Rokat Buju’
eonjuk ka
ranca’na jate
ajam celleng
adaging dami socce
kalaban erenge
karettek ate pote.
tongtong akaor ngatappor
reng-oreng padha
akompol
acampor cator
adu’a tor-mator,
aeng mata ngalocor.
topa’, apen,
tajin etem
satalam gaga’ patot e babana rokem
sabarengngan edha’ar, angkara
lobar
paleman kalaban
tambana sabbar.
Bungduwa’,
2017
.............................
Molang Are
buwa taresna pon
mella’ ka dunnya
pa’polo are
kembang mera e tanangnga
bakto se
epasocceya
saengga budhi
are ta’ ngaresnges atena.
eketeng e attas
talam koneng
alengleng e
bannya’na oreng
erenge barzanji, komkoman tor
sadu’ur
kembang
maanyo’ karetek
ke se Maha Paddhang.
Bungduwa’,
2017
..................
Atatili’
tanges baji’
acerreng-cerreng
ne’-bine’ samper
nyecceng nyo’on tengteng
aesse berras
jenneng.
epatoju’,
epaambu
eangka’e kobi, jajan, ban nase’ sodhu
asella petotor
se bunga onggu.
tadha’ laen
tadha’ pole
tojjuwanna
settong maste
: ngabasa baji’
nantang are.
Bungduwak,
2017
.....................
Ate se Settong
seyang malem
bula rekong
akantha panas nemor adha’ naong
karana kerrong
ka ropa se morning.
ba’ bila bula
ban dika bakal apolong
arasop
mempe-mempe se potong
e settong malem se bulanna mancorong.
Bungduwak, 2017
...........................
Kembang Disa
ro’om manes edhinganna
agusot sossa se
ce’ bauna
ngocernang
robana
mata tadha’ busenna.
ceng-lanceng
padha terro semma’a
terro epajaga dhalem atena
maske saparo
dhari pamesemma
cokop rassa majuntrong
barna.
Gaptim, 2017
(Epetthek dhari Jawa Pos Radar Madura eccaban Ahad, 20 Agustus 2017)
Tidak ada komentar:
Posting Komentar