Pengeran Katon

A. Rahem Umar

Tareka ka’dhinto esto nyomber dhari ehlas

Bagiyan dhari odih’ bunga tor mellas

Nangeng dunnya daddi tera’ marga ajunan dalem, Towan

Aburuk Qulhu jugan Patteha

Elmo Allah aropa sagara

Se nyapcap dha’ Ate se lebar tor sabbar

Mama’, Embu’, Guru, ban Rato

Ajunan pangeran se ngaton

Dhu, Mamak, Dhu, Embu’

Omessa ajunan ta’ kabitong

Paggun nyelbi’ maske e nemor kara

Maske soko aropa kerres

Nataki tana se cala jugan malas

Naleka aba’ sasarengan dhimin amaen

E mengkang e babana tera’ bulan

Lit-calilit lembung pappana lun-alun

Ana’ rato kalowar tombung giggi’ macan

Bibir tamesem bunga ta’ aromasa

Jaman aher ampon kalampa aba’ laju loppa

Dhu, Guru

Kamongging temor nyopre are moncar

Mongging bara’ ngamba’ are compet

Akadi angen ngebbas abu

Ate jareppen taseram Patteha-Qulhu

Toggal alip dhates a, ba’, sin bawa bis

Bismillah kaator bakte saomorra

Monggu rato se majunge salamet

Panggunan sadaja se talempet

Ajunan asoca ebbun

Abaris ahlak ta’ atabun

Rato settong tonggal patot

Ngadek sodek parjuga

Ngatore semba nengkong

Soko nonggal abirit salawat se ekapolong

Sumenep, 26 Desember 2005