Sa’ima ban Ladding Dhapor

Carpan Fathor Rozie

DHARA nyarcar e palesteran romana Dulsari ban Sa’ima. Pokol 12 malem e romana Dulsari seppe. Apapole se badha e roma jareya gun kadhuwa’an. Iya areya Dulsari ban Sa’ima.

Teppa’ e malem jareya badha enger sakejja’ gi’ bari’. Tape sateya seppe lantaran badha oreng mate e dhissa’. Dulsari la tadha’ nyabana, ladding noccek e dhadhana se lebar. Dhara gan sakone’ paggun agili, kaloar kabbi. E seddi’na Dulsari, Sa’ima ju’-toju’, nondhu’ sambi  nyaressebbi odhi’ se ta’ bisa earep bagus pole. Sabab aba’na ngalakone dusa se paleng raja. Iya areya mate’e Dulsari, lakena.

Kalaban makowat rassa e ate, Sa’ima jaga on-laon. Nolong salemot se badha e kamarra bagiyan lao’. Ta’ abit badanna Dulsari ebundu’ salemot barna pote. Salemot se gella’ pote aoba barna daddi mera. Ecapo’ dhara se ta’ gellem ontas dhari dhadhana Dulsari se loka ecapo’ ladding.

Kalaban ta’ mekker pole, salemot se aesse Dulsari eteret kalowar, ka budhiyanna romana. E dhissa’ badha lobang ta’ pate dhalem. Coma cokop mon pera’ badan oreng kadibi’. Lobang se anganga epaksa epangontal Dulsari sanaossa gi’ ambu cetcet. Etotop kalaban tana ban dhaunan memba. ”Malle tadha’ lampadda,” sajjana atena Sa’ima.

Samarena maelang lampat, Sa’ima maso’ ka romana amarga terro ngelangngagiya karena lampat se gi’ cekka’ e lesteran. Otamana lampadda dhara otaba bau ames se nyerga’ ka elong.

Saellana mare kabbi. Totok. Samarena lesteranna ekorae ban esambur kalaban ebarengnge sabun, Sa’ima maso’ ka dhalem jeddhing ban ngossowe ka sakabbinna kalambina otaba dhara se gi’ cekka’ e badanna.

Sambi ngampet rassa ngoso’ ban rassa kasta, Sa’ima mandhi kaangguy matennang pekkeranna se serbek. Ra-kera kol satengnga tello’ Sa’ima kalowar dhari jeddhingnga ban maso’ ka kamarra kaangguy tedhung.

”Me’ pola saellana sengko’ tedhung bisa loppa dha’ kalakowanna sengko’ se ella kalebat ban maelang dha’ sakabbinna rassa kasta,” Sa’ima ongga ka kasor terros ngoddi mameddem mata se ella ellep ekakan bakto.

***

Pajjar ngombar dhari temor. Angen ngalesser terbas ka romana Sa’ima. Rassa cellep nyaressep ka dhadhana. Sa’ima jaga kalaban mowang rassa lempo e badanna ban terros maso’ ka jeddhing kaangguy araop, sabellunna ngalakone kaparlowan laenna.

Samarena araop Sa’ima akaca e seddi’na jeddhing. Ngabas mowana se raddin. Kalaban karena lipen e bibirra se attas ban se baba. Beddha’ la lontor sabab malemma mandhi karana ngelangngagi dharana Dulsari. Kalaban paggun ngabas ka kaca, aba’na mesem ta’ padha ban biyasana. Kadhang mowana mellas enga’ dha’ dusa se elakone.

Bakto badha e adha’na kaca, pekkerra Sa’ima ajalan, nyalapsap, ngen-ngangen apa se ampon talebat. Nyeressebbi andhi’na, ropa, badan se amodil, nyombungngagi sakabbianna se badha e badanna.

”Sengko’ lakar raddin. Daddi ta’ sala mon bannya’ terro ka sengko’,” oca’ dhalem atena kalaban mesem tanggung dhi’-andhi’na molae lamba’ gi’ paraban.

”Senga Dulsari ta’ arosak kaodhi’anna sengko’, se paste ta’ kera cara reya. Tape Dulsari arosak dha’ sakabbinna mempe-mempena sengko’ se eajum kalaban ken-pareken se ella mapan. Huhhh.” Oca’na pole e atena kalaban mowana mera ngampet rassa ngoso’ ka Dulsari se sateya la badha e alam kobur.

Pekkerra Sa’ima alangngoy ta’ nemmo dhappor. Ta’ ekarassa pekkeranna dhapa’ ka careta lamba’ se juba’, se madaddi emmas se paleng arga e aba’na lobar ekala’ lanceng ta’ dhappor. Bakto samarena noro’ pangajiyan e bara’na romana. Sa’ima mole ban Dulsari lebat e pettengnga jalan. Teppa’ e tengnga jalan e adha’anna gudhangnga roko’ se la abit ta’ eangguy. Kateppa’an lampuna mate kabbi. Dulsari abarangko Sa’ima dhari budhi kalaban tanangnga salaja notop colo’na.

