Roseya Amorba Jagat

CARPAN MUDHAR CH.*

KORANG langkong dhutaon Ka’ Towan Hari songkan. Songkannepon kabilang songkan sanget. Dhari hasel pamareksa’annepon, menorot medis sae sadaja. Tadha’ sala settongnga se sakerana daddi sabab. Sabab, aponapa Ka’ Towan Hari kantos songkan elang ora’, lemmes, letoy, tor namong bisa asaren. Jugan ta’ bisa abu-dhabu. Sadaja rajekke  etola’, kajaba korma se epaalos tor egaluy sareng aeng somor.

Dhuwa’ parkara se bisa mabali ora’ Ka’ Towan Hari. Settong, adan e masegit naleka are Juma’at. Se nomer dhuwa’ kadhatengnganna pottrana dhari pondhuk naleka dhateng kalaban edi dhari Ma’ Kae kaangguy ngongngang reng seppona.

Naleka e masegit adan e bakto juma’adan, Ka’ Towan Hari jaga minta aeng udu’ kaangguy asalat e compo’na. Salastarena asalat, ora’ se ampon abali elang pole. Sapaneka jugan naleka pottrana se dhari pondhuk dhateng kengeng edi khusus dhari Ma’ Kaeepon.

Ane tor nyata. Laen kabadha’annepon manabi pottrana parai. Biyasa akadi notoban tanggal 12 e bulan Molot. Pottrana parai samenggu, nangeng Ka’ Towan Hari ta’ jaga sakale amendha are-are naleka pottrana badha e pondhuk.

***

Lan-molannepon Ka’ Towan Hari songkan enggi ka’dhinto saamponna paleman dhari masegit abajang Juma’at. Biyasaepon sapalemanna dhari masegit laju adha’ar. Bakto paneka bunten. Rajina ampon ngemodi guna adha’ar. Namong, Ka’ Towan Hari ta’ sae eber.

”Tao, iyya’ engko’ ta’ nyaman rassa. Engko’ dhung-tedhungana gallu. Dhaggi’ mon kenceng la ngakana,” Ka’ Towan Hari asaren e pangkeng bara’. Pangkengnga pottra lake’na se samangken akuliya e Jaba.

Para’ magrib Ka’ Towan Hari gi’ ta’ mejil guna manggi’i santrena egandhu’ se epangaji’i poy-kompoy, tor kan-ponakan, sarta pottra-pottre bala tanggaepon. ”Ka’ Towan, pon para’ magrib. Ngereng abungo! Na’-kana’ pon padha dhateng,” ca’epon rajina dha’ Ka’ Towan Hari se ta’ biyasana.

”Iyya, enja’ engko’ ta’ tedhung, keng engko’ ta’ nyaman aba’. Na’-kana’ se la majalan soro malae ka se ne’-kene’, se gi’ ngeja! Soro ja’ nger-enger, ya!”

Tello are abidda kabadha’annepon Ka’ Towan Hari bunten ta’ tamba sae. Kasehadannepon sajan toron. Peha’ kalowarga saroju’ kaangghuy ebakta apareksa ka dutter. ”Sampeyan ponapa se songkan, Pa’?”

”Kaula ale’na se bungso, Pa’ Dutter. Kadiponapa?”

”Gan bila se songkan abu-dhabu?”

”Gella’ seyang, Pa’. Neka minta pottrana telpon soro paleman. Insya Allah, laggu’ salastarena ujiyan ca’epon.”

”Dha’ neka, Pa’, paneka se songkan buto rabadan se langkong intensif, saengga badan kaula nyarannagi kaangguy ebakta ka roma sake’.”

”Saneka Pa’ gi? Mangken dhimin, gi’ ekarembaga.”

Saamponna ekarembak sataretanan, Ka’ Towan Hari ebakta ka roma sake’. Samangken ampon erabat e roma sake’. Akadi janjina, kalagguwanna salastarena ujiyan, Emmat, pottrana se akuliya e Jaba, dhateng.

”Abdina sapora, Rama, songkan ponapa ajunan?” Emmat asallim, nyeyom asta reng seppo lake’na.

Socana Ka’ Towan Hari se molae ba’ari’ atotop, meddem, samangken abukka’ laonan. Dhari latheepon se kerreng sabab tadha’ rajekke se maso’ mesem jugan laonan. Pamesemma semmo etahan. Mesem ta’ lares. ”Dhateng, Cong?”

”Enggi, Rama.”

Reng-oreng se nyandhing same-same kasambu’, mengnga’, getton, tor heran.

”Kedhingngagi ya, Na’...”

”Ngestowagi dhabu, Rama.”

”Molae sateya, ba’na ta’ osa akuliya u-jau. Mara sateya ba’na mondhuk ka dalem bara’, dalemma Ke Khotib. Ajar pateppa’ kaangghuy sangona odhi’ e dunnya ban e aherat. Banne engko’ reya ta’ endha’ jau. Ba’na akuliya e Jaba kan engko’ keya se noduwagi. Sateya badha se lebbi parlo. Poko’na kodu mondhuk. La’-tella’a engko’ ta’ tao battonna pondhuk.”

Emmat kabilang na’-kana’ toro’ oca’. Emmat namong aonggu’, narema sadaja pamanggi reng seppo lake’na. Saamponna paneka, Ka’ Towan Hari ta’ abu-dhabu pole. Akadi sabellunna Emmat dhateng.

Oreng se nyapot ondur-dhateng. Ta’ namong dhari sakobeng Kampong Kopao, kampongnga Ka’ Towan Hari. Tape jugan terbas dha’ sakobeng parumahan e kennengngan biyasaepon Ka’ Towan Hari asalat Juma’at. Sabagiyan magarsare parumahan jugan nyapot.

Satengnga bulan abidda Ka’ Towan Hari erabat e roma sake’, songkannepon ta’ olle dhammang. Paggun tadha’ obana, akadi gi’ buru ngamar. Bala, taretan, tor kalowargana Ka’ Towan Hari molae busen. Busen asabab tadha’ hasel se magumbira. Aherrepon kalowarga saroju’ kaangguy ebakta paleman. Erabat e compo’. Sabetara Emmat ampon epamondhuk ka dalem bara’, dalemma Keyae Khotib akadi se ekasokane Ka’ Towan Hari.

***

 Korang langkong dhutaon Ka’ Towan Hari songkan. Sapaneka jugan Emmat mondhuk e dalemmepon Kayae Khotib. Are Kemmis gu-laggu, Emmat edikane sareng Keyae. ”Reng seppona olle nyaman, Cong?”

”Bunten...,” Emmat ajawab kalaban sopan.

”Ba’na la abit ta’ mole?”

”Enggi...,” Emmat sajan nyokel se nondhu’. Ta’ bangal mandeng salerana Keyae Khotib.

”Daggi’ seyang, re-mare Duhur ba’na mole gallu. Panggi’i reng seppona, kabater badha pa-apa. Antos sampe’ laggu’ toronna juma’adan. Apa se edhabuwagi reng seppona toro’e!”

Emmat bingong acampor seyal. Ra-kera badha ponapa hubungannepon sareng reng seppo lake’na. Tape Emmat ta’ bangal ngotara’agi.

Maso’ ka kampongnga, Emmat aromasa kerrongnga gan sakone’ molae elang. Ta’ bannya’ obana, tape paggun ekakerronge. Emmat ajulu pesse lemaebu ka tokang bentor se gi’ buru etoro’e dhari partellon. Ajalan soko pata dhupolo meter. ”Assalamualaikum!”

”Waalaikum salam... Ma’ mole, Cong, ja’ la para’ paraiyan?” Reng seppo bine’na atanya.

”Enggi, epakon manggi’i rama sareng keyae. Kadiponapa, Ebu sareng Rama sae?” Emmat duli asallim ka reng seppo bine’na.

”Alhamdulillah, Ebu baras salamet. Rama la paggun bai tadha’ obana. Mara la maso’!” Emmat duli maso’.

”Rama!” Daksakala Emmat alonca’. Ka’ Towan Hari ampon alenggi e padduna lencak.

”Ma’ ta’ duli maso’, Cong? Sengko’ kerrong,” Ka’ Towan Hari mesem. Emmat sekat se nyandhak astana, asallim.

Emmat aromasa kasambu’. Sapaneka jugan ebuna Emmat langkong getton e dhalem kabadha’anna rakana. Kadiponapa ta’ heran, ja’ Ka’ Towan Hari se songkan sanget nangeng naleka Emmat dhateng panyake’na elang dakkala.

Dhapa’ ka lagguwanna, gu-laggu e are Juma’at, kabadha’annepon terros sae. ”Cong, daggi’ ka masegit pa bak awwal! Sengko’ abarengnga.”

”Enggi... estona Rama ta’ mabi ka masegit dhimin. Laggu’ dhumalem manabi ampon ce’ saena...”

”Engko’ la nyaman, Cong.” Emmat mele nondhu’. Ta’ bangal ngotara’agi essena pekkeranna.

***

Ka’ Towan Hari sareng Emmat badha e essap dha’-adha’, lerres e budhina paimaman. Kadaddiyan dhutaon se tapongkor abali pole. Naleka khotib kodu ongga ka mimbar tadha’ se ongga’a. Sadaja jama’a leng-katolengan patang senggu. Saleng duddu’, aere kaangguy daddi khotib. Ma’ Kae se kawajiban ngagunge aral. Ta’mir se biyasa daddi khotib tadha’ se rabu. Ka’ Towan Hari molae pellay. Salerana apello. Padha sareng astana, kacep.

”Mat, ba’na terro engko’ baras?” akoto’ ka pottrana. Emmat duli aonggu’. ”Ba’na gi’ ta’ cokop ya, Cong, bakto dhutaon? Mon terro engko’ barasa...”

Emmat duli nyeyom asta reng seppo lake’na, ”Nyo’on edi, Rama! Bismillah...”

Emmat ongga ka mimbar daddi khotib. Salerana Ka’ Towan Hari binar. Dhari lesanna eli-bali lafadz, ”Alhamdulillah”. Ta’ sala engko’ anyamae kalaban nyama Mohammad Khotib. Ta’ kalero engko’ mamondhuk ba’na ka dalemma Kayae Khotibul Islam. Teppa’ ban akor kalaban nyamana bang-sebang. Alhamdulillah. (*)

*Lahir di Sumenep, 29 November 1980. Bergiat di Ma’had Al Ittihad Al Islami, Camplong, Sampang.

Carpan epetthek dhari Jawa Pos Radar Madura (JPRM) eccaban Ahad, 18 Desember 2016 otaba Roseya Amorba Jagat.