Kejung Sagara

Rifky Raya

Ngabas ka sagara, akantha sowarga
Agili ka robana dika se nyandhar ka dhadha
Nalpe’agi kerrong se berra’
Nyettong dhalem sowarana omba’.

Sampan-sampan akoba’
Ngolok oreng-oreng se ngamba’
Pamolena jukong-jukong
Olle juko’ mondhung ban rongkerong.

Mano’ keskes se nyapsap,
Mano’ tellen se ngalemba’ e sagara
Nyakseyagi tatemmona dika ban bula.

Rassa jembar, alajar ka poncana tase’
Biruna sagara, daddi kaca e antarana dika ban bula
Sampe’ sorobba are
Nyellet ka dhalem ate
Daddi dungngeng ta’ re-mare.

Madura, 26 Agustus 2016

Epateppa' sareng Lukman Hakim A.G.

Ngemmong Panerros

Hermanto Nuris

Sana’ baragat padha apetanya
Noro’ nespana ana’ poto
Ngabas mereng terro taowa
Bada ban nyatana

Tangteng tengka gulina
Ta’ bisa etoles ban ebaca
Peggel ta’ bisa etamba’
Ngerronge maksa loppa

Korang dhalem bitongan
Angeba tengka nyaman epandeng
Bannya’ petanya se ta’ ejawab
Notope kerrongnga dhalem paksa

Terro merte daddi guna
Dhalem rassa se ta’ samporna
Pangarep ban panyo’on
Daddiya sampornana

Juma’at, 21 Agustus 2015


Epateppa' sareng Lukman Hakim A.G.

Agagejjer e Ngen-Angen

Hermanto Nuris

Lowassa karena’an
Coma dhalem gagejjer
Ngalemba’ e ma’repat
Jasad ta’ andhi’ rassa

Possa’ ta’ kabuwa’
Nompa lebat okara
Badha se ngarte bannya’ daddi petanya
Akarep nemmo rengsana

Akoba’ alembay
Nyata ta’ nangale
Rompak akkal apasang
Ta’ nogga salanjangnga gala

Ta’ bisa egai’
Ta’ bisa apapaddhang
Ngolbek dhalem otek
Panas cellebba rassa

Juma'at, 21 Agustus 2015

 

Epateppa’ sareng Lukman Hakim A.G.

Taneyan Lanjang

Rifky Raya

Akadiya sampan parao se alajar
Bula ajalan mandeng sonarra are
Ngolok sowara-sowara se dhateng
Ka dhalem mempe.

Tedhung mateppa’ badan
E penggirra taneyan
E ro’omma tana se mera
Bauna ban accenna angen tase’
Samoga terros nyarepsep dhalem dhara.

Daddi tolang, daddi aeng mata
Se esebbut dhalem careta

E bakto malem, lama’ eampar
Abuko’ cellep e taneyan
Nyareta’agi kaodhi’an
E babana tera’ bulan

Dhu, taneyan lanjang
Samoga ta’ pegga’
Saabidda agentang matedhung aba’.

Madura, 24 Agustus 2015

Epateppa’ sareng Lukman Hakim A.G.