Tello' Sanja'na Arif Hidayat

Nemor Kara

Are arangka’ e balikadda nemor

Ngobbar ba-rebba biru

Tor dhadha bula se ranggo’

Eng-aeng ngetek

Ka atena bume

Sara esepsebba ramo’ kajuwan

Tor manossa se padha angkara

Sakone’ balakka’

Ondhem agiba ojan

Tak perna lebat e attassa cethak

Dhu,

Ba’ asabab dusa, ojan ta’ toron

Sakoduna sanonto

Bulan bacca kalaban bunga

Banne kalaban aeng mata nespa

Nyangsara abulanan,

Dhu,

E ka’dhimma poncana nespa neko,

Sadaja manossa ampon ta’ kowasa

Sakadar manjeng nyocco are

Otaba ajalan nete omba’

Tor akello’ angen se ta’ nanto

Dhari dhimma asalla

Kennenggan Seppe, 2017

..........................................

Ojan Nespa

Sapo’ nape se kellar ngerrep cellep

Saellana ojan tor angen

Ta’ endha’ serna

Keddhap tor kelap agarudhu’

Magujur langnge’

Badan neko malekko’

Ta’ sanggup ngokor lanjangnga lencak

Kalaban coma’ asapo’ du’a

Abantal pangarep

Nyare mempe,

Tadha’ mempe se etemmo

Coma’ gumigil ta’ re-mare,

Dhari bang-lobang candhila se ta’ rape

Angen ngamok badan neko

Bula ta’ kellar alaban

Salaen coma agulek nespa odhi’ kadibi’an.

Kennenggan Seppe, 2017

.............................................

Pangarep

Nete teppong ta’ alampat

Nedda’ gunong daddi sagara,

Tang-bintang ngalotor

E poncana pajjar,

Pola dika se sanggup

Notta’ essena tamba’ odhang

Dhi’ reng-oreng lowar nagara.

Bila seyang nyellem

E ponca bara’

Rek-jangrek ta’ ramme pole amonye

Coma’ messin se terros ta’ re-mare amonye.

Dhu,

Jaman nape nyamana?

Reng-oreng ta’ eman pole ka tanana

Na’ poto ta’ tanto e dhimma

Nyareya kennengngan pole.

”Mon polana odhi’ mate ta’ ajanji

Tape ta’ burung sanonto kaodhi’an pon ta’ tanto”

Kennenggan Seppe, 2017

Epetthek dhari: Puisi Madura Arif Hidayat