Ra Munir

CARPAN BIN*

TANTONA Ra Munir bunga ampon mennang ban epele daddi anggota dewan e daerana. Tatape tengka gulina reng seppo bine’na, Nyai Zaenab, se acora’ ta’ ehlas pas aganggu pekkeran tor atena Ra Munir. Se jellas, Ra Munir ta’ bisa fokus ajalane tugas bila atena ummina gi’ arassa berra’.

”Cong, ba’na ta’ parlo terrosagi jalanna aba’na. Politik jareya lecen tor macalaka’,” petotorra Nyai Zaenab saellana oneng ja’ pottrana bakal acallona daddi anggota dewan. Maske Ra Munir mator kalaban alos alasan tor neyat bagussa, tatape ummina paggun kapekkeran.

Saestona, alasan se paleng otama Ra Munir acallon daddi kalebun coma emot dha’ dhabuna almarhum abana, Keyae Fathor, sopaja ajaga ban terros daddi pangadha’na ha’ ban kaparlowanna masyarakat kene’. Saengga Ra Munir mamantep atena ban mabangal maju e peleyan. Ta’ esangka, kapartaja’an masyarakat dha’ almarhum abana terros cekka’ ban nancep sampe’ dha’ katoronanna.

Ampon abukte ja’ kamennanganna Ra Munir dhalem peleyan amarga masyarakat paggun ngormat ban taresna dha’ almarhum. Ta’ bisa epongkere pole kanyata’an ka’dhinto.

Almarhum Keyae Fathor ekennal daddi bekkella masyarakat se jujur ban amanah. Ta’ sampe’ dhutaon, Keyae Fathor ekenneng panyaket padha’aranna. Bakto epareksa e puskesmas, dokter tadha’ se oneng jenis panyaketta. Acora’ korang marassa, aherra Keyae Fathor apareksa dha’ Sorbaja.

Hasella percoma. Dokter e Sorbaja jugan ta’ marenge kajellasan. Dokter coma akabar ja’ saongguna panyaketta Keyae Fathor sa-biyasa ban ta’ sampe’ mababaja. Buktena, Keyae Fathor pancet sehat wal afiat eabas dhari lowar. Acora’ dhada’ pa-ponapa. Mangkana sabban malem keyae aserrowan arassa nyo’nyo’ e padha’aranna.

Saampona olle dhubulan, panyaket ta’ ras-baras. Aherra sapopona Keyae Fathor madhateng ahli baten. Keyae Fathor ta’ nola’ amarga sapopona apanganggep ka’dhinto menangka daddi jalan ikhtiarra kaangguy baras. Manorot pamatorra ahli baten, Keyae Fathor ekenneng panyaket angen alias seher. Pola badha oreng baji’ ban peggel dha’ parjuanganna. Laju takerjat saessena compo’. Otamana Nyai Zaenab.

Keyae Fathor ta’ gu-onggu partaja, maske saestona yakin dha’ badhana elmo seher. Sabab aba’na apangrasa ta’ toman amoso ban nyake’e atena oreng laen. Keyae Fathor lebbi yakin dha’ dhabuna dokter ban masra’agi sadajana dha’ Guste Pangeran. Lesanna ta’ bu-ambu maos istighfar ban salawat. Apangarep sopaja duli sehat ban bisa ngalaksana’agi kawajiban daddi bakkella masyarakat.

Keyae Fathor tadha’ omor bakto maos Alquran e korse. Masyarakat ta’ nyangka ban ta’ partaja. Pangadha’na dhalem urusan agama ban pamarenta’an ampon ngadhep Se Maha Kobassa. Para bala, keyae, bangaseppo, ponggaba, tor masyarakat kene’ alalabat dha’ dalemma Keyae Fathor. Padha apangrasa kaelangan junjunganna. Dining Ra Munir emo’ majembar ban masoga’ atena ummina se takerjat edinggal rakana.

Bannya’ kabar angen akalarkaran. Manorot settong oreng, keyae seda margana esantet moso politigga. Manorot se laen margana panyaket. Ra Munir ta’ ngejabi bar-kabar ta’ paste paneka. Ra Munir ampon maehlas sadajana ban masra’agi da’ ajunanepon Allah.

Monggu Ra Munir, se wajib ekalako enggi paneka nerrosagi parjuanganna abana lebat jalan politik. Mangkana, Ra Munir bangal noro’ peleyan anggota dewan. Nerrosagi jalanna abana salaen daddi keyae kampong.

Tantona, Nyai Zaenab ta’ soddi dha’ neyatta pottrana. Bila ampon emot dha’ aher parjalananna rakana. Atena Nyai Zaenab kobater pottrana pas seda esantet otaba epeddang oreng ta’ ekennal. Kadaddiyan eamba’ oreng e tengnga parjalanan bakto paleman dhari kaonjangan asareng rakana ampon makene’ kabangalanna Nyai Zaenab.

”Arapa ma’ ta’ atoro’ ba’na, Cong? Sengko’ lebbi senneng ba’na ngurus pasantren areya. Ngopene reng kampong jareya jalan molja,” dhabuna Nyai Zaenab.

”Mi, reng-oreng kampong kodu badha se daddi pangadha’ dalam urusan pamarenta. Manabi ta’ sapaneka, masyarakat ta’ olle ha’ se samastena. Lako ekal-akkale ponggaba.”

”Ba’na ta’ ngabas abana? Seda ta’ etemmo margana.”

”Badan kaula acallon marga ngabas aba, Mi. Aba ehlas ajuwangagi ha’ masyarakat sampe’ seda molja. Manabi seda ban samacemma paneka urusanepon Allah. Saporana, Mi, kaula nyo’on kaehlasan ajunan. Manabi urusan pasantren, abdina pasra dha’ Le’ Tolha bisaos.”

”Ya Allah. Pakowat atena engko’ se lemmes areya, Cong...”

Laju gaggar aeng socana Nyai Zaenab bila emot dha’ rakana. Dining Ra Munir pas asanappel nyo’on sapora margana ta’ toro’ oca’. Pottra-ebu paneka padha molar. Aherra, kalaban parasa’an berra’, Nyai Zaenab maehlas pottrana daddi pangadha’na reng-oreng.

”Paenga’, Cong,” dhabuna Nyai Zaenab sambi ngosap aeng socana, ”Abana ba’na loros ban ajuwang karana Allah, banne margana dunnya. Ja’ pakalero neyat ban tojjuwan. Ja’ gendhak. Pabannya’ maca salawat ban istighfar. Dhutaon atugas, abana ta’ toman ngala’ gajiyan dhari pamarenta. Abana tang-taotang kaangguy mangokos dhapor. Atanya ka Ji Rahmat mon ba’na ta’ parcaja. Arapa ma’ sampe’ nga’ areya? Amarga abana kobater atena sala neyat ban ta’ ehlas saellana ngabas pesse gajiyan. Pangastete, Cong.”

Ra Munir aonggu’. Atena mamantep kaangguy nerrosagi parjuwanganna abana. Bi-lebbi ebuna la ehlas ban aduwa’agi. Sejjekka aneyat nerrosagi jalanna abana, Ra Munir ta’ mekkere gaji ban salaenna. Monggu Ra Munir, atena socce neyat ngabdi dha’ masyarakat, banne parkara pesse.

”Ngastete, Cong,” Nyai Zaenab malaon sowarana akantha to’-koto’, ”Abana li-baliyan olle pangacoba. Epetna, eangka’e are’, ban eamba’ e tengnga jalan. Mon jareya la daddi neyat moljana ba’na, ummi ehlas asal pangastete. Ban pole ba’na la ekapartaja masyarakat.”

Akantha badha lap-kelap se nappor dhadhana Ra Munir. Ropana parjuwanganna abana ta’ sagampang ngen-bangenna ban catorra masyarakat. Laju paddhang jang-bajanganna are’ akalonat e pekerranna. Masala petna pola bisa eadhebbi, tatape bab are’, Ra Munir abak kobater.

”Jalan odhi’na ba’na gi’ lanjang, Cong. Ajja’ sampe’ mate ngodha.”

Samporna tapegga atena Ra Munir. Bi-lebbi bila enga’ dha’ laguna Maher Zain Zaujati. (*)

Epetthak dhari: Ra Munir