Bulan Rejjeb

Carpan Ma Leo*

MASKENAH seggut epaenga’ kaangguy bisa apasa neng bulan Rejjeb nyata ta’ bisa ngoba dha’ pekkerra Mahmud. Aba’na apangrasa apasa coma mowang bakto ban adaddiyagi korang somangat dhalem lakona. Maske epaksa bi’ oreng towa ban la-balana, paggun ta’ bisa ngoba pangaterrona.

”Lebbi bagus noro’ kanca entar alan-jalan etembang aba’ lapar malolo. Senneng ban pastena ta’ kera posang. Sabab badha e roma coma mabusennan,” cacana kalaban enteng. Oreng se ngedhingagi coma bisa akedha’ ta’ ngarte pangaterrona Mahmud.

”Apa salana oreng apasa? Nyatana bannya’ se ekaolle dhari kalakowan jareya. Salaen ganjaran, ba’na bisa ajaga dha’ pangaterrona napsona. Eman-eman, Cong, sateya ba’na laggi’ ngodha. Omor reya tadha’ se tao ja’ bila dhatengnga,” Man Ridwan nyoba’ maenga’ dha’ panakanna.

”Sengko’ mon gun coma ganjaran bisa ekaolle bakto bulan Ramadan, Man. Ta’ usa pot-repot apasa bakto sateya,” Mahmud ta’ terro kala aberri’ katerrangan.

”Tape sateya bida, Cong. Neng bulan Rejjeb reya labangnga pangapora ban rahmatta pangeran ebukka’ lebar. Husussa e tanggal se ngadha’ otaba neng tanggal petto lekor. Daddi pongpong sateya duli lakone. Sengko’ ngedhing ba’na bannya’ dusana, seggut car-pacaran, nepo oreng bannya’, ban ta’ matennang dha’ oreng towa dhuwa’na,” kalaban jarna’ Man Ridwan paggun malae.

”Addhu, Man, dina la-bila bai. Sengko’ sateya ta’ andhi’ pangaterro sakale se apasa’a.”

Ropana Man Ridwan ta’ bisa maksa pole. Coma raja pangarep kacongnga bisa ngoba pekkerra. Eman rassana bila bulan Rejjeb se talebat agung pas ta’ eesse’e kalaban kalakowan se aguna. Napapole sampe’ raja ganjaranna.

Mahmud paggun bai nerrossagi kalakowan se sal-asal. Apacaran ban babine’ dhari disa tatangga, nyamana Maimunah. Maskena elarang bi’ reng towana teptep ta’ bisa ngoba dha’ pangaterrona. Ampon daddi gantonganna ate se lako dhateng sabban malem. Adaddiyagi tedhungnga ta’ ngeddha, ngakan ta’ nyaman rassa. Sabab pekkeran alengleng se ajang-bajangan dha’ ropa manessa Maimunah.

Sabban malem Ahad, pastena Mahmud ngeba se bine’ dha’ Taman Bunga abareng sakanca’anna se padha ngeba pacar bi’-dibi’ sebang. Neng-sennengngan sampe’ malem. Aberri’ jajan ban sakabbina pangaterrona se bine’ etekkane bi’ Mahmud.

Ta’ mekker pessena se dhari reng towana ollena dhari pello koneng se ajemmor neng panassa are. Ta’ bu-ambu sabban arena. Napapole masala dusa, jellas ta’ perna eken-reken dhalem pekkerra Mahmud. Seggut ta’ maso’ sakola’an. Sabban malem lakona coma ngokor lorong ka bara’ ka temor.

Epamondhuk sampe’ ngabi’ lema pondhuk. Gaggara ambu kalaban alasan ta’ perna ban seggut ke’-sake’an. Saenggana reng towana coma bisa pasra dha’ramma pamanna se anyama Ridwan bisa maenga dha’ ana’na se coma settong.

Laen mon masala kata’jujuran, Mahmud la biyasa ngalakone dha’ oreng towana. Ngabala entara asakola, nyatanah amaen ban pacarra sampe’ ta’ maso’ sakola. Ngabala entara ka masjid, nyatana dhung-tedhungan neng romana kancana.

Omorra ngodha, ra-kera dhupolo taon. Tape kamellerranna ce’ sarana. Seggut napet dadha oreng towana bila ngedhing ana’na ne-banneyan dhalem lakona.

Ngabassagi kanyata’an se badha, pamanna seggut maenga’ dha’ramma Mahmud bisa ngalakone pasa neng bulan Rejjeb. Kalaban pangarep bulan Rejjeb bisa ngoba dha’ pekkerra ban kalakowan se ta’ genna.

Kateppa’an sateya dhapa’ tanggal tello lekor. Artena, akare pettong are bulan Rejjeb bakal agenteya dha’ bulan Sya’ban. Pas terros dha’ bulan Ramadan. Tape paggun ta’ bisa. Pamanna sampe’ ta’ kowat mekkere panakanna.

Namong teppa’ bakto malem Juma’at baktona mole dhari alan-jalan. Ta’ eka-sangka Mahmud kateppa’an ngabassagi kancana etabrak bus mini se ta’ temmo dhatengnga. Nyabana ta’ bisa esalamettagi. Mate neng kennengnganna abareng ban babine’ se ekabareng.

Rassana tateggen mata tor pekkerranna Mahmud bakto ngabassagi kancana se mate. Asapo’ dhara ta’ kabilang banya’na. Marenges rassana acampor neser ban tako’. Dhalem bakto se abareng Mahmud enga’ dha’ cacana Man Ridwan.

Rassa kasta ban sokkor agulek dhalem dadhana. Kasta sabab aba’na seggut ne-banneyan ban rangrang enga’a dha’ parenta Pangeranna. Asokkor badha kasempatan kaangguy mateppa’ dhalem ngoba pekkeran tor kalakowanna.

Molae kadaddiyan neng malem Juma’at. Mahmud ajanji terro ngoba’a kalakowanna. Babine’ se daddi pacarra epotos hubunganna ma’ le bisa manyettong dha’ parenta Pangeranna.

Teppa’ neng malem Juma’at Mahmud terros aneyat kaangguy apasa’a kalagguwanna. Kateppa’ann tanggal petto lekor. Tanggal ban are se bannya’ kaotama’an ban ganjaran se etoronnagi sareng Pangeran se Kobassa. (*)

*Mendampingi Komonitas SASTRA PP. Raudlah Najiyah.

(Epetthek dhari: Bulan Rejjeb)