Carpan Qiey Romdani*
E
SETTONG
are teppa’ malem sennen
e dhalem Kompolan Kokkonang,
Marhasan ngajuwagi
rassa sossa. Sabab
ampon daddi buju’ e pondhugga. Sela
pan-sabarampan taon nyare elmo agama, kera ta’ samporna
mon ta’ eamallagi ka disana. Mustahil, Marhasan ta’ bisa
ngamallagi elmona.
E pondhuk, Marhasan
ekennal alemma santre saengga bannya’ santre
aguru kapenterran ban aguru
tengka dha’ Marhasan. Marhasan edaddiyagi ban para
santre panodan ban pajung kabagusan pondhuk.
Banne ka’dhinto
se adaddiyagi Marhasan sossa. Tape
jau sabellunna oreng seppona acareta ja’ bannya’ oreng menta ekagabaya manto.
Molae dhari tatanggana, kalebun, oreng sogi, tor
laenna. Dhari bannya’na oreng menta, oreng
towana ta’ kaburu
narema’a. Sabab Marhasan
gi’ badha e pondhuk.
Marhasan apangarep bila kalowar
dhari pondhuk
oreng towana
bisa ngarte dha’ pangaterrona asakola’a
pole, banne langsung abakal otaba akabin.
Sabab kadhuwana jalan masamar hajadda
daddiya oreng raja. Tape ngabas kabadha’an
disana ampon daddi lalampan se seppo abakal otaba akabin gi’ kene’.
Marhasan bisa nyekket dhadha ban nyo’on
dha’ Se Kobasa.
”Sake’ ate
sabab edina’agi
babine’ lebbi sake’ pole
kalaban narema lalampan,” ca’na Juha sambi
nyergu’ roko’.
”Apa maksodda, Ha?” atanya-tanya Marhasan.
”Edina’agi
babine’ gampang pabarassa. Bisa
nyare pole otaba masemma’ ka Pangeran, etembang narema lalampan se
ce’ berra’na
etarema ban ate. Mon laen are bisa etarema, jareya
bakal daddi careta se peddhis tor sangsara e
dhalem kaodhi’anna ba’na. Conto,
ba’na epakabin ban babine’
se banne
pangarebba ba’na. Baramma guli atena? Katon korang
parjuga mon sampe’ daddi binena.”
”Mangkana, engko’ ekoca’ kanca
atena ba’na, pas e pondhuk
ba’na nyamana ro’om
tor ekennal alem. Eman-eman sakola pole,
terrossagi nyare elmo ja’ sampe’ mekker
abakala ban akabina. Ta’ usa rek-leregan
ka babine’. Tondhu’i
lalakonna ba’na nyare elmo ban ta’ usa
tako’ ta’
nemmo bine.
Sateya bai manossa abannya’an babine’. Senga
edhing-bandhingngagi settong bandhing
sapolo. Artena, settong lalake’ badha sapolo
babine’ se ngantos. Mangkana, lalake’ areya
emmas se argana larang. Ja’ sampe’ emmas
jareya paorop
kalaban lalampan se ta’ bisa etarema ban ate.”
”Teppa’ ca’na, Juha.
Laban lalampan jareya kalaban pangaterro hajadda
ba’na,”
saot Dul Haddat.
Caca nasehat sajan derres
kalaban oca’-oca’ pangarep.
Ca-kanca Kompolan
Kokkonang ta’ bisa nebbak,
apa bisa Marhasan alaban lalampan kalaban elmona? Gun bisana adu’a
sopaja tengkana Marhasan bisa ngeba kabar se manyenneng
dha’ ate ban pekkeran.
***
Laggu daddi tandha kakobasa’anna
Pangeran. Mata are
nyolbu’ dhari temor aberri’ kaodhi’an
ka mahlok-mahlok bume.
Pondhuk se lakar paten kalaban
lalampan
agamana sajan ramme kalaban sya’ir-sya’ir Abu Nawas otaba ngaji Alqu’ran
ban ketab koneng.
Se laen emo’ kalaban
atoran pondhuk, Marhasan lebbi emo’ ka
aba’ dibi’na.
