo Puttre. Asabab
bannya’na oreng bine’ se odhi’ neng polo se emaksod.
Conto
se paleng nyata bisa ekaolle bakto entar dha’ kabinan. Jumlana lalake’ coma
atosan, tape jumlana babine’ sampe’ ebuwan lebbi. Metorot
dhata, jumlana penduduk Desa Tondhu’, Kecamatan Ra’as sampe’
4.921 oreng kalaban 1.293 KK. Lebar tor lanjangnga Polo Tondhu’ 2.492483
kilometer masagi.
Babini’ Polo Tondhu’, tamaso’
Sumini biyasa agabay gellang dhari tale
bennang ban kerrang. Ekerem ka dhagang se
badha e Bali tor sabagiyan se laen
ekerem dha’ nagara Asia sampe’ Eropa. Maskena ongkos
agabay coma Rp 1.500
sampe’ Rp 2.500 sakodhi, tape
alhamdulillah ejalane onggu.
Katembang ta’ andhi’ kalakowan
laen.
”Ka’, Jamila sake’
sara sateya. Ca’na dokter esoro
duli giba ka dokter se
badha e darat. Sabab kabadha’an obat ban pakakas se
laen lebbi bannya’ ban
ta’ kakorangan akadiya e polo,” ca’na Sumini mamellas.
Lakena
coma bisa ngosap dhadha arassa
kobater nyareyagi pesse
kaangguy nyokope kabutowan. Bila mekker
dha’ pangaselan dhari majang rassana jau dhari cokop. Coma sakadar kaangguy
kabutowan sabban are, kabadha’an se kadhang ta’ maste asella. Tape bila ngabassagi dha’ kabadhaan ana’ bine’ tong-settongnga, rassa neser
anong-gunong,
pangaterrona daddi dokter lakar ce’ tenggina. Pangarep e modhi are bisa
ato-banto kabadha’an se seggut
kakorangan dokter e Polo Tondhu’,
tana kalahiranna.
Ngarep
dha’ bellassa pamarenta
kabupaten ta’ tao etorote. Oca’na emo’ terros ngurus
kabadha’an tor kaodhi’an masyarakat
se badha e darat. Pekkeranna ta’ tao nojju dha’
kabadha’an e polo-polo. Ta’ ngarte dha’
maksodda.
Coba’
talektegi kalaban akkal sehat. Polo-polo se maso’ bagiyan dhari Songennep, apa karana tako’
tasellem e tengnga tase’? Otaba kabadha’an kasogiyan e
polo coma sakadar ejuwal ka oreng lowar nagara. Saenggana kasennengngan bisa ekadibi’i.
Adhuh…! Ta’ ngarte
rassana oreng kene’ macemma sengko’ dha’ tang pamimpin. Coma bisa
ngarep lebbi, maskena ta’
bisa earep.
Katembang
ros-terosan mekkere kabadha’an oreng ta’ genna, lebbi bagus
mekker se badha e adha’an. Ana’
settong se badha ngabutowagi pesse. Jalan se bisa elakone coma dhari majang.
Nyare juko’ e tase’ se tor kadhang kodu
nyaba daddi tarowanna. Berra’ onggu
rassana bila epekker terros.
”Ka’, dha’
ka’emma Jamila
reya, mon gun coma neng-enneng rassa ta’
olle pesse. Tore
pekkere dha’ramma carana ma’ le kalowar
dhari masalana reya.
Bula posing, Ka’, nyareya edhimma pesse
kaangguy Jamila rowa?” oca’na Sumini
rassa agubeng dhalem pekkeranna Matra’e, bingung,
tako’ dhalem ngadhebbi kabadha’an.
”Insya Allah sengko’
laggu’ mangkata pole majang ka tase’. Pasabbar ngadhebbi kabadha’an. Ta’ sakejja’ bula se badha e tase’ paleng sampe’ dhuare ka tello
are. Sabab mon gun coma sakejja’ pastena ollena sakone’. Du’ana bai, moga-moga
bula olle asel se bannya’. Saengga bisa ngiba Jamila entar ka masake’ e darat.”
”Enggi, Ka’, bula
paste adu’aagi sampeyan,” oca’na kalaban nondhu’.
Kalagguwanna Matra’e
matolos se majang. Sakabbinna kabutowan saabidda e tase’ egiba kabbi.
Sangona se kaangguy dhuare dhumalem malebbi.
Berras, buja, biksin, ban se laen,
ta’ loppa se egiba.
Neyatta ce’ tenggina.
Maske kabadha’an alam sagara
rassana ta’ akanca. Ondhem calemodan, adaddiyagi petteng pangabasan. Ta’ epekker pole
bi’ Matra’e. Sabab ana’na Jamila makowat dha’ pekkerna.
Ta’
eka-sangka, Matra’e la
para’ dhapa’a dha’ tengnga tase’. Ta’ bannya’
mekker pole epatoron jaringnga dha’ aeng kalaban on-laon. Samarena toron, Matra’e toju’ dhalem paraona sambi ko’-roko’an. Tembang Madura’an ta’ bu-ambu
ekoca’agi adaddiyagi
pangaterrona sajan raja bila
nembang Madura’an se emaksod.
Petteng
calemodan, mowana
langnge’ ta’ aoba
tera’. Tape
temmo dhateng ojan se talebat raja. Plastik etokop ka dhalem badanna ma’ le cellep bisa
elang ban ta’ aganggu kalakowanna.
Paggun
bai ojana sajan derres. Ta’ bu-ambu.
Rassa kobater ban tako’ molae aganggu pekkeranna. Etambai
monyena kelap se
nappor bara’ temor. Angen tase’ aguleng
abareng ban gulina aeng se
tenggi ondhur dhateng.
Ta’
bu-ambu. Sakone’-sakone’ aeng tase’ maso’ ka dhalem paraona Matra’e. Make ekoras
paggun sajan bannya’ aeng se
maso’. Gulina parao daddi ta’ embang, ngoleng ka
bara’ ka temor, ka dhaja ka lao’.
Bakto
kelap amonye ranyeng, temmo
nappor dha’ paraona Matra’e. Sateya paraona aguling. Ancor ta’ kabitong. Rassana langnge’ se petteng calemodan daddi sakse sabab pangarep ta’ ajalan ban
kanyata’an. (*)
Sepetthak dhari: Abantal Omba’ Asapo’ Angen
Tidak ada komentar:
Posting Komentar