SONGENNEP – Maca puisi ta’ koduna e
panggung tor neng e acara raja. Maske di kennengngan se ramme maca sanja’ juga
bisa. Buktena, polowan ngangodhadan dari Masyarakat Santri Pesisiran (MSP) giliran
maca puisi neng e Taman Bunga (TB), malam Salasa (13/7) se tapongkor.
Maca sanja’ e rammena tanto daddi
tetenggun monggu oreng bannya’. Sabab, kapprana, kennengngan paneka bannya’
oreng bu-ambu. Reng-oreng dhari pan-saponapan kacamadan adhatengan kalaban
bannya’ tojjuwan. Badha se le-melle kaparlowan tellasan, badha se ngater na’-kana’
amaen, tor badha se gun nganggal sakanca’an.
Nangeng, e malem paneka badha se bida. Ra-kera
tello polo ngangodhadan akompol padhana oreng atahlil dhalem acara ”Saebu Puisi,
Saebu Bulan Kompolan Maca Puisi”. Sala settong dhari ngangodhadan paneka badha
se manjeng. Neggu’ dalubang, ban badha se neggu’ gitar.
Kadhang badha se aorak, kadhang badha se
acerreng, ban cem-macem tengka se laen. Bang-sebangnga oreng giliran maca
puisi. Puisi se ebaca ta’ koduna andhi’na dibi’. Saamponna paneka pas nyator
ararembak ngengenge kasenniyan tor
kabudhaja’an. Sala settongnga kaparduliyan pamarenta monggu seniman.
Mahendra notorragi, akompola
ngangodhadan paneka dhari pan-saponapan komunitas
otaba sanggar. Sadajana gadhuwan
panglebur se padha dhalem maratene kabudhaja’an. ”Biayana, ca-kanca akompol
sabulan sakaleyan dhalem Kompolan Ahad Kalebun le-ngalle dhari settong
kennengngan ka kennengngan se laen,” oca’na.
Hendra ngarep kalaban akompol bisa
numbuwagi kaaddrengan dhalem maca ban nganggit puisi. Salaen dhalem basa
Indonesia, jugan bab basa Madura. Dhalem
papanggiyan paneka juga badha se maca sanja’ Madura. Akadi Lukman Hakim
AG tor Mohammad Toyu. (kim)
MACA: Sala settong angguta kompolan maca puisi. (Foto: Khalil Tirta) |
LEBUR: Mahendra maca puisi e adha' angguta kompolan di Taman Bunga. (Foto: Khalil Tirta) |
NGACENG: Latif Atmaja maca puisi. (Foto: Khalil Tirta) |
PADHA LEBUR: Polowan ngangodhadan dhalem kompolan maca puisi e Taman Bunga (TB) malam Salasan (13/7). (Foto: Lukman Hakim AG.) |
Tidak ada komentar:
Posting Komentar