Carpan Hasmidi
SAMBI ngonjur areba
bantal, etemang-temang ta’ kalaban eembane. Mangrib petteng nyalembu dhari
morlao’ kaja nyambi ondhem lir-biliran. Kabbi ngetek e budhina, ta’ asowara.
Bintang-bintang ban bulanna celleng kaandhengan ondhemma. Sateya tanggal tello bellas,
sakeng mon ngabasagi dhari pettengnga se talebat calemodan acora’ ella napa’ ka
tanggal towa. Pola lakar enga’ reya bila oreng ta’ neggu’ pesse. Apettengan se
talebat kalaban malem sateya.
Cangker ella padha etolong, epasettong
ka talam, terros egiba ka dhapor budhi. Buter-buter esapowe ngangguy po-sapo
lente, satekkeman. Saellana berse, lama’na egulung. Teker ra-kara se eanggit abarna
koneng laju ta’ ngabiru pole. Esaba’ neng amper budhi, ”Ella ja’ saba’ pajau,
ame’ badha tamoy pole. Olle gampang ngala’na dhaggi’,” serrona mattowa bine’ ka
sengko’. Abasanna satengnga gipo, mare magimpo’ jajan, nang-ginang, ban aeng
gellasan terros ngala’ po-sapo edduk. Gaggarra buterra nase’ acampor ban
bu’-arbu’an jajan.
Sengko’ gun bisana manjeng ngabasagi dhari
labang kamar teppa’ ka kenne’ se
etampa ngangguy tanang dhuwa’na bine. Genna’ kalaban kodhung se esongkobbagi ka
cethagga. Tengngana ebetbet kalaban beddhung, dhukonna se mangangguyi gella’
samarena epandhi’i neng taneyan.
Ra-kera samarena rese’ se toron
on-laonan. Dineng tanang ban sokona ta’ etemmo. Katotoban kaen baddhungnga gella’
samarena mandhi gi’ badhana are neng konco’na gunong dhi bara’na roma.
Sanyatana aba’ se ngabasagi sambi manjeng ta’ tega, dhimma bisa aguli tang ana’ jareya. Tanang ban sokona epengkot, serret.
Anis, binena sengko’, gun aonggu’ ka
adha’na mowana kenne’ se badha neng parangkowanna. Maskeya kenne’ jareya ta’
bisa ngabas ja’ apa bai se elakona embu’na ban reng laenna. Matana laggi’ ta’
bisa narema pa-apa se badha neng adha’na matana. Coma bisa arassa’agi petteng
ban solabba sonar lampu otaba are.
Korse lembu’ se ekatoju’i acora’
abintalagi badanna, sakeng noro’ bunte’ dhari onggu’anna Anis. La-sakala, cethagga Anis ngaddhange tera’na lampu, persis badha neng attassa
kaangguy agaja’i baji’na. Bila cethagga nondhu’ kerso’ alessa mencar,
abang-sebang, abali ka kennenganna se asal. Tape bila cethagga Anis onga’
alessa ana’na acampo pole. Tao ja’ badha ra’-tera’ se bisa etangkep kalaban
mata dhuwa’na.
Matana binar ngabasagi mowana kenne’ se
ngangguy kodhung barna mera. Kodhung se ebelli lema are sabelluna arembi’. Neng
bengkona bidanna ella nyadhiyai cem-macemma angguyya baji’ se buru lahir. Badha
keya angguy na’-kana’ ban reng towa.
Kodhung jareya ebelli baktona mareksa
majadhi’na Anis apareksa baji’na keya se laggi’ badha neng dhalem tabu’na.
Sabellunna, metorot bitongan bidan se mareksa, satengnga bulan sabbanna ella
baktona rembi’. Tape sampe’ sateya paggun ta’ war-kalowaran aeng ka’bana
balakkadan, saenggana sakalowarga padha saroju’ kaangguy mareksa’agi ka Dukter
Wongso se badha neng kottha. E bakto malem se mareksa jareya laggi’ ambu ka
bidan se biyasa mareksa Anis ban baji’na.
Sapatu celleng se toju’ neng erra’ ngacernang,
ngellap, ngonyak. Lakar bila sabban malem Sennin tang
sapatu eellap ngangguy kiwi se ebelli
neng pasar. Lakar ta’ sabban are otaba kadhumalemanna se eosso ngangguy
ellap jareya. Bila teppa’ ka rek-perregga lako tor kadhang ta’ eellap balakkadan.
Banne sakeng terro ealemma. Sapatu bila
ngennyap abasanna acora’ larang belliyanna. Banne gun sapatu se badha neng
jareya, bannya’ sandhal laenna padha keya nongko’. Ta’ coma settong erra’. Tape
sampe’ dhuwa’an ajijir neng padduna kamar budhi se apolong kalaban karanjang
kalambi se mare eangguy.
Erra’ sapatu ban karanjangnga kalambi se
mare eangguy lakar ta’ olle esaba’ neng bas-abasan. Pajat ta’ lebur eabas ban
pole tako’ badha bau se ta’ nyaman dhari dhuwa’ baddha jareya. Banne ta’ ekaemane
rang-barang se badha neng amper budhi jareya. Sakeng tako’ bila badha tamoy
arassa ta’ perna bila nangale ban angesnges se ta’ nyennengagi.
Ojan gun toron sakejja’ neng genteng,
ta’ koceba satengnga ejjam balakkadan. Paleng mon ebitong akesar lema bellas
mennit ka dhupolo mennidan dinna’. Adan esa’ buru ekaedhing dhari lospiker,
langgar e dhaja’an lakar lebbi ceppet dhari langgar se laen. Samarena jareya,
Anis temmo nyaba’ kenne’na neng kasor husus. Kasor kene’ ebelli neng bidan se
abanto marembi’ tang baji’ jareya.
”Assalamualaikum...”. Sowarana oreng se
ngolok salam dhari lowar acora’ seggut ekaedhing. Dhari adha’na labang jareya
se epacope’ moddul dhuwa’ jang-bajangan buru toron dhari sapedana. Tang bine se
buru marobbu laju jaga sakaleyan. Abaladhas.
”Walaikumsalam...” Mattowa lake’ kalowar
nyambut oreng se dhateng sambi ngolo’ salam.
”Sampeyan, Man? Ngereng longgu.”
Nangale ja’ se dhateng jareya sala settong
oreng se andhi’ pangaro neng tang kampong, tape gi’ andhi’ sambung kalowarga.
Sengko’ ngendhep sambi asalaman.
”Lakar sapaneka, Man, molae gella’
bannya’ tamoy sabellunna ojan ampon paleman, ta’ bisa kapekker manabi badha
ojan raja etempona bannya’ tamoy, badhi ngalle ka’ dhimma.
Eka’dhinto pancet katoro’ manabi ojan derres,” Mattowa lake’ atotoran.
Dineng mattowa bine’ gasek ondhur ka
budhi, ngella aeng kaangguy agabay biddang. Roko’ sabaddha epakalowar esaba’
teppa’ neng adha’na tamoy jareya. Apolong ban baddhana bunceng se ekagabay
dhari kaju.
Ta’ abit cara apa, biddang gabayanna
mattowa bine’ dhateng. Ejuluwagi ka adha’na tamoy se kadhuwa. Ta’ kadinggalan
mattowa lake’ ban sengko’ padha ejuluwi keya. Elowar sowara ngaroso dhari lao’.
Acora’ buru santa’.
Ojan gaggar pole sajan raja. Araja’an
ban se gaggar gi’ buru. Arbes gan sakone’ dhari tampeyanna genteng. Sajan abit
sajan santa’ gaggarra. Ngalocor. Mabecca lama’ ban karamigga. Tamoy ban sabadhana oreng se toju’ padha
ngerset gan sakone’, nyengla dhari aeng se katoro’, toju’ kapaddhu temor lao’.
Kenne’ se tedhung ealle ka dhalem. Egiba moso kojung, kasor, ban lama’na.
”Saporana, Man, kadi paneka manabi ampon
ojan raja?”
”Senga’ se kene’ ajja’ sampe’
pakaojanan, oca’na oreng kona. Kenne’ se kaojanan bakal buwi.”
Epetthek dhari Jawa Pos Radar Madura (JPRM) eccaban Ahad, 1 Januari 2017
Tidak ada komentar:
Posting Komentar