Malappae
Parebasan
bila ngabas robana bulan
sanajjan satengnga pornama e bunter tanggalla
ate takennyer
nyergu’ ro’om dhari okos ngerbay e sabban barna
pajat ekangarte
bila tanggal towa, bulan tamba nyellem
atamba anggur ngater sagembilan seddha’ paraban
ate takebba’
ekeppay kalembang sowarga; ngalotor dhari
tondhun pornama daddi tongkolla eber
sanajjan ekatao dhari ponca temor engga olo bara’
saongguna barna celleng e roba bula ta’ magujur
parembagan seddha’
tape pon daddi buja-buja alos
malappae parebasan dangnga’
Jogjakarta, 1432
...............................................
Alamar Dika e Penggir Songay Kene’
gili aeng songay kene’
nyarepsep dha’ obu’ satengnga pote
e penggir cethak dika
cellep oca’na dika
tape anga’ koko oca’na sajja
karena barna paeber pajat aronggangan
gili aeng songay kene’
narabas kajuan, ramo’-ramo’ pandhan
engga ngekes bun-tabun karodheggan
se nyekkel gilina pangeka’, e le’er taresna
pajat ta’ santa’ gili aeng songay kene’
tape sarpa bakal alangngoy noro’ langngo
ngonjak aeng, sampe’ baliker kaosap
ban para’ sakabbiyan sajja egiba dha’ gellung ate dika
Jogjakarta, 1432
...................................
Canggana Dhadha
gujur dhadha, tadha’ kellar daddi cangga
sanajjan canggana bala; taleyan bacca
bila dhadha ta’ kellar ajaga pelar
sanajjan satellor paste ancor
akar-tambikar, abauwan; pegga’ taleyan
gujur nagara emolae dhari gujur dhadha
ta’ kellar ajaga pelar-pelar ala-bala
ta’ katator, cator-cator roga dhalem balekaddha
19 Sawal 1432
.......................................
Selbadda Tolang
tolang e pinggir dhadha salaja elang
gaggar dhalem parjalanan
”jareya daddi pameggan tampar taresna”
oca’na settong oreng se obanna meltas-meltas
e sareya dha’emma kerana
malle jalan reya ta’ ginjat
karana tongket banne gun nyangga
tape se nuduwana cangkana jalan
sampe’ dha’ alas-alas raja ajaja
ajajarba’agi pangesto dha’ tolang selbat
e sareya kantos patedhungan
padaddiya pakona ca’-ranca’ dhalem sampan
Songennep, 10 Takepe’ 1432
Alumni MTs-MA Mambaul Ulum dan UIN Sunan Kalijaga
Jogjakarta. Penulis buku Embi’ Celleng Ji
Monentar.
(Epetthek dhari Jawa Pos Radar Madura eccaban Ahad, 23 April 2016)
Tidak ada komentar:
Posting Komentar