Mang-Temang Sangger

Anggidanna Mahwi Air Tawar*

E settong are, e settong bakto

Bulanna ngombar tadha’ se tao

Jang-bajangan dika nyedding soko

Soko atengka’ lebadi buko

Bukona perreng, batessa thongthong

Thong-thongnga bungkol monyena nyettong

Thongthong etabbu kalaban lessong

Lessong panyeddhek cebbing ka kacong

Bismillah, nyaba’a sengko’ oca’

Oca’ taresna kacong se bunto’

Se bakal sampe’ nyaba e konco’

Na’poto settong toronna aba’

Bismillah, bula mondut teteban

Kembang malathe ro’om sataman

Bismillah, bula nrema sangkolan

Tolang se pote bundu’na tretan

E settong are, settong taneyan

Mang-temangan sangger pangantan

Epapesa mata dip-keddebban

Tandhu pangarep ate pangantan

Pangantan settong duli apolong

Apolong e lencak damar korong

Kacong-cebbing mara ja’ long-molong

Polong tengka becce' ekaontong

Ser-esseran pangantan anyar

Ajijj’'i guli geddebba damar

Jang-bajangan gaggarra e sangger

Ser-neseran pangantanna binar

E settong bakto, e settong malem

Pangantan lake’ pangantan bine’

Asapo’ paneser saleng alem

Nedari tengka la ta’ kadibi’

Wa’ arena ella nyonar, dhari  dhadha se gumbira

Mayu’, Ale’,

Ngereng, Ka’,

molong pangesto

E long-longan se petteng, areng-bareng

MAHWI AIR TAWAR laher di Madura. Bukuna se anyar Tanah Air Puisi, Air Tanah Puisi, Mahwi Air Tawar (2016) tor Lima Guru Kelana ke Lubuk Jiwa (2016).