Sowarga
Gaggar e Madura
Omba’ se nonton juko’ ka jaring
Maddhai mesem
dhari oreng se ajurung
Bato karang se atapa ngamini du’a;
Moga teptep jembar
bine-ana’
Padhi-padhi ngakoneng
Nyaenge emmas
se bannya’ ekala’ oreng,
Mano’ se ngabber padha
mesem
Mokka’ sabigi
padhi akantha rajana accem
Lake’-bine’ ngombar
kajembaran
Towa-ngodha
senneng agella’an
Tadha’ somber kasossa’an;
Malem kennyang
Gu-laggu ta’ posang
Madura akantha sowarga
Songay se agili
ngeba juko’ raja
Sampe’ aeng daddi buja
Bula neptep
neng e Madura
...................................
Abarengnge Ojan
Bume petteng
Mataare nyellem
Ondhem ju’-toju, abaris e bates temor
Angen se buru
dhari nemor
Arangka’, nyaloksak bume se gumigil
Ojan se gaggar
Nganggit careta anyar
Ojan se dhateng ngalengsang
Mabali taresna dha’ dika se ekaposang
Dhu…
bacca rassa mata
Aeng mata agaggaran
Abarengnge ojan
Ponapa dika mabali taresna
Pekker posang amarga mateya
Langnge’ nanges sabban laggu
Matoron ojan ta’ bu-ambu
Abarengnge ojan
sabban are
Jang-bajanganna dika
nyosop lebat candhilana ate.........................
Epetthak dhari: Puisi Madura Ilalang Kirmizi*
Tidak ada komentar:
Posting Komentar