Carpan Supriyadi Afandi
ANGGUY kabbi can-bacanna mon kake ajalanan, ma’ le
badha gunana se mondhuk pettong taon. Mon
ta’ dha’ iya
kake bisa lontor kabbi se ekaandhi’ magi terros
ka jaza’anna elang. Sabbu’ se esse bujella kake bi’ can-bacan
se egabayyagi eppa’en rowa angguy, ma’ le badha
gunana keya reng jennat otaba almarhum reng
towana agabayyagi jimat ka ana’en.
Mon alako senga’ ja’ sampe’ matodhus
reng towa. Bakalla oreng ja’ kala’, ja’
amaenan reng bine’,
ma’ le badanna ta’ ancor. Kake noro’ ngay
raja kan? Senga’ ja’
azina. Mon binena
ta’ rapa. Lamba’ polana badha
oreng reya noro’ ngay raja. Andhi’
bine pas gi’ amaenan
reng bine’. Orengnga
lakar la’ onga’ sara (songong), lako
ra-magerra, mosona bannya’. Enja’
pas epanceng bi’ ne’-bine’an
pas alako. Ella la leddu’ kabbi kole’en, bucco’ apa
sabarang.
Kake mon la andhi’ pekkeran akalowarga’a pas ngoca’ ka engko’. Mon ta’ bisa nyare
engko’ se nyareyagina. Keng
bi’ engko’ kake ya’ eberrinna gu’-teggu’an. Insya Allah
bakal lancarra apa-apa se ekalako
bi’ kake kor la bagus onggu neyadda. Katanggungan odhi’ engko’ ya’ gun endhi’
sakone’. Sateya engko’ la ta’ bisa abanto enga’
lamba’.
Le’-ale’en kake
wa’ la raja kabbi. Enja’ engko’
ta’ menta’a balessan, ta’ osa ker-pekkeran. Kake
reya la enga’ tang ana’ dibi’ polana maggi la pnakan sapopo kor kake sukses eparenge
gampang engko’ noro’ bunga, Cong.
Guttena Zaini
pas ngala’ barang se ebungkos labun. Bauna
ro’om. Labun gella’ essena soca se abarna bungo
towa. Ebukka’, epatao pas ebagi ka Zaini pas aberri’
amplop se esse pesse ma’ le
bisa egabay bandha alako. Pnakan
sapopona se gi’ buru klowar mondhuk,
gi’ awam dha’
kabadha’an e lowar
pondhuk.
Keng tang pessen, Cong,
senga’ ja’ juwal barang jiya, mon
kake gi’ kellara ngakan. Ja’ menjaman ka bank
ma’ le ta’ katendhi
odhi’en. Ma’ le ta’ egi-tagi otang. Mon
la etagi otang reya odhi’en la ta’ tennang. Tedhung
ta’ ngeddha, ru-taburu malolo. Ja’ arebbu’an
kalakowanna oreng. Abangsa ja’ dhus-todhus
nanangga. Ibadana ja’ kloppae.
”Ya
wes la, la mangkat. Senga’ ja’ kloppae
tang sen-pessenna reya.”
Zaini pas amet
sambi nyeyom
tanangnga guttena. Mole
ka romana. Amet ka
reng towa bine’en se odhi’
kadibi’. Lakona reng towa bine’en gun ajuwalan
rojak. Coma cokop egabay melle essena dhapor. Zaini pas amet
mangkada ka Sorbaja kaangguy mateppa’ kaodhi’enna
se mlarat polana tadha’ reng towa lake’en molae dhari mondhuk
olle tello taon.
Mare jiya embu’en
aberri’ labun se enga’ tepes. E dhalem
acora’ badha essena. Labun
gella’ pas esoro saba’ dhalem
dhumpedda ma’ le ta’ elang.
Zaini Dhapa’
ka Sorbaja
Zaini dhapa’
ka Sorbaja entar ka kancana se padha
klowaran pondhuk. Oreng towana endhi’
barung terpal se abak raja. Zaini esoro ngenep
neng romana kancana sambi ebanto nyare kalakowan bi’ kos-kosan se modha
se kerana ta’ pate jau dhari romana kancana se anyama Anwar.
Samenggu
abidda Zaini ngenep e romana
kancana ta’ gellem nemmo kos-kosan. Aromasa
ta’ nyaman ka reng towana Anwar. Kalaggu’enna Zaini
pas mangkat alan-jalan nyare kos-kosan
dibi’. Abit ajalan aherra Zaini
nemmo kos-kosan se kenne’ sara. Modha,
keng aengnga koneng.
Makke aengnga
koneng, Zaini yakin ngekkossa e jiya. Abak-rembak
ka se andhi’ kosan. Aherra
Zaini menta’a
bakto kaangguy amet dha’
oreng towana Anwar. E baktona
amet ka reng towana kancana ja’ ngekkossa,
aherra bi’ oreng towana Anwar ta’ eedine. Zaini esoro neng-enneng
bi’ Anwar. Mon alakowa bisa alako ka reng towana Anwar.
”Mon
sedha lakar
la alokowa, mara alako ka engko’. Ajai’
terpal otaba naneng mon badha oreng melleya. Gu’-aggu’
mon bisa long-molong sedha bisa mukka’ dibi’ otaba usaha se laen, Cong. Mara
la long-nolonge engko’ bai. Dina ebajara ban bulan. Polana kake ta’ aroko’ bi’ engko’ ban arena eberinna
lema ebu. Mon
samenggu ta’ la brampa. Pola
me’ malem menggu
alan-jalanna bi’ Anwar, ma’ le
kennal bi’ kanca kuliyana maggi la sedha ta’
akuliya pola me’ olle elmo
kuliya ne’-sakone’. Edhinna’
reya reng Madura bannya’, Cong, nyaman pas abangsa sedha.”
