Datkala

Sanja’na Soe Marda Paranggana*

Bila aba’ pon taelang elompa’ setan

Obu’na egumbi’. Elong kopengnga ekorbing

Mowana ekormos ka kokona

Tabu’na eguco kalaban bigina pergemma

Sokona esempal ka sokona. Badanna

Se onggu ce’ kene’na, esalding, epagarding

Epakartem sara’-ngora’. Pas

Econglettagi ka dhalem jeddhing

Napsona ngobal

Matana abarna sekkem tera’na mardha se ngaretep

Ja’ alalagiyan. Ja’ rok-ngerok e seddi’an

Ja’ lang-alangen. Manna kapelo kothem

Kapelo senthem asara’an

Cethak enga’ se para’ ledduea

Nagenne dengngang. Ngampet barana bakto

Tanang seret nyangketthem apoy

Banne gellar. Banne tha’-kantha’an 

Badan nga’-enga’ se garingging

Nga’-enga’ badha

Se adalar e dhalem dhara. Dhadha agunjek

Padhana badha se agursa. Panas ate ngalkal

Bibir aorak. Lesan ra’-tanara’ ce’ lantona

Kopeng-kopeng ajja’ ma’-masemma’

Ame’ ta’ pera’ palempengan, bali’ senga’

Laju coro’ salanjangnga

Se agili banne dhara

Se rabak banne cethak

Namong napso se ta’ kellar etamben

Ta’ duli enga’ ka essena atekelbu’na

Se ongguna ta’ eppot nyebbut asmaNa

Ya, Shabur.. Ya, Rahman..

Hu Ya, Rahim..

Naudzu billlaahi min dzaalik

facebook.com

*)Soe Marda Paranggana oneng nyare elmo neng e Pondhuk Annuqayah Lu'-Gulu', Sumenep. Samangkan badha e Disa Bangkal, Kacamadan Kottha Sumenep.