Tadha’ laen
ata-ranta kaangguy
mole dha’ romana. Sabellunna
mole, Marhasan nyo’on edi’ dha’ keyae pondhugga, Ke Sugambar.
Ce’ berra’na sokona
Marhasan ajalan e lompong nojju dalemma
keyaena.
Sampe’ neng
labang saketheng,
ce’ berra’na pole
sokma ban badanna apanggi sareng keyaena. Rassa ta’ seyap
manabi nenggallagi keyaena se daddi oreng towa
dhalem agama. Maske berra’, Marhasan
eja-kaja se dhapa’a dha’ kaadha’anna
dalemma Ke Sugambar. Marhasan ta’ tao
dhari dhimma emola’ana,
ngetek, sengka, tako’ padha
badha e atena. Marhasan ayakinnagi
pole kalaban mantep.
”Assalamualaikum…” oca’ salam
Marhasan se dha’-adha’. Tadha’ saodan.
Ngolok salam se kapeng dhuwa’,
tadha’ pole. Ngolok salam
se kapeng tello’ pas badha jawaban dhari dhalem.
”Ba’na,
San…” dhabuna Ke Sugambar
se ampon seppo, kalowar
entar ka Marhasan kalaban atongket.
”Enggi,
Keyae…” jawab Marhasan sambi nondhu’.
”Ba`na mon moleya,
engko’ ro’-mantoro’a, ekoca’ ba’na santre alem e pondhuk ediya. Senga’ amallagi elmona. Ja’ loppa
bajangnga ban emot dhabuna Abah,
santre kodu padha ban bellu noro’ jaran,
ja’ sampe’ jaran
noro’ bellu.”
”Kadiponapa ka’dhinto, Keyae?”
”Ba’na
bakal tao bila ta’at dha’ oreng seppona.”
”Enggi, Keyae,” Marhasan tamba nondhu’.
E dhalem atena paggun nya’-tanya’an
dhabuna keyaena se ta’ ngarte. ”Abdi
dalem nyo’on sapora manabi badha kakalerowan
se esangaja tor ta’ esangaja.”
”Iya, engko’ nyapora
dusana ba’na. Tape mon ba’na
andhi’ dusa ka pondhuk
asapora’a dha’emma? Ja’ Abah
la seda dullu ban pole pondhuk
e diya ekagabay kalaban bantowan
dhari masyarakat. Sapora’a
dha’emma ba’na? Kellar
menta sapora ka sakabbinna oreng se abanto pondhuk dhiya
laen pole se la mate. Areya
ja’ daddi berra’na ka ba’na,
pabannya’ asapora dha’ Se
Kobasa ban ja’ loppa kereme patteha dha’ Abah ban masyarakat se abanto
pondhuk.”
”Enggi, Keyae.”
Marhasan ta’ kowasa
namba’ aeng mata se agili e pepena. Marhasan nyeyom
astana Ke Sugambar. Saamponna mare, Marhasan
ajalan adinggallagi dalemma
keyaena. Ke Sugambar arassa kaelangan
moteyara
sowarga pondhuk. Sabab
badhana Marhasan, pondhuk bisa
maju kalaban bannya’ ngenneng lomba.
***
Teppa’ pokol 08.00 Marhasan teba e romana kalaban
senneng tadha’ padha. Sabab
bisa agi-panggi otaba nebbus
kakerrongan dha’ oreng seppona.
E lowar bengkona
katon seppe. Tape e dhalem sowara-sowara
kene’ agarungngong. Marhasan
apekker, badha apa e bengkona? Marhasan
maso’ kalaban atanya-tanya.
”Assalamualaikum,”
oca’na Marhasan mecca ramme daddi
seppe.
”Waalaikumsalam,” jawab sakabbinna oreng.
”Dha’ enja,
San, ba’na lakar earep
dhatengnga ban pamanna,” totor Pa’ Rahmat
oreng towa
lake’na Marhasan. Marhasan asallim ka
sakabbinna oreng se badha e bengkona,
pas toju’ sedi’anna eppa’na. Marhasan alerek
ka babine’ e seddi’na
pamanna. Babine’ se ta’ bisa
elang dhari pekkeranna Marhasan. Sabab,
gi’ kene’ babine’ jariya
lako e-cokoco ban Marhasan. Nyamana Hasanah.
”San, pamanna ba’na
dha’ enja terro nyambunga tale socce se
nganterragi ba’na ban Hasanah nyamporna’agi agama tor ngarebba rida’na
Pangeran,” dhabuna Pa’ Rahmat
kalaban mantep.
”Caepon ajunan..” oca’ pendha’ Marhasan.
”Jariya
oca’ pangarep se
daddi tatanggu’anna engko’ ban
pamanna ba’na,” oca’ Pa’ Rahmat
sambi nyergu’ roko’.
Marhasan ta’ bangal
abanta, e dhalem atena acaca, thaatan
wa ta’dhiman dha`
kapotosanna oreng seppona ban pamanna. Marhasan pasra
kalaban ta’dim dha’ reng
seppo.
Lebbi-lebbi dha’ guruna
kalaban pangarebban derres rida’na
Pangeran.
***
Are se etantowagi la dhapa’. Saminggu marena lamaran daddi tandha nyambungnga
tale socce antara Marhasan ban Hasanah. Marhasan ta’ andhi’ kakowadan
nantowaghi takdir. Marhasan
ta’ nyangka bisa akabin ban sapopona dibi’.
Sapopo se lako eco-koco e bakto gi’ kene’ sateya
la para’ daddiya binena.
Akad elaksana’agi
pokol 09.00. Marhasan ngoca’ kalaban lancar.
Eterrossagi walimatul
’urs kalaban
pamaosan salawat nabi se ehadiyagi
sareng guru langgarra Marhasan tor etotop kalaban du’a
sareng Ke Sugambar, guru
pondhugga. Saamponna gubar, Ke Sugambar
maso’ dha’ kamarra
Marhasan kalaban tojjuwan terro atemmowa
dha’ santre kasenengnganna. Marhasan ngabas Ke Sugambar
badha eadha’anna labang.
Marhasan ban binena nyeyom
astana Ke Sugambar pas manjeng,
tandha kahormadan.
”Ba’na
bisa ngamallagi nasehadda Abah. Engko’ gumbira
andhi’ santre ba’na,”
totor dhabuna, Ke Sugambar
kalaban agellu’ badanna Marhasan.
Marhasan ta’ kobasa
ngabas tengka gulina keyaena. Aeng
matana nyapcap.
”Aponapa maksodda,
Keyae?” oca’na Marhasan
kalaban ngoladi salerana Ke Sugambar.
”Bellu
noro’ jaran artena ana’ noro’ oreng towa. Sabab
jereya se
bakal daddi tandha toronna rida’na Pangeran. Parebasan
jareya
sakone’ etoro’ ban
na’-kana’ sateya. Sakeng penterra la ebalik
daddi jaran noro’ bellu. Oreng
towa noro’ ana’. Sabab
jareya ngonjang
dhukana Pangeran. Tape engko’ gumbira andhi’ santre
se ta’at dha’ oreng towana
ban guruna,” nasehat Ke Sugambar
kalaban maserret gellu’an
dha’ badanna Marhasan.
Marhasan ban binena asojud
ta’dim nyeyom
padana keyaena tor ta’ loppa Marhasan maccoe padana kalaban aeng. Pas
aengnga eenom kaangguy ngarep barokana tang
guru.
Bakto terros
ajalan. Olle sataon Marhasan se akabin.
Kalowargana sajan are tamba rokon. Ta’
padhana ca-kancana se laen, tamba are
nambai atokar ban atellak. Hasanah andhi’ ana’ kembar
lalake’ se anyama Dolala
ban Dolali. Ampon samporna kalowargana Marhasan tor ta’ loppa Marhasan
asokkor dha’ Se Kobasa atas papareng se raja se ta’ bisa
ebelli kalaban dunnya ban essena. Samoga’a
daddiya kalowarga sakina
mawaddah warahma salanjangnga. (*)
Pondhuk Biru,
2017
*Siswa kelas XII-Agama/1 dan
santri PP. Nasy’atul Muta’allimin Gapura Timur, Gapura, Sumenep. Aktif di Tunas
PPGP, Asap, Gemma Taruna dan Pegiat Jurnalistik Para Kokkonang.
Tidak ada komentar:
Posting Komentar