Zaini pas atoro’
ka reng towana Anwar ta’ daddi
se ngekkosa. Zaini
ajar ajai’ terpal sambi naneng mon
badha oreng melle. Olle
sabulan Zaini alako, terpalla eppa’en Anwar paju bannya’. Sampe’
oreng kadhang messen terpal lebat telpon. Paleng
seppena se melle tello’ oreng saare. Zaini dhapa’
ka bagina bajaran, eberri’i sanga’
seket bi’ eppa’en Anwar.
”Aggu
paneka bannya’ gallu, Te. Sala
la teddha’an kaula etanggung sampeyan.”
”Ella
la kala’, Cong, areya keng polana ramme. Ja’
sakenga biyasa enga’ re-sarena lamba’ engko’ paleng
gun abarri’ nemmatos,
lakar la bajarra sedha. Kerem
ka embu’en padha, long-polong padha, Cong.”
Mare jiya Zaini
menta ater ka Anwar ka kantor Pos, ngerema
pesse ka embu’en. Bi’ Zaini
ebagi kabbi se sangang atos
gella’. Soro long-polongagi ka embu’en
angguy kabalanja. Otaba kabelli emmas
ma’ le mon gu’-laggu’ buto bisa ejuwal pole.
Olle saare ngerem ka embu’en, pas
eppa’en Anwar ngoca’, ja’ badha
tatanggana nelpon. Pesse se ekerem
la dhapa’. Embu’en
laggu’ entara ka toko emmas, mompong
kabendherran emmas modha.
Pesse se ekerem
ana’en gella’ pas ekabelli gellang. Eangguy
polana ri’-berri’en ana’en. Mare jiya Bi’ Slama, embu’en
Zaini, pas entar ka pasar ablanja gabay
wal-juwalla, pas san-mesan melle daster anyar. Daster
anyar gella’ pas eangguy ajuwalan e romana, ebakto akes-rengkes barang, Musida
ngatela’ pas ngorak.
”Aggu...
kana’ gellangnga tera’. Sala dasterra anyar, mara rapa,
Bi’, ngenjama.”
”Iya, Da,
alhamdulila.”
Musida pas ambu
ka romana Muti’. Pas acareta ja’ Bi’ Slama ngangguy
gellang abak raja, dasterre anyar. Acora’
ce’ gampangnga nyabut pesse, olle dhimma
ta’ iya, Ti’? Muti’ pas ajawab, ”Paleng
la ollena ana’en alako teng-tabanteng, pas embu’en
se la talpos ya-magaya jiya, Da, epalobar kabbi pessena budhu’en.
Ja’ ta’ toman neggu’ pesse bannya’ pas badha
ngerem. Ella la pas epa’-teppa’agi melle kabbi badha
aro-terrowagi ka tatangga.”
Mare jiya, margana kadhuwa
oreng se acaca ta’ bandher, oreng se ngedhing
pas bannya’ noro’ acaca. Badha se
noro’ bunga polana ana’en pelak. Tape
bannya’an se acaca ta’ bendher. Enga’
ta’ trema mon Bi’ Slama dhi’-endhi’
otaba guy-ngangguy.
Caca sajan ramme polana
Zaini ngerem HP ka embu’en. Se anyama Musida bi’ Mut pas ngoca’ ja’ la towa dha’emma’a pe-hapeyan me’
ta’ tao todhus. Ja’ ya’ se ngodha ta’
pe-hapeyan.
Olle sataon
Zaini alako ka eppa’en kancana, aherra Zaini
nyo’on edi terro ka madura’a polana kerrong ka embu’en.
Zaini melle le-olle ebagiya ka guttena se abiyayae aba’en teppa’en mondhuk
kantos mangkada alako. E bakto mare
magi le-ollena Zaini pas mole ka romana, asalleman ka embu’en.
E bakto jiya Musida teppa’en melle
rojak. Pas ngoca’.
”Aggu…
jan gantheng kake, Ni,
kemma le-ollena se dhari Jaba?” Pas engala’agi gipang dhari
ettassa bi’ Zaini, Musida pas ngoca’ pole.
”Addhu,
coma gipang, Ni? Tadha’
se laen ya haha?”
”Tadha’, Nya Da, ja’ engko’ ta’ toman klowar, paleng
gun alako. Ta’ pate tao kennengnganna
le-olle e dhissa.”
Lem-malemma tatanggana entar amaen ka romana Zaini. Atanya
wa-duwa, jimat otaba gu’-teggu’en Zaini
reya apa me’ ce’ lekkassa sukses. Zaini gun ajawab
se penting ta’ la-nyala
ka oreng. Se lebbi otama ka reng towa dibi’. Pakellar wa-duwa bi’ jimatta mon lakona
nyake’e oreng reya tadha’ gunana. Jimat se paleng bagus reya
badha e ate. Banne can-bacan otaba barang. Mon gun barang rowa sapa’a
bai bisa agabay. Tape mon ate ta’ bisa ebay-gabay.
”Tape
ca’en kake eri’-berri’ bi’ guttena
se mangkada?”
”Gutte lamba’ aberri’ ca’-oca’an. Padha
moso apa se ekoca’agi
engko’ gi’ buru rowa. Mon gun barang se ebagi
ka engko’ ja’ gun soca, akek, kcobung. Jimat
se asli ya paenga’an otaba sen-pessenna reng towa. Tadha’
pole se lebbi mandi. (*)
Epetthek dhari: Jimat
Tidak ada komentar:
Posting Komentar