Tangteng

Elyas Abdu

Lebbi nyomo dhara se moket sompa
Esolam rote’ garigi’na
reng se agaluy odhi’ e celbana tase’
Sakeng pangoreban ngampar sordhep
Agaluy ongkeppa angen se nanges kasar e garrungan

Dhu, tombuna pangarep ngampe kerreng
Marempa’ sokma ban garis ojan

Odharra roba gumbira
Gun ngales kadiya okara pangapos
Gulina sokma paggun daddi mowara
Sanaos ames-accen gilina dhara
Sabab porca’na bakte
Alos nyosop malepor ate.

Cengkareng, 2015

Jaran Gujang

A. Rahem Umar

Ka temor mapaga are moncar

Ka bara’ nyandha’a are compet

Mekol nyo’on nengteng taresna se talebat

Tabatbat ate ebatbat labun se pote

Taresna neko, Ale’, nyelbi’ dhari sokma

Epekker kadhang kalowar dhari kappra

Kerrong se ta’ katamba’

Esto se ta’ kasaba’

Pacca’ paccung buwana jate

Bula ngaji, ajina jaran gujang

Sa’ang baringsang

Maranga’ marengngo’ sang-tasangsang

Hup way, mentha’ sokalillana Qulhu songsang

Qulhuwallahu ahad Allahusshamad

Menta posang, posang

Teka posang, posang

Menta ngalengsang, ngalengsang

Teka ngalengsang, ngalengsang

Ngalengsang posang

Dha’ atena bula

Bi lailaha illallah muhammadurrasulullah

Songenep, 260608

Can-bacan 1

A. Rahem Umar

Are Kemmis sorop are

Ngalemba’ sokma ate

Pekker ngalabang ta’ re-mare

Dhari mongging lao’ nyarowap bau malathe

Dika ale’ maddha dha’ento

Roba manes akadi massa’na pao

Bula kerrong pekker ta’ nanto

Marga enga’ dika settong se abibir cao

Mata morka’ asella paka’

Ales leres tanggal empa’

Obu’ celleng pale’ katopa’

Areba maddha pasepa’

Bismillahi neyat ngamba’ fulan

Bismillahi qulhu songsang

Sa’ang baringsang

La’as malas

tasangsang malang

Lorga eenome la’ang

Menta posang laju posang

Mon ta’ posang dika palang

Hup way!!

Songennep, 12062009

Baburugan 1

A. Rahem Umar

Dha’arragi neko’ nangka

Tes-ngarettes dhaun saga

Dhu, onggu tako’ bula ka naraka

Sakeng ta’ pantes bula e sowarga

Dhaun jate dhaun tarnya’

Gaggar ngalotor ta’ jau dhari babana

Mesken ate mesken dunnya

Jau dhari Allah odhi’ katon ta’ aguna

Ngampar lama’ e penggir bato

Mon ta’ mendhang ngampar dhaun jate

Maddha lampa’agi se lema bakto

Gabay sango pagi’ e Ajunan Guste

Entar ka Songenep lebat Nyapar

Pamolena nyempang Ambunten

Maddha pabannya’ maca salawat-istighfar

Insya Allah ate tennang, ate tarentem

Pangkeng Seppe, Songennep,  270608