jawapos.com/radarmadura |
Carpan: Musyfiq Rozy*
E BABANA mataare se
panas, e antarana owa’na knalpot, na’-kana’ kene’ ajalan
noro’e lorong. Lampu mera se etojju.
Tanangnga se kangan
neggu’ gitar kene’ ban se
kacer neggu’ gellas karet.
Kalambina
ban lebbarra
la padha
ambung. E bagiyan
lengngenna
beddha. Sandhal jan-lajjan.
Se kangan eobai
salempangnga. Pellona ngerray
sabadan. Matana
mera, nandha’agi ja’ na’-kana’ ganeka
ampon lesso ban paya.
Kadhang tanangnga
ngosot pello e dhaina. Sowarana
kala ranyeng ka monyena
motor ban samacemma se padha
ambu e lampu mera. Tadha’ oreng sakale se aberri’ pesse
sakadar ngargai ka
usahana.
Kadhang banya’ oreng
se nganggep ja’ oreng se ngamen aganggu
jalan, macet. Kalakowan ngamen
lebbi molja katembang
ngeco’ sape dhin
tatangga. Nyare baberri’en
oreng. Kadhang badha oreng
se nyorowagi
ajuwal korran
neng e lampu mera. Ajuwal dhari
motor ka motor.
Nyamana Subhan. Tape
ban oreng-oreng eolok Encing
polana badanna
koros ban kene’.
Sabban arena, Encing
ngamen neng e lorong-lorong. Kabadha’an
odhi’ wa’-dhuwa’an
ban oreng towa bine’na
se la ta’ bisa alako pole.
Kalaban paksa, Encing
kodu alako maskeya aba’na gi’ ta’ cokop
omor kaangguy alako. Na’-kana’ saomoranna
la padha asakola. Kadhang,
bila tatemmo e jalan
ban sakanca’na, Encing
eco-koco polana ta’ asakola. ”Hahaha…Encing
ta’ asakola.” Mare
co-ngoco, sakancana buru, tako’ Encing
alaban.
Encing
ta’ perna ngoso’ polana
eco-koco sakanca’na. Maskeya Encing
ta’ asakola, Encing
ta’ budhu.
Sabban malemma, emma’na
lako ngajari Encing kaangguy
ajar noles ban
maca. Samarena adan Magrib sampe’ adan Isya’
emma’na se
ta’ bisa ajalan
ngajeri Encing. Maske gun eajari
noles ban maca. Encing
ta’ bisa bitongan. Gun bisana angka dhari
nol sampe’ sapolo, lebbina tadha’.
E sabban
arena, maskeya ojan, Encing paggun
mangkat ngamen e rong-lorong. Dhari
bengko ka bengko. Dhari barung
ka barung.
Mon teppa’ ka
oreng se tao ka kaodhi’anna
Encing, paggun ta’ tega
ngabasagi sabban
arena. Se ekakana aba’na
mlarat, gi’ etamba
emma’ se ta’ bisa
alalakon. Mare sobbu, Encing se biyasana
nyare kaju kaangguy atana, are mangken ta’ mangkat.
Polana ampon maso’ bulan Pasa.
Tape, Encing ngalle kalakowan.
Daddhi tokang sassa kalambina tatanggana.
Mare nyassa, Encing mangkat ngamen.
Molae maso’ bulan Pasa.
Ollena Encing ngamen lebbi bannya’. Encing
nyempen sabban
arena polana terro mellayagina emma’na
se terro ka ruku. Aba’na ta’ perna
terro melleya kalambi anyar maskeya sakanca’na padha
andhi’ kalambi
anyar.
Kadhang,
badha kancana
se aberri’ kalambi maskeya kalambina ambung. Atena bunga polana aba’na
bakal ngangguy kalambi anyar. Encing
tak’ perna enga’ ka eppa’na
maskeya kalakowan nyare pesse kaangguy nyambung odhi’
aba’na ban emma’na
banne tanggunganna.
Perna e settong bakto,
e bakto
emma’na
gi’ sehat, Encing ban emma’na
entar ka pasar nangale na’-kana’ kene’
nanges e sedi’na
eppa’na. Atena
langsung agadhek, ”Eppa’
dha’emma, Ma’?”
Ema’na
ta’ ajawab.
Eabasagi ana’na se
ajalan
reng-erengan. Tanangnga sajan
sekken neggu’ tanangnga emma’na. ”Eppa’na
ba’na, Cong, entar
alako ka Malaysia.”
”E dhimma
Malaysia, Ma’?”
”E dhissa’,
jau,” tanangnga
emma’na nodduwagi dha’ bara’
dhaja.
Eppa’na Encing
entar alako ka Malaysia e bakto
Encing gi’ badha
e dhalem
kandhungan. Samolae mangkat sampe Encing la
nganthang raja, eppa’na
ta’ perna nelpon
otaba aberri’ kabar,
apapole mole. Emma’na
banne laju
pas pasra ka Pangeran. Emma’na
anya-tanya ka tatanggana se ngeba
lakena mangkat ka Malaysia.
Jawabanna
ta’ etemmo. Ale’-pale’. Gun
se jellas nyoro ka emma’na
Encing alake pole. Emma’na
banne oreng
ban-saromban.
Maskeya ta’ tao agama, emma’na
tao ja’ oreng bine’
ta’ olle akabin ban oreng
lake’ laen saabidda lakena gi’ badha. Emma’na
yakin ja’ lakena
badha ban
baras. Tape
dhalem kabadha’an
emo’, saengga ta’ sempat
aberri’ kabar.
E settong bakto,
emma’na se
gi’ buru dhateng
dhri pasar, dhapa’ gan
taneyan, emma’na
langsung robbu. Gan bakto jareya emma’na
Encing ta’ jaga.
Ataonan emma’na ta’ jaga.
Maskeya ta’ jaga, atena paggun
yakin ja’ e
settong are lakena bakal dhateng.
***
E terminal, Encing
tatemmo ban oreng lake’ agindhung
tas, akaos celleng, acalana pote. Badanna
soga’, asongot, kole’na bak celleng.
Aberri pesse ka Encing ekettan. Encing tacengnga’ polana
gi’ buru sateya badha oreng
aberri’ pesse ce’ bannya’na.
”Kalangkong,
Pa’,” oca’na
Encing mesem. Oreng lake’ gi’ buru
gun mesem. Tanangnga
sot-ngosot bauna Encing.
Mare jareya, oreng lake’ gella’
langsung nyengga.
Encing
langsung mole. Pesse se esempen sabban
arena molae malem tampa’an ekala’ ban
epapolong ban se eberri’
oreng lake’ gella’. Atena bak kasta
polana ta’ atanya pasera asmana ban
dhari ka’dhimma. Tape,
ta’ daddi masalana, polana Encing
bakal melleyagiya emma’na
ruku.
Emma’na
ce’ terrona ka ruku. Kadhang, dhari
terrona ka ruku, sampe’ ekamempe
ban emma’na
ja’ eberri’ ruku ban
oreng lake’.
Mata are nganthang ngabara’.
Encing paggun jeng-manjeng
e adha’na
toko. Ngabasagi ruku se epajang.
Ta’ abit, Encing
atanya argana ban
langsung majar pesse ka se ajaga.
Atena bunga polana pesse se esempen molae
pasa’an kaangguy melleyagi
emma’na
ruku ampon tekka. Kalaban ate senneng,
Encing mole on-laon. Salanjangnga
lorong, ruku se eteggu’ lako eabas.
Encing
tamaso’ oreng se ta’at
dha’ oreng towa. Maskeya emma’na
ta’ bisa ajalan, sabban
arena Encing se arabat.
Molae dhari atana’, aberseyan roma, ban
nyare pesse se ekakana sabban arena.
Emma’na
ta’ bu-ambu adu’aagi Encing
ma’ le salamet dhari
satpol PP se biyasana
nangkep oreng-oreng se ngamen. Kadhang,
atena nanges e bakto
seyang are Encing
ta’ dhateng. Atena kobater
Encing etangkep satpol PP. Kadhang,
atena seddhi e bakto Encing
dhateng ta’ olle
pesse sakale. Ngabasagi ana’na
apello sabadan.
Dhapa’
ka romana, Encing langsung ngala’ temba
kaangguy nyello’ aeng e somor. Emma’na molae gu-laggu ta’ mandhi
sakale. Ampon biyasa, Encing
nyello’ aeng tello’ sampe’ empa’ kale temba sabban
arena. Salaen kaangguy emma’na, Encing nyello’
aeng kaangguy kabutowan se laen. Padha ra-kora
ban nyassa.
Econgngo’ ema’na
dhari bang-labang.
”Asaren paleng,” karettek
atena Encing. Encing
ju’-toju’ e lencak e adha’na
romana. Sambi nyandhar ka tabing romana, Encing
maelang lesso.
E langgar
se ta’ jau dhari
romana la temmo adan. Encing jaga
polana la maso’ asar. Eabasagi pole emma’na. Paggun
enga’ gella’. Mereng
bara’. Encing
ajaga’an emma’na
kalaban alos. Tape emma’na
paggun ta’ ngedhing. E bakto
tanangnga Encing
agaga lengngenna emma’na
ekarassa kacep. Encing gi’ buru
apangrasa ja’ emma’na
la tadha’, Ja’
emma’na la
seda.
Aeng matana
langsung gaggar. Encing
langsung agellu’ emma’na.
Molae sateya Encing bakal
odhi’ kadibi’.
Tadha’ oreng se bakal
malae Encing ngaji otaba
malae noles. Ruku anyar kaangguy emma’na
bakal daddi labun.
Encing
paggun agellu’ emma’na
maskeya settong, dhuwa’,
tello’ oreng la nganthang dhateng
ka romana. ”Naserra, Encing,
sala odhi’ mlarat sateya la tadha’
emma’na,” rasanna
oreng se manjeng e seddi’ Encing. ”Iya,
eppa’na tadha’ kabarra
sakale.” Settongna arasan keya.
Dhari
lowar dhateng
oreng lake’ ban ngolok salam. Oreng padha
atole kabbi ban
saleng atanya, ”Sapa?”
”Ba’en,
Ri?” Oca’na sala settong tatangga se kennal
ka oreng lake’ gi’ buru. Langsung ekabala
ja’oreng gi’ buru reya lakena
emma’na
Encing. Encing takerjet ja’
oreng lake’ jareya se aberri’ pesse ka Encing
e lorong. (*)
*Mahasiswa Instik
Annuqayah jurusan Ilmu Qur’an Tafsir dhari Ella’ Dhaja,
Lenteng.
Tidak ada komentar:
Posting Komentar