Asomaja
Satogel are tadha’
Epaabi’ akasap eangguy odhi’na aba’
E teggal, talon, saba alandhu’
Tengnga bungko’ lako nondhu’
Mekkere essena tabu’
Kaangguy olle nase’ sabundu’
Pamekasan, 2017.
..............
Tamanna
Taman,
tompo’anna kembang
Kennengngan se nyaman
eangguy dhang-ngendhang
Toju’ e jengka’
sambi akondhang
Sambi
ngabas jalan
se lanjang.
Badha
kembang malathe
Se ro’omma nyarepsep
ka ate.
Badha keya
kembang mabar
Se nyaredhep
bauna ngombar.
Tape tamanna bula sanonto pon tadha’ kembangnga
Banne ta’ ngembang, tape elang bauna.
Agante bauna lanceng ban paraban
Abiter toju’ apolong wa’-dhuwa’an.
Dhuuh...! sapora’agi guste.
Selennagi giliyan hidaya dha’ ka ate
Sabellun nyaba elang pas mate.
Pamekasan 2017
...............
Ompama
Ompama bungkana accem
Dhaunna rondhu’ gempek kecceng
Kajuna raja, ramo’na abulet manjeng
Buwana kene’ celo’ celleng
Ja’ abas bula lowarra
Arassa bagus katon ta’ sala
Coba’ rassae oca’ dhari bibirra ca-kanca
Tanya’agi baramma bula ka dika.
Ompama buwana kalentheng
Agantong akalatteng
Bungka nalar ngaleter
Abulet dhapa’ ka genteng
Buwa se kene’, bungka sakone’.
Tape aramo’ obi, se earep oreng kabbi.
Sanajjan rassa bula sabigi, nape dika paggun ta’ soddi?
Pamekasan, 2017.
................
*Alumni PP MUBA dan mahasiswa semester empa' STAI Al-Khairat
Mekkasan. Ajar e Komunitas Pers dan
Sastra Kampus (KAPAS).
Epetthek dhari:Puisi Madura Makinun Amien*
Tidak ada komentar:
Posting Komentar