Bulan se Agantong e Langnge’ :Persi IKSABAD

 

Subaidi Pratama

Bakto akompol e tera’na pekkeran

Bulan se agantong e langnge’

Arassa gaggar ka attas gunong

Daddi sowarga kabunga’an

Malem saminggu sakaleyan

Sakanca’an nalpe’agi pekkeran

Ka bangbangnga petteng

Kaangguy ngoker calemodda kaodhi’an

Dhaun-dhaun se semma’ ban se jau ka badan alembay

Nyakse’e kompolla manossa e tengngana gunong

Se ta’ mandhugul

Sabab asapo’ bato etem se remrem

Malang, 2015

Sanja' e attas epetthek dhari Jawa Pos Radar Madura eccaban Ahad, 6 September 2015

Gumu'

Hesbullah Majnun

Ondhem se agantong
nyapo’e are’ lancor
kacong ban cebbing loppa dha’ bakto
kaka’ asandhadut nyander ka bara’
bulan ngejung matoro’ aba’
dhari temor bintang le-toleyan
kakabbi padha hoso’ nyo'onnagi pangaro

Neng-manengneng ngandhu semmo
dhalem TV pak-ngacapak ban rep-ngarep
bannya’ reng nyapa

maronjung ajungjung langnge’
gurpong e dhalem dhadha
alekser katon kekeyan
posang e leggana

Oncor Lep-Kellebban

Hesbullah Majnun

Dhari ponca bara’ ampon etopeh saronennah
bang-tabangan ban ngacerreng sowaranah
alabbu neng ojannah
ngalesser santa’ angennah
napok nampeleng ropanah

labang temor tabukka’
ngatore lenggi
nera’e jalan se lema’
tapanggi dhalem ate

neng manengneng bucor dhalem roma
takerjat e dhalem kottha
aorak sakellarrah
grimingen bulunah kole’

labang temor tabukka’
ngatore lenggi
abirji’
sokma
saporana
aba’

biru ngapote akoba’ e tengnga tase’
aberber omba’ salanjangnga
ngarembeng aeng mata
nyapcap e disa
apokpak e kottha

Pangarebba Rebba

Hesbullah Majnun

Asalla sapatarangan
Abuwang loppa ka buju’
Se taseksa san-kasanagi

Arebbu’' karebba
Rebba etedda daga tarpet
Ta’ bisa adhengnga’
Napa pole acangnga’

Rebba alerpo’
Mottana adu’a ngennes
-Dhu....Guste, maske aba’ ecolpe’ ekajamo
Abdina pasra

Ngalemba’

Hermanto Nuris

Cellep dhalem panassa nemor

Kalowar pekker dhari bengkana bume
Pelka’ gella’ tadha’ etabang
lalak ojang kare paddhang

Serrona tadha’ se ngedhing
Meddem tape mancella’
Padhana gaja e adha’na mata

Nyangsang pekkeran posang
lebat enga’ keddhap
maenga ja’ aba’ badha
tape nyellem e soroppa are

Etabang tadha’ se paddhang
Agagejjer neng nyellemma are.

04 Agustus 2015