Sanja'na Rahem

Majang

Are ngombar agiba panas

Angen agules nyapo’e aeng e tengnga tase’

Tape robana dika paggun asonar

Akantha damar nera’e kamar

”Olle ollang paraona alajara

Olle ollang alajara ka Madura”

Angen agules agiba omba’

Juko’-juko’ padha anyanye

Alenglenge sampan e tengnga tase’

Sanajjan sampan ampon agunjal

Ka bara’ agiba sossa, ka temor agiba kasta

Jaring ebarbar

Sampan alajar

Gappora Temor, 2017

..............................................

Baseyat  Pangaseppo dha’ Polo Gili

Dhu......ebu

Emot dha’ settong careta

Caretana pangaseppo

Se ampon ababat polo dhari serrangan para panjaja

Aperrang ngorbannagi nyaba

Ate bula ngetek

Alembay tako’ padha badha

Cellep panas ngoronge dhadha

Akaton aba’ ta’ kowasa

Ngedhing careta agiba sossa

Gappora Temor, 2017

................................................

Alif Ba Ta

;kaator dha’ para guru

Mator sakalangkong, Guru

Sasemba’an dhari settong moret

Se asalla arangka’ nyoson aksara

Alif ba ta

Eeja sabban are

Sopaja maelang cellengnga ate

Guru

Sabbar tolos nyapo’e dhadha

Sanaossa angen ngalemba’ e adha’na mata

Tape kasabbaran ta’ bisa ngorange dha’ tolossa ate se maste.

Gappora Temor, 2017

........................................................

Epetthek dhari: Puisi Madura Rahem