Carpan Hasmidi
POLISI, bannya’ oreng
se ta’ endha’ tatemmo, apolong, apa pole andhi’ taretan otabana bala se daddi
polisi. Kalamon egi’-gigi’, polisi reya kalakowanna ajaga ban madaddi
kabadha’an tamba nyaman. Mon tadha’ polisi yaktena bannya’ oreng alako se ta’
genna ban nyalenda dhari kanyamanan odhi’na ba’na ban odhi’na tatanggana
bi-lebbi sabannya’na oreng se badha neng dunnya.
Kae Suri sala settong se paleng ta’
endha’ kalaban badhana polisi. Sabelluna ana’na se sareyang ngalahirragi. Gi’
bakto binena ngandhung. Kae Suri messen ta’ terro andhi’a na’poto se daddi
polisi.
Dhalem pangarebba sabban are ban malem eduwa’agi
dha’ babaji’ se gi’ badha neng tabu’na binena, ana’na se sareyang mandaran ta’
daddiya polisi. Bakto nyalemeddagi bulan pettengnga, Kae Suri menta ka kajina, dhaggi’
bila napa’ ka du’a mandaran epajauwagina dhari sadaja urusan kalaban polisi.
Malem jareya Rakib entar amaen ka
barungnga Wardi. Sabban malem oreng padha akompol neng jareya. Lalakona acareta
ban ngobi samalem benteng. Tadha’ laen lalakona. Badha keya se amaen dum. Se
kala paggun olle okoman dhari sabarengngan. Acem-macem okomanna ban cara
maenna. Badha se kampe’ ngangguy kampe’na
jemmoranna kalambi, badha eokom manjeng, ban badha keya ngokom se kala kalaban epanengkong.
Barung jareya sabban malemma ta’ perna
asat dhari oreng se amaen eccos ban ngenom biddang. Bila mare asambajang esa’
kantos tengnga malemma paggun ramme oreng. Dhari kana’ ngodha sampe’ se seppo
padha akompol. Rang-sabarang se ekabanta. Sabban malemma paggun ta’ padha se
ecaca. Molae dhari kalakowan neng saba, acara neng tivi, sampe’ acaca
tatanggana.
”Sengko’ ngedhing dhari tatangga. Ale’na
Sutris se dha’-ngodha’an egiba polisi.”
”Mon kabar jareya laju tanya’agi ka Kae
Suri. Molae gella’ jareya acareta masalana Edi se egiba polisi.”
Enga’ oreng se lebbi tao ban tao
sakabbiyanna lalakon ban kabadha’an neng kampong. Kae Suri molae lamba’ lakar
kasohor daddi oreng se bisa nyambi bar-kabar se gi’ buru badha. Tamaso’ lamba’
masalana Rais se etondhung mole moso mattowanna. Kae Suri ngabarragi ja’ Rais
lakona gun tedhung malolo neng bengkona. Orengnga ta’ endha’ alakowa ka saba
nolonganna mattowanna nyaka’ ban alandhu’.
Tape sanyatana careta jareya lopot. Kae
Suri todhus ella mare akabar dha’ sabannya’na oreng se badha neng barung. Oreng
se badha neng barung padha partaja dha’ kabar se egiba Kae Suri. Kabudhiyan,
Kae Suri semmo ta’ pate ekapartajai pole ban reng-oreng neng barung. Oreng gun
nangga’ kabarra Kae Suri. Ekabur-lebur.
Neng paddu mordhaja, Kae Suri asela ce’
antengnga. Neng adha’na sagellas kobi se ecampor susu pote agambar oreng bine’
nyo’on baddha susu se buru ekala’ dhari kandhangnga sape ban nenteng ember se
ella possa’ susu, kare sanengnga. Kae Suri toju’ ka teker rakara se eanggit.
Cora’na badalla kardhulugan. Banne sakeng tekerra aoker enga’na lamari, lencak,
ban korse se ekagabay neng dhissa’. Tape badha settong bagiyan se alebbiyan katembang
teker badalla laenna.
”Nasir jareya banne gun roga, tape
potong gi’ tolges”.
”Aih... Barammana ganeka? Dika laju
ngoca’ potong-potong.”
”Kan urusan ban oreng se etabra’ la
mare, menta kakaluwarga’an. Apa ma’ gi’ badha polisi se ro’-noro’ masala
jareya? Gi’ epentae pan-barampan juta gun makalowara sapedha se etompa’ ale’na
Sutris bakto nabra’ oreng neng jalan Pakong. Ka se kapalangan mare aberri’. Etambai
ngurus ka polisi sabbanna mare aberri’ keya. Se tello are reya, polisi ban
kadhuwa’ oreng sorowanna kalebunna dhateng ka Nasir, menta pesse pole. Poko’, abi’na
araja’an katembang se ella ebagi ka se kapalangan.
”Kaluwargana
Sutris kan kapalangan keya. Ban se ngentel sampe’ egiba ka roma sake’, ngenep
pa’are.”
Are jareya abak laggu. Nasir buru
dhateng nyo’on rebba sarame dhari Nong Angen. Tao-tao badha oreng asaragaman lengkap ban oreng se seggut toju’ neng
bengkona kalebunna. Nasir abecco ka jeddhingnga. Samarena asalaman, Nasir entar ka binena se badha neng dhaporra
ngandel biddang.
Ropana reng-oreng se toju’ neng korse
amper adha’ jareya la gella’. Roko’ se nyelpet neng garigi’na jareya ella kare
saparo. Buncengnga nabuy ka man-dhimman. Neng babana korsena atalabuyan keya.
Nasir dhateng nyambi kobi satalam. Banne kobi selliban, tape kobi se
etoto dibi’ mon binena. Rassana lakar bida kalaban kobi neng barung ban kobi
belliyan neng toko. Sambi metar kobi, Nasir lakar
andhi’ sangka’an ta’ nyaman kalaban badhana oreng se namoy gu-laggu ka romana.
Nasir se pas atanya’a ka Samsul ta’ nyaman polana Samsul abareng ban dhuwa’
oreng kancana etambai polisi.
Sellang baramma mennitan.
”Polisi reya, Ka’, gun nengguwa
kabadha’anna se sake’. Sehat apa gi’ sake’. Samarena are reya polisi reya ta’
kera kadhinna’ pole. Sakabbiyanna urusan ella mare.”
”Kalangkong dha’ bantowannepon panjennengan
sadaja. Kaula gun coma bisa males kalaban kalangkong se sanget raja.”
”Enga’ reya, Ka’, kaangguy notop parkara
reya, pa’ polisi reya buto biaya keya. Enja’ ta’ bannya’.”
”Barampa, Le’?”
”Ba’na cokop nambai tello juta’agi’.”
Oreng se padha ngedhingagi caretana Kae
Suri padha takerjat ta’ partaja. Gun nambai kaneserran dha’ kaluwargana Nasir.
Bendher oca’na Kae Suri. Badha keya se ngoca’ Nasir budhu. Polana ta’
elaporragi masala se nempa ka aba’na. Nase’ ella daddi tajin, kaju se potong
ta’ bisa esambung pole.
Malem saterrossa, Kae Suri ta’ ka barung,
sabadhana oreng kabbi padha atanya. Badha se ngoca’ sake’, badha keya se ngoca’
alajar. Tape ca’-oca’ jareya tadha’ se bendherra. Dhari temor, ngidik Sutris ka
bannya’na oreng sambi tapegga nyambi’ nyabana dibi’. Akaton ta’ kabuwa’ se
badha neng dhalem dhadhana.
Napa’ ka barung, Sutris ta’ laju abanta.
Aba’na gi’ kaso se buru dhari jauna. Tanangnga araga gellas se badha neng
adha’na, terros ngenom essena sampe’ tadha’.
”Jareