Majang
Olle olang paraona alajara, olle olang alajara ka Madura
E bakto are ampon compet,
Oreng-oreng tase’ ampon arapet
Ngampar lajar e tengnga sagara.
Kaangguy majang areng-bareng
Olle olang
Du’a eatoragi dha’ Pangeran
Duwa ebaca e attas sampan
Sopaja juko’ ta’
ngetek e babana karang.
Saamponna badha e tengnga tase’
Ora’-ora’ malantar
Naja’ jaring se
eampar
Ta’ mekker tabu’ maske lapar.
Dhu oreng majang,
Ce’ raja babajana, abandha nyaba
Kaangguy kaodhi’an ana’ bine tor bala tangga.
Bintaro, 2017
............................
Cellep
E bakto malem se seppe
Tadha’ jangkrek se
amonye
Angen se ngalesser,
Ngoba aba’ daddi ngetter.
Pekkeran bula ngalengsang
Sabab, cellep ta’ duli elang.
Masjid Lu’-Gulu’, 2017
............................
Tobat
Posang ngalengsang rassana ate
Bannya’ dusa se elakone
Sabban are gun mekker dunnya
Makennyang tabu’ ta’ enga’ dha’ ibada.
Dhu guste,
Coma dha’ Ajunan tobat se paste
Kaangguy ngosot dusa dhalem ate.
Annuqayah, 2017
......................
Pondhuk Lu’-Gulu’
e ka’dhinto bula ngabdi,
nyare elmo tor ajar ngaji
sabban are bula eator
nyare elmo ka bara’ ka temor
sanajjan bula paggun budhu
samoga’a olle berkat kalaban atoro’ keyae tor sadaja ghuru.
Lu’-Gulu’, 2017
.......................
Ne’mat
Dhu Guste Se Kobasa,
Ce’ rajana Ajunan matoron ne’mat dha’ ka dunnya.
Aropa ojen se masegger, angen se ngalesser
Tor laenepon se Ajunan kasenneng.
Dhu Guste, kadiponapa cara abdina kaangguy asokkor
Sopaja ta’ duraka,
Nyecebi ne’mat se kaator.
Annuqayah, 2017
....................
Asakola
Saamponna are metto dha’ ka dunnya
Bula asakola
abareng ca-kanca.
Ate bula arassa bunga e sakola’an
Sabab ngaolle elmo dhari pangajaran
Namong, samoga sadaja se bula olle
Daddi berkat tor manfaat paparengepon keyae.
MAT Annuqayah, 2017
Epetthek dhari Puisi Madura Zainul Kurama'
Tidak ada komentar:
Posting Komentar