Gu’-ganggu’

Carpan Mat Toyu*

OJAN derres molae gi’ rebbeng. Ekaedhing monyena guba. Sobbu pon dhapa’ ka baktona. Badha abaladhas mangkat ka jeddhing. Badha keya se ngeret sapo’na. Terro maanga’a cellebba. Badha keya pon agangse pangerradda. Mangkada nae’ tarebung. Badha kapekkeran ka sabana se bakal possa’ kalaban aeng. Badha se perak, teggalla bakal lembu’ esaka’.

”Mon cara neko lecen se nae’a.” Marena agangse pangerradda ka pekolanna, aba’na ta’ akalambiyan. Ngello’e roko’.

”Dina bu-ambu gallu. Pera’ ta’ nae’ sakaleyan. Paggun bisa ngakan. Jagungnga kare agilis. Ta’ kera kose abit agilis jagung, paleng pon sapatareddebban pon mare. Sampeyan tedhung gallu napa, malle ta’ atamba berra’ ganeka elongnga. Elong gunna ngot-serngodan. Ja’ senga ambu gallu ta’ aroko’,” sowara ganeko pendha meltas-meltas ngette’a.

”Ma’ dika. Aneko cellep. Mon ta’ egiba aroko’ balakkadan sajan lesso entara nae’,” ebajar kalaban sowara se meltas dhari jilana. Copana nampes e koncon’na jilana. Tatabbra’ ka bibirra.

Sanja’na Ilalang Kirmizi

Sowarga Gaggar e Madura

Omba’ se nonton juko’ ka jaring

Maddhai mesem dhari oreng se ajurung

Bato karang se atapa ngamini du’a;

Moga teptep jembar bine-ana’

Padhi-padhi ngakoneng

Nyaenge emmas se bannya’ ekala’ oreng,

Mano’ se ngabber padha mesem

Mokka’ sabigi padhi akantha rajana accem

Lake’-bine’ ngombar kajembaran

Towa-ngodha senneng agella’an

Tadha’ somber kasossa’an;

Malem kennyang

Gu-laggu ta’ posang

Madura akantha sowarga

Songay se agili ngeba juko’ raja

Sampe’ aeng daddi buja

Bula neptep neng e Madura

 ...................................

Sanja’na Hasmidi

Bajang

Sabab lente ta’ coma biteng

Ngajum bukka’na badan

Anganga.

Sambi reng-mereng ngarassa’agi

Cellep ban panas epasettong

Epangetek.

Saraos lente egiba ngaleleng

Ngancae embanan neng bau

”Sakabbiyanna se alos olle mole

abali abali abali

nyengla dhari jalan jalan”

Reya peccot, neng konco’na nongko’

Duwa duwa

Kalaban sirr

Nyegga samar nyalembu

Sekep mowang tajem dhari besse

Pamorra dhateng daddi pangae’

Raja

Mangkat tera’

Mole tera’

#kenne’nanges

#daddidiyen

Songennep, 24/03/2016

Epetthek dhari Jawa Pos Radar Madura (JPRM) eccaban Ahad, 10 Desember 2017

Abakala Sumarni

Carpan Noer Hamima

E BARUNGNGA Nye Suranti se badha e penggir saba, Karso ban Sumarni toju’ ajajar ngabas tatamennan se raja, binis se la biru, ban bungkana perreng se ekebbat angen. Bungkana tarebung, nyeyor, ban memba se aliyu’ ekebbat angen daddi sakse ja’ saongguna dhat-ngodhadan se kadhuwa reya padha andhi’ rassa pangesto se dhalem. Pangesto se agabay kadhuwana andhi’ pangaterro odhi’ abareng saomorra.

”Le’ Sum, dika kodu parcaja dha’ bula. Bula senneng tor neser onggu dha’ dika. Dika ta’ usa tako’. Bula ajanji ta’ bakal masossa dika saomor odhi’na,” lemma’ manes oca’na Karso, abalangaja madaddiya Sumarni parcaja.

Sumarni padhana se todhus. Mowana mera, bibirra sem-mesem tanggung, ban tanangnga atel-buntel kodhung koneng se eangguy.

”Bula banne ta’ parcaja, Ka’. Tape bula tako’ badha oreng laen se dhateng ka roma alamar bula. Bula yakin saompama badha oreng alamar bula, emma’ ban eppa’ tanto narema. Sabab, oreng towana bula pon ce’ terrona andhi’a manto,” sambi nondhu’ Sumarni ajarba’agi katako’anna se badha dhalem atena.

Sanja’na Ra Mamber

TERA’NA DAMAR

-Sasemba’an dha’ KH. Ahmad Basyir AS (Alm)

Rassa agung ta’ nyokobi sadaja parebasan

Ngoba barnana kaodhi’an

tera’na damar nera’e jalan se lanjang

nonton manossa dha’ ka tojjuwan.

Tape, mangken damar ganeka ampon ta tera’ pole

pasera se bakal nonton manossa dha’ tojjuwan

manossa posang ngalengsang tor sossa dhalem kacalemodan.

Sanaossa damar mate

gi’ badha pangarep odhi’ pole

salanjangnga omor gi’ akare

moga’a damar gi’ bisa nyonare.

Nuvilu.grujugan, 2017

.............................

KERRONG AGALUY DHADHA

-dha' Ebu, Rama

Enga’ dha’ ojan se gaggar e genteng roma

sowarana akadiya ojan malem mangken, Ebu

taneyan lanjang paddhang e mata

aeng agili aoba ba’a dha’ saba, agaluy dhalem dhadha

Parenta tedhung kalaban salemot samper

amarga panotop cellep sabadan

jugan oca’ rama sopaja ta’ loppa dha’ se kobasa

daddi sango e sabban tedhung seyang malem

Ojan malem mangken, Ebu

nandhai kerrong, e tana pangabdiyan

sabab abulan-bulan ta’ apolong sabala’an

Lubangsa, 2017

....................................

PELLO KONENG EBU MADURA

Saamponna ojan gaggar re-saare

reng tane jembar araksa bume

mekol pangonong sape etonton ngakalonnong

pello ngalecer ecampor ban ojan nambara’

sapasang sape epanyaka’ saba

tana egaluy rebba elempet

peccot ngaceplas ”ja’ li…li…..”

ngangsor sape epaksa kalaban rassa

sopaja kellar epananggala

sabab binis ampon ejajar e tabun-tabun

reng-oreng dhateng areng-bareng

atatamen balangaja e tengnga saba.

Annuqayah, 2017

..........................................

NGAJI RASSA

E dhalem pondhuk,

eantarana pornama se gi’ buru ngombar

oreng-oreng arassa jembar

saellana bulan Molot gaggar dhalem badan

ngaji rassa se ampon eatorragi dha’ se kobasa

ate asalaman asapora’an.

nyambung odhi’ dhari paste se ta’ paste

moga apolong dhalem sowarga dunnya, akherat sampe’ mate.

Annuqayah, 2017

...................................

Sanja' paneta epetthek dhari Jawa Pos Radar Madura (JPRM) eccaban Ahad, 3 Desember 2017.

Malappa’ana Mano’

Carpan Mat Toyu*

LALAKE’ ganeko lebur ka mano’. Dhung-ondhung are. Tenggarra pon epekol. Aba’na nojju ke bara’. Nyare mano’ kaangguy etenggar. Are sanonto nenggara mano’ kaangguy epa-lappae, pas ejulida kalaban buja cabbina. Malle pendha seddha’ ban dhis-peddhis ngopenes dhalem rassana.

Lalake’ ganeko alebati bungka’an se pon kare buntegga. Bungkana jate ban bungkana kornes pon bannya’ se poret. Buh mon laju akare ramo’na, pas tadha’ se atamenna bungka’an pole, ya ta’ kera badha bungka’an pole dhalem pan-barampan taon.

Karettegga lalake’ ganeko ngabas tek-buntek se pon nyaropo’. Sanajjan aba’na gi’ bisa arassae naong karana epajunge dhaun-dhaun. Tape rassa ojang pon ekarassa eman-dhimman. Dhari sakeng panas kaodhi’an, bannya’ kadebbung banne gunna sakadar bucco’, tape kerreng.

Pan-barampan taon se tapongkor, bungkana geddhang garowa ta’ kose kerreng parana. Tape gunna elop ban bungkana gi’ badha badhegga. Badha cellebba bila erama’ tanang. Tape sanonto, bannya’ bungkana geddhang, se laju kerreng ngathak e bungkana. Akaton ta’ kowat nahan kole’na dibi’. Ja’ senga bisa akowak, yaktena bungkana geddhang ganeko wak-kowagan menta aeng.

Sanja’na Saif Koher Bagandan*

Nyare Elmo

Mompong gi’ pajjar pasanta’ ajar

Mabagus neyat asango sabbar

Elmo esare banne nantos gaggar

Anenggal compo’ nyare langgar

Sabab elmo aropa mosteka

Manyonar ate maloros tengka

Bila elmo ekaandhi’

Ta’ posang neng-enneng kadibi’

Sadajana daddi gampang

Odhi’ nyaman tor dhammang

Ja’ loppa ngormat ka guru

Se morok sabban laggu

Ta’ abu-ambu apareng petodu

Maelang bingong maelang budhu

Bagandan, 2017

.........................