Saellana enga’ ja’ Dulsari lakar orengnga soga’, mon pera’ ngeret Sa’ima ka gudhang, parkara gampang. Saengga Sa’ima coma nanges ngabas kalakowanna kancana se molae gi’ kene’ abarangko aba’na ban gan sakone’ mokkale kalambina, sampe’ tadha’ pole kaen se notobi badanna se ngornyang. Sa’ima tako’. Apapole Dulsari sampe’ nyancam mateyana mon sampe’ acerreng otaba akowang.

Ta’ abit Sa’ima coma pasra. Ngabassagi Dulsari ngaloskos badanna. Ban ngelangngagi kapartaja’an ka Dulsari se bengnges ta’ tao ka tengka. Tengkana para’ padha ban keban se ta’ tao e dhimma bidana bagus ban juba’.

Bintang nojjek ka badanna Sa’ima sampe’ aserro ban nanges amarga dhara socce kalowar dhari lobang se ta’ paraban pole. Dulsari alako kalakowan bengnges dha’ aba’na. Aep se paleng raja.

Saellana mare, Dulsari adina Sa’ima kadibi’an e seddi’na gudhang e seppena, saengga Sa’ima mole ka romana saellana notobi badhanna, kadibi’. Sadhapa’na ka romana, Sa’ima eamba’ oreng towana kalaban tacengnga’ saellana Sa’ima nanges.

”Ma, ba’na arapa ma’ nanges le-molena dhari pangajiyan?” tanyana oreng towa lake’na ka Sa’ima.

Nangessa Sa’ima sajan daddi saellana etanya’agi oreng towana. Sambi nanges Sa’ima ajellassagi sakabbinna se ealame. Oreng towana gun ngok-malngok ngampet aeng mata. Sabellunna nyengla, Sa’ima terros maso’ ka dhalem kamarra. Sa’ima nerrossagi tanges ka kamarra ngaenga’e kadaddiyan se buru. Pekkerra arassa ta’ partaja saellana enga’ ja’ Dulsari areya kancana molae gi’ kene’ ban gi’ sabala’an ban oreng towana.

***

Dhuware abidda Sa’ima epakabin ban Dulsari kalaban paksa’an. Saellana oreng towana  Sa’ima todhus mon sampe’ ngandhung tadha’ lakena. Pole, rassa tako’ ekaedhing tatangga. Ancor, ngalotor ngen-angen Sa’ima kaangguy arangke’ odhi’ se bakal dhateng kalaban padha ban se ekaterrowe. Teppa’ are Rebbu bulan Sora kol ballu’ malem, Sa’ima la essa daddi binena Dulsari.

Salanjangnga Dulsari ekapolong, Sa’ima lako nanges sabban malem. Apapole Dulsari lako agigir. Sabban malemma e romana Dulsari ban Sa’ima lako enger polana tokar. Tokar se kalowar dhari masala se ta’ patot. Etambai kalaban Dulsari lako mole malem ban kadhang kopengnga Sa’ima ngaedhing oca’ se ta’ manyaman aba’na.

Dulsari ca’na lako abareng ban reng bine’ laen e lowar. Le-molena Dulsari paste lako mabu’ ban kadhang robbu e adha’anna labang. Saengga rassa ngoso’ ban baji’ ka Dulsari tombu e atena Sa’ima ta’ kabitong.

Teppa’ are Salasa romana Dulsari enger pole. Tokar daddi. Sampe’ Sa’ima mateya polana ecekkel. Sababba ngarane Dulsari ban oreng bine’ laen. Sa’ima ecekkel. Rassa ta’ kowat pole Sa’ima taneggu’ dha’ laddingnga dhapor se molae gella’ badha e seddi’na. Ta’ ngantos bakto pole ladding etemmo etoccekkagi dha’ dhadhana Dulsari.

***

Sa’ima jaga dhari mon-lamonna. Atena sateya tamba serbek ban dunnya katon petteng tadha’ alasan. Kalaban ta’ mekker pole Sa’ima ngabas ka ladding se buru mare ebacco se badha e adha’anna. Matana mancella’. Badanna rassa possa’ kalaban setan. Pekkeranna la ta’ bisa ker-mekker bagus pole, saengga ta’ abit ladding najjek e le’erra Sa’ima. Dhara nancel ban agili, Sa’ima robbu. Mate kalaban ladding nojjek e le’erra. (*)

*Lahir di Jadung, Dungkek, Sumenep. Sedang mengemban sebagai pengurus perpustakaan Pondok Pesantren Annuqayah Lubangsa Selatan.

(Epetthek dhari: Sa’ima ban Ladding Dhapor)