Ngalengsang

Carpan Abdul Warits*

SUBAHRI arassa senneng ban jembar polana andhi’ bine. Ropana binena ta’ kose raddin. Tape, babine’ jareya paraten onggu aladin Subahri ban narema kabadha’an kaluargana maske banne reng sogi ban katoronan rato-keyae. Subahri ngarte ja’ oreng andhi’ bine reya bisa maelang rassa ngalengsang. Tape oreng lake’ se andhi’ bine arassa posang amarga kabutowan atamba. Salaen abalanjai aba’ dibi’, napapole abalanjai bine sabban are.

Binena Subahri nyamana Sulastri, sala settong paraban se badha e Disa Girsereng. Kaluargana rokon satatangga’an. Daddina Subahri ta’ kako apol-kompol ban kaluargana Sulastri. Saongguna Subahri arassa malo ka mattowana polana sabban are gun ngampong ngakan malolo.

Sabulan ampon Subahri akabin ban Sulastri. Tape paggun ta’ andhi’ kalakowan. Estona, Subahri apangrasa ta’ nyaman ka mattowana. Tape mattowana ta’ perna ango’ngo’an andhi’ manto se ta’ andhi’ kalakowan padhana Subahri.

”Le’, engko’ arassa pojur andhi’ bine ba’na,” oca’na Subahri e amper romana.

”Aponapa keng, Ka’?” Sulastri nyaba’ kobi anga’ e adha’na lakena pas toju’ e seddi’na.

”Ba’na reya paraten aladin engko’. Apapole kaluargana ba’na narema dha’ kabadha’anna engko’ se nga’ reya,” Subahri  mandeng ka raena Sulastri kalaban senneng.

”Abakte ka lake kan jat kawajibanna kaula, Ka’,” Sulastri ajawab kalaban mesem dhari bibirra. Subahri cellep atena. Tape pekkeranna paggun ngalengsang ta’ karowan.

”Tape, engko’ ta’ nyaman, Le’, ka ba’na ban emma’ mon sabulan reya paggun ta’ andhi’ lako. Engko’ pangara arencana alakowa noro’a Sumadin alakowa tase’,” oca’na Subahri nondhu’ campor rekong.

”Tape, Ka’, kaula kabater mon ampeyan alako ka tase’. Polana samangken angen gi’ santa’,” oca’na Sulastri cambur kabater.

”Ta’ arapa, Le’, areya demi kaodhi’anna engko’ ban ba’na, Le’,” oca’na Subahri mamellas.

”Enggi pon, Ka’, poko’ padha ajaga aba’,” Sulastri narema pamentana lakena kalaban ehlas maske atena arassa berra’.

***

E penggir tase’, angen ngalesser ka badan. Acora’ tennang e atena Sulastri. Tape, omba’ se ngater Subahri ka tengnga tase’ jareya nyempen kabater e atena Sulastri. Sulastri paggun ta’ tennang edina lakena samenggu alako tase’. Salaen Sulastri gi’ buru akabin. Napapole lakena ta’ pate pengalaman alako tase’.

”Le’, engko’ mangkada. Senga’ ba’na adu’a pabajeng ka Allah. Moga-moga engko’ olle pangaselan se bannya’,” oca’na Subahri ka binena e penggir tase’.

”Enggi, Ka’,” Sulastri aonggu’ sambi mesem majembar lakena ma’ olle ta’ sossa.

Mesinna sampan ampon amonye. Sumadin mateppa’ lajarra kaangguy mangkat alako tase’ abareng kancana. Sulastri paggun badha e penggir tase’ ngabas lakena se nae’ ka sampan. Socana mandeng ka sampan se terros majau.

Dhari sakeng estona, Sulastri arassa terro noro’a lakena alako. Biyasana babine’ Madura jat noro’ alako ban lakena. Tape, polana lakena alako tase’ daddina Sulastri gun bisa abanto du’a sabban bakto kaangguy kasalameddan lakena e tengnga tase’ abarengnge omba’ se mosse’. Saamponna sampan jau dhari paddhang mata, Sulastri mole ka romana sambi mekol sossa se badha e dhadhana.

***

Sulastri ngalengsang dhalem romana mekkere lakena se badha e tengnga tase’. Ema’na ban epa’na alako ajuman jaring e amperra. Kadhuwana gun ngabas ka tengkana Sulastri molae gella’.

E lowar romana, ojan dhateng kalaban derres. Kelap amonye kalaban guntor se makabater atena Sulastri. Apapole angen santa’ jan mata’nyeddha tedhung. Kabadha’anna Sulastri polana lakena gi’ alako e tengnga tase’.

”Las, ba’na arapa ma’ laju rekong enga’ jareya? Ajalan ka bara’ ka temor enga’ reng posang?” oca’na ema’na Sulastri.

”Ano, Ma’, kaula mekkere Ka’ Subahri se badha e tengnga tase’. Manda’na cellep e tengnga tase’,” Sulastri ajawab kalaban rassa taresna se dhalem dhari atena.

”Dina ta’ usa pekkere. Lakena paggun salamet. Ba’na cokop banto du’a,” emma’na maenga’ Sulastri.

”Enggi pon, Ma’, kaula ka jeddhinga gallu, ngala’a wudhu’. Abajanga,” Sulastri nyengla, entar ka jeddhing se badha e budhina romana.

***

Ampon dhapa’ samenggu Subahri badha e tengnga tase’. Sulastri ampon ta’ sabbar ngantos dhatengnga lakena. Gu-laggu Sulastri mangkat ka tase’ kaangguy ngamba’ lakena. Sulastri adandan kalaban  kalambi bagus.

Angen e tase’ santa’ abareng omba’ se mosse’. Dhung-kodhung se eangguy Sulastri akerbay. Sulastri ajalan ka bara’ ka temor pas toju’ e babana bungkana nyeyor kalaban kabadha’an rekong.

Dhari tengnga tase’ monyena sampan e kaedhing ranyeng. Dhadhana Sulastri arassa elang sossana polana se badha e sampan jareya lakena. Sulastri manjeng pas ngamba’ lakena e penggir tase’ sambi mesem.

”Baramma, Ka’? Olle ?” oca’na Sulastri.

”Alhamdulillah, olle, Le’. Areya riskina ba’na ban engko’,” Subahri ajawab kalaban tennang.

”Olle barampa keng, Ka’?” Sulastri atanya penasaran.

”Dina ta’ usa nya’-tanya’an. Ca’na ba’na melleya kalambi, eangguya ka pangantanna ale’na  laggu’ malem?” Subahri atanya. Sulastri abanto ngeba’agi sangona lakena.

”Dina ta’ usa pon, Ka’, poko’ ampeyan salamet, kaula arassa pojur. Pera’ kalambi nomer dhuwa’,” Sulastri ajawab kalaban narema.

Kadhuwana mole abareng dhari tase’ kalaban rassa senneng talebat. (*)

*)Mahasiswa Fakultas Usluhuddin Instika Guluk-Guluk Sumenep. Mantan Ketua Komunitas Penyisir Sastra Iksabad (PERSI) PP Annuqayah Daerah Lubangsa. 

Epetthek dhari Jawa Pos Radar Madura eccaban Ahad, 14 Mei 2017