Paraban Sorop Are

CARPAN BIN*

KOSDAN onggu taresna amaen ka Stinggil. Dhari ka’assa pangabas ban pekkeranna manyettong ka po’-compo’na reng-oreng kottha se sella’. Tape banne paneka se mataresna atena. Monggu Kosdan, Stinggil ta’ karo nyajjiyagi rop-sorop are se morka’, tape atosan careta se malarat ekaloppae.

Sabban are Juma’at, Kosdan meste ka Stinggil asareng rajina, Mina. Sajjegga eajak ka Stinggil, laju taresna onggu Mina manabi ampon nyakse’e langnge’. Bi-lebbi pareppa’na magrib dhateng ban pu-lampu kottha nyonar. Mina arassa nyakse’e ebuwan lilin lip-kellipan.

Mina emo’ ngabas pu-lampu kottha. Dining pekkeranna Kosdan alonca’ ka settong are se ta’ kera ekaloppae. Settong kabadha’an se manes ebakto sorop are. Jang-bajanganna Qoqom, paraban se ampon abakta saparo atena Kosdan ka sowarga, laju paddhang epanengalla; akodhung mera ate.

Kosdan emot bakto Qoqom maos sanja’ se ajudul Acator Stinggil anggitanna dibi’; Arassa paddhang sowarga/taneyan se ekacator ebu bakto sorop are/talon se esaka’ eppa’ sabban bakto/arassa semma’ sowarga/bauna kasturi ebakta nang-konang/nyalosso’ ka ate.

”Acora’ saropa sonarra lilin, Ka’,” koca’na Mina, marosak pekkeranna Kosdan. ”Abas, lip-kellipan lampu se ana-barna!” Taresna onggu Mina ngabassagi.

Kosdan coma mesem ta’ ajawab. Pekkeranna gi’ ta’ nyambung. Ater-poter salebarra.

Saamponna nyakse’e lampu kottha, Kosdan ban Mina paleman aerengan. Dunnya akadi coma kaangguy Mina ban Kosdan. Jalan mole se aluk-biluk, tatamennan ban ka’-bungka’an se ajijir e penggir jalan, namba rassa kasemsemma ate. Romantis sakabbina monggu Mina, tape biyasa monggu Kosdan.

Bakto Juma’at se laen, Kosdan ngajak Mina ka Stinggil pole. Atamba takjub Mina ngabas are se gaggar laonan eattassa bubungan compo’na oreng kottha. Rassa-rassana Mina esapo’e langnge’ se tamba abit tamba petteng. Panengalla Mina adep-keddep rassa ta’ parcaja.

”Adhu, Ka’, esto bagus,” koca’na Mina sambi asanappel dha’ rakana.

Tatape Kosdan atengka biyasa. Kosdan akadi patung se ta’ aguliyan. Mamate badan tor pangabassa. Mina daddi sala tengka ban anya-tanya dhalem atena: aponapa Kaka’ ngajak ka Stinggil, mon karo entara ngen-bangennan.

Maka e bakto Juma’at se laen, Mina ta’ kasokan eajak pole ka Stinggil. Mina busen, ban tobuk nyakse’e are se toron e bubungan ban lip-kellipa lampu kottha se mara lilin monggu Mina. Kong-langkong bila Mina ngabassagi tengka polana rakana se mara patung. Tape aherra Mina noro’ jugan ka Stinggil.

”Ponapa tadha’ pole salaenna Stinggil, Ka’? Ponapa coma Stinggil se bagus?”

Mina olle ban andhi’ ha’ kaangguy kasta. Sabab dhukale Juma’at ka Stinggil, Kosdan coma toju’ geggen nyakse’e are se toron, aonggu’ ban mesem. Sobung pole. Kosdan, mon ebas-abas acora’ elang rassa. Acora’ adha’ oreng pole e dunnya. Padahal Mina aca’-lonca’ kasennengngan e semma’na. Mina bila acaca coma ebales sakadarra. Aherra Mina arassa korang egateyagi. Mina ampon arassa sompek.

”Dhu, ale’ se manes, ponapa terrona dika?”

”Dika coma senneng karebba dibi’, Ka’. Ta’ ngarte nespana aba’. Dika ngajak bula ka Stinggil, tape saellana dhapa’ pas enga’ oreng bunggan.”

Mina kaburu mole ngeba rassa kasta ban sake’ ate. Dining Kosdan paggun geggen e korse. Ngen-bangennan ngabas are se toron laonan. Paneka katello kalena Mina ban Kosdan arassa’agi sorop are e Stinggil. Tatape samangken ampon ancor sadajana. Mina ngambul amarga Kosdan ta’ pate paraten ban gate ka parasa’anna Mina.

Angen magrib nyalosso’ ka bun-embunan. Mina nyegga ta’ ale-tole, dining aeng socana Kosdan agili laonan tong-settong.

***

Mina ampon asompa ta’ bakal kasokan pole eajak ka Stinggil. Wang-muwang pello, koca’na. Tatape Kosdan paggun mangkat kadibi’an akadi biyasana. Alonggu manes e korse lanjang, ngabas are se ampon toron laonan ban mesem saellana malem nyapo’e aba’na kalaban petteng.

Bila Kosdan la mole, Mina ngamok ta’ re-mare. Nyaracam e dhapor, jeddhing, ban kamar. Rassa peggel ka Kosdan polana ta’ bu-ambu se amaen ka Stinggil sabban Juma’at. Badha ponapa e Stinggil? Ponapa se epekkere rakana, acora’ senneng onggu alonggu e Stinggil.

Sabban etanya, Kosdan coma ajawab, keng terro matennangnga pekkeran. Mina terros menta kajellasan, maksa badha ponapa saongguna. Tatape tadha’ pole se kalowar dhari lesanna Kosdan salaen matennang, matennang, ban matennang.

”Bula ta’ kowat, Ka’, ngadhebbi dika. Sabban are salerana mellas pangabassa. Bila Juma’at lako amaen ka Stinggil. Ba-tamba adha’ar sakone’. Pola la busen odhi’?”

Kosdan serep ta’ amonye. Cekka’ lesanna. Tatape saongguna Kosdan ta’ kasokan Mina ngamok ban ngambul. Kosdan arassa sala bai. Bila jujur, Mina paste atengka tamba sara, mon tapalang pas menta tellak. Tape bila Kosdan terros dhiyem ta’ aberri’ alasan ban kajellasan, Mina paste nyaracam ta’ re-mare.

E settong are, Mina akes-rengkes guy-angguyyah. Aba’na la ta’ kowat ngabas rakana se lako geggen ban neng-enneng. Mina mole ka compo’na reng seppona. Banne menta tellak, coma matennanga ate. Kosdan ta’ kobasa alanglang. Mina laju kalowar compo’ kalaban acocoran aeng soca, sambi nekket dhadhana ban atowat, poraalla... poraalla....

Kantos tello are Mina gi’ ta’ abali ka rakana. Kosdan tamba posang ban ropek e compo’na. Ngurus odhi’ kadibi’an. Adha’ar sabadhana, ba-komba, sa’-massa’, ban asaren kadibi’an. Dunnya rassana sella’.

Ka Stinggil Kosdan nyare katennangan. Pola kalaban ngabas sorop are ban lip-kellipa lampu kottha atena bisa tennang ban legga.

Saampona dhapa’ ka Stinggil, Kosdan takerjat. Banne margana sorop are otaba kellipa lampu, tatape margana ngabas babine’ se alonggu e korse, akodhung mera ate. Ya Allah, pekkeranna Kosdan laju enga’ ka Qoqom, paraban bakto sorop are se senneng maos sanja’. Ma’ bisa badha eka’dhinto?

”Qoqom?”

Kosdan ngetter adhante’ bakto se cora’ sajan laon. Atena dhak-jeddhagan. Babine’ akodhung mera ate se esapa Kosdan pas atole kalaban pangabas bingong. Rassa kobater ban ngarep apolong e atena.

”Qoqom pasera, Ka’?”

Kosdan takerjat sabuluna kole’, arassa etappor lap-kalap saellana sadar.

”Mina?”

Sidogiri, 27 Muharram 1438 H

*Santre Sidogiri asal dhari Camplong, Sampang. 

Epetthek dhari Jawa Pos Radar Madura (JPRM) eccaban) Ahad, 20 Nopember 2016.