CARPAN MUSYFIQ ROZY*
E PENGGIR tase’,
badha buju’ se ban oreng
Ambunten e molja’agi.
Buju’ Ke Sanadin nyamana. Lamba’, Ke Sanadin neka
oreng lowar se neptep e
Disa Ambunten.
Ke Sanadin neka sorowan dhari Rato
Sumenep kaangguy adakwah neng e Disa
Ambunten polana ta’ perna
emaso’e agama Islam.
Sampe’ mangken buju’
ganeka
paggun badha neng e penggir tase’. Bannya’ se
ngoca’ ja’ Ke Sanadin ganeka
seda ebakto
ngala’ udu’ e tase’, lastare ganeka
asalat dhuwa’ raka’at
pas seda.
Jalan
loros ganeka Lorong Anyar
nyamana. Salanjangnga
lorong, bannya’ kajuwan
se notobi saengga
arassa cellep. E penggir jalan,
saba se etamenne padhi
ngantang ngakoneng. E bun dhajana lorong
ganeka badha patung
kerraban sape.
Lamba’, caretana, Ke
Sanadin neka
lebur ngowan sape. Tape ta’ sampe’
ngerrap sape. Saengga bannya’ oreng
Ambunten neka
lebur ka sape jugan. Sabban are,
salaenna ngajari ngaji
Alqur’an ka oreng se badha e Disa Ambunten, Ke Sanadin jugan
ngowan sape neng e penggir tase’.
Ke
Sanadin ampon seda. Masyarakat
Ambunten paggun lebur ka sape, barnana
jung bagusan,
lempo, ban kowat. E
settong bakto, Mattasan atokara ban
tatanggana dibi’
se polana nyangka Tramo la-nyala ka binena.
”Terro mateya keng?” oca’ Mattasan
sambi’ matao are’ ka Tramo se jeng-manjeng
neng e per-amperra. Tramo
ta’ nyaot. Matana paggun ngabas
kalaban peggel ka Mattasan.
”Ngadduwa sape?”
Mattasan
ta’ nyaot. Mekker ja’
sapena Mattasan kala bagus
ka sapena Tramo. Pekkeranna posang,
narema’a ban enja’
tantangan dhari Tramo.
Peggel polana nantang carok eoba ngaddu sape.
”Iya, mayu
bila?” oca’na Mattasan kalaban sowara
tenggi. Mattasan saroju’ ka
oca’na Tramo. Mattasan ban Tramo padha maso’ ka
romana. Pekkeranna padha posang, tako’
kala ka moso. Malem jareya, se kadhuwa padha ta’ ngeddha tedhung.
Ker-pekkeran ka sapena ma’le
ta’ kala. Molae lamba’ sapena Tramo ban
Mattasan padha bagussa neng
e Disa Ambunten. Binena
Mattassan ta’ bisa ngeddha tedhung,
neser ka lake polana laggu’ ngadduwa sapena.
”Tedhung, Ka’,”
oca’na binena Mattasan.
”Engko’ ta’ ngeddha tedhung,
ker-pekkeran ka se laggu’,” oca’na se paggun
ju’-toju’
neng ekasorra. Roko’na paggun ngebul.
”Nyoba’ entar ka Buju’
Ke Sanadin, Ka’,” binena
ngusulagi ma’le pekkeranna lakena lekkas tennang.
Molae gella’ Mattasan ban
binena ta’ temmo
enga’ ka Buju’ Ke Sanadin. Malem jareya keya, ra-kera pokol
settong, Mattasan mangkat entar ka tase’. Dhep-ngendhep
entara ka parao se ta’ mangkat
alajar ka tengnga
tase’.
Kabater badha se
nangale ja’ aba’na entar ka Buju’ Ke
Sanadin.
Langnge’
petteng. Tadha’ bulan ban
bintang, katopowan ondhem. Mattasan la dhapa’
ka Buju’ Ke Sanadin. Toju’ asela neng eolona
astana Ke Sanadin. Matana meddem,
colo’na amo’-kemo’ maca’ du’a se mare eajari
Ke Sanadin. Pekkeranna enga’ ka robana
guruna, Ke Sanadin. Enga’ ka lamba’ se
esoro makane sapena se eowan neng e penggir tase’.
Kadhuwana
padha aguru ka Ke Sanadin. Malae Mattasan ngaji
ban ngowan
sape. Pekkeranna enga’ ja’
Ke Sanadin makon ngowan sape badha maksodda. Kalakowanna
Mattasan bida ban Tramo se epakon mandi’i sape e songay.
Laen ban kalakowanna Tramo
se gun esoro makane ajam sabban
laggu.
Tramo
iri ka Mattasan polana ngowan sape. Perna e settong bakto
Tramo arebbu’ tugassa Mattasan. Molae gi’ kene’
kadhuwana jat
lako atokar. Kadhang akor, kadhang
atokar. Tape ta’ sampe’ ce’ peggella. ”Arapa
ba’na Mo, ma’ arebbu’
tang tugas se epakon Ke Sanadin?”
Tramo
ta’ nyaot. Paggun mandi’i
sape ngangguy temba. Mare jareya Mattasan
edina kadibi’
e penggir
tase. Tramo mole sambi nonton
sapena. Mattasan peggel polana tugassa
ekala’ Tramo. Mattasan duli mole ngone’e sadha’
e romana kaangguy ngare’ ka saba. Aganteya
kalakowanna Tramo.
Mattasan
se ngare’ e saba ru-kaburu
polana me’ galluwan
Tramo se ngare’ ban makane sape.
Sadhatengnga dhari
saba Mattasan sajan
peggel ngabassagi sape la akakan. Rebbana
badha.
Mattasan apangrasa ja’ Tramo terro ealemma
Ke Sanadin. Aherra Mattasan
ambu mandi’i sape
ban ta’ entaran
ka langgar pole, todhus
se tatemmowa ban Ke Sanadin.
Maskeya atatangga, Mattasan
ban Tramo ta’ nyapa.
Romana dhep-adhebban.
E settong bakto Mattasan
ban Tramo dhep-adhebban e
jalan. Padha ngabas kalaban baji’. Padha ta’ ngala. Ontong
e bakto jareya badha oreng
se lebat e seddi’na. Mattasan
ban oreng jareya ajalan
abareng polana padha mangkada ka aresan.
***
Pekkeranna
Mattasan ta’ hoso’
sakale. Omba’ eganggu.
Ta’ jau dhari Mattasan
se asela e olona asta Ke
Sanadin badha
nyendhemme. Tramo nyendhemme se
ekalako Mattasan e asta. Tramo
paggun peggel ka Mattasan polana enga’ ja’ se mate’e oreng towana Tramo eppa’na Mattasan. Nyangka
eppa’na Tramo la-nyala ka binena
bakto eppa’na Mattasan majang
ka tase’. Molae
gi’ ngadha’ Tramo
jat peggel. Terro
la’-nyala’a ka Mattasan. Terro
odhi’na Mattasan ta’ nyaman
neng Disa Ambunten.
”Apa se ekalako e dhinna’
ba’na?” Tramo kalowar
dhari pangeteganna. Mattasan ta’ nyaot.
Matana paggun meddem. Colo’na
sajen santa’ amo’-kemo’
maca du’a se eajari Ke Sanadin. Mattasan paggun apal. Tramo jeng-manjeng
ebudhina Mattasan.
Angen tase’ sajan
santa’. Omba’ sajan
tenggi. Se kadhuwa paggun
ta’ aguliyan. Mattasan paggun asela
enga’ gella’ se gi’ buru dhapa’.
”Apa se ekalako e dhinna’
ba’na?”
”Arapa’a ba’na
ma’ rus-urusa?” Mattasan meggelli
ka Tramo. Polana ta’ eanggep badhana, Tramo
ngonjep cethagga Mattasan
ngangguy pattogan. Mattasan paggun ta’ aguli.
Cethagga agili dhara. Mattasan paggun toju’ asela.
”Mateyana engko’?”
”Mon iy, arapa keng?”
”Mara, mompong badha neng
astana Ke Sanadin.”
Ta’ mekker
pole. Mattasan langsung jaga ban
mokol Tramo. Tramo padha mokol
Mattasan. Saleng pokol. Badanna Mattasan
araja’an. Akaton
Tramo kala’a. Tape, Tramo
enga’ ja’ perna eberri’ mal-amalan
ban Ke Sanadin kaangguy teggu ka badan. Tramo partaja ja’ mal-amalan
jareya mandi. Saleng
pokol, maskeya la padha loka.
***
Are
Juma’at
gu-laggu’. Sapena
Mattasan ban Tramo la padha epakalowar
dhari kandhangnga. Se kadhuwana
padha mangkat ka lapangan, ngadduwa sape.
Tape, ta’ jau
dhari jareya, e penggir tase’, oreng-oreng
padha enger ja’ Mattasan
ban Tramo la padha mate
e buju’na Ke Sanadin. Tanangnga pade
nenggu’ pattoganna Buju’ Ke
Sanadin. (*)
Epetthek dhari Jawa Pos Radar Madura (JPRM) eccaban Ahad, 8 Januari 2017
Tidak ada komentar:
Posting Komentar