Lema' Sanja'na Raudlatul Makiyah

Asapo’ Malo

Ngereng giba’agi aneka malo se ampon akompol

Mellar dha’ pan-ponapan roba se ngalengsang

Meyarsa dha’ aba’ se ampon seppo tor tompol

Di’-dindi’an e tengnga taneyan se gersang

Ngereng giba’agi aneka malo se ampon akompol

Mereng dha’ bangaseppo se dheng-mareddheng

E tengnga aba’ se ampon dhengdheng

Malo ampon ekasapo’ badan se ngernger

Alorju’ ka tengka se ampon nyonyor

Ngereng giba’agi aneka malo se ampon akompol

E dhalem sagarana dhadha se nyangsang e sanja’-sanja’ kona

Taroncet e tengnga talon se sorop

Ngereng giba’agi aneka malo se ampon akompol

Ma’ olle ta’ ceng-nocceng e gandhu’ kompolanna tolesan se kasohor

Ngereng giba’agi aneka malo se ampon akompol

Ma’ olle aba’ ta’ lako asapo’ malo

Soengennep, 16-11-2016

............................

Le’-pale’ Kopeng

Alpo’ pangaelanna

Lemmes teggu’anna

Alos serrat kole’na

Lecen koro’anna

Le’-pale’ kopeng, akantha paraban

alos pangocabanna

Lemmes tengka gulina

Alos kole’ badanna

Lecen babategga

Le’-pale’ kopeng

Ta’ towa, ta’ ngodha

Ta’ gali, ta’ leca’

Agares yep-paleyeppan

Masoga’ ka badan se ampon alpo’

Le’-pale’ kopeng

Tengnga’anna towa ban ngodha

Soengennep, 16-11-2016

..........................

Ngoso’ ka Apoy

Ka ator dha’ se molja pangowasa napso

Se nyosop e dhalem dhadha

Esorak daddi mardha

Se esorong ngangguy corong

Ngoso’ se mosse’ daddi apoy

Rabak lok–ologgan ojan

MADERREP OCA’

aaaaa......eeeee.....iiiii.........ooooo...........uuuuu

Akompol daddi settong

Apolong ban kancana se aceta’

Alengleng daddi maleng

Aca’-lonca’ mara kata’

Reng-ngerengan abaris mara bilis

Oca’ se esoson epatorson ka penggir

Li-baliyan berka’ nabang garis

Maderrep oca’ se nyengnger

E loar ban e dhalem kapengnga buku

Soengennep, 16-11-2016

..................................

Ngarep Poncana Bulan

Angen ser-ngalesser nyellebbi ate se mara mardha

Gu’-onggu’an nyepsep poro se ta’ adhara

Dhing-takendhing nyare sonarra bulan dhalem malem se talebat berrit

Aorana elang ekekes ondhem se barat

E dhimma se nemmowa poncana bulan

Ale’le’ pangarep se ta’ metto sowara

Sanajjan oca’na gi’ ta’ ebendhem dhalem dhadha

Talka ate alengleng e perregga ojan

Ngarep nemmo poncana bulan

Bulan se tapongkor ampon lebat ta’ pamedan

Dhateng ta’ apangapora

Ajalan ta’ asowara

Berka’ asaka’ bakto

Ler-keleran angka settong sampe’ tellopolo settong

Abaris mara tantara se aperranga

Badha se celleng, badha se mera, badha se biru

Genna’ dhalem settong pananggalan se agambar bulan pornama

Ngarep poncana bulan duli dhateng

Agenna’i balanja se matalka ka dhadha

Sanajjan balanjana reng towa ban mattowa

Genna’ dhalem poncana bulan.

Soengennep, 15 Nopember 2016

............................

Maodhi’ Mardha se Tedhung

Li’-guli’an mara oreng se kaberradan

Lep-kellebban ngator oca’ se e badan

Akantha oreng bambungan se ta’andhi’ pangoreban

Ceng-nocceng ababas alas se nosseng

Aba’ pasra adindi’ odhi’

Maderrep bakto e dhalem mardha

Mardha se ampon abit tedhung e bakto se tapongkor

Pangarep odhi’ ampon badha

E bakto bula ban dika odhi’ apolong

Alolong oca’ se rabak

Meyarsa mangken ampon daddi

Mardha se tedhung ampon epaodhi’

Kalaban barnana apoy se esaropong

Dhalem pangorebanna bula ban dika

E tomang se ampon para’ lejjra

Maodhi’ mardha se tedhung gampang-gampang malarat

Melana badhana angen se barat terros mamate

Pangoreban aba’ se ampon manyonar apoy

Ta’ matalka e dhalem dhadha

Soengennep, 15-11-2016

Epetthek dhari Jawa Pos Radar Madura (JPRM) eccaban Ahad, 8 Januari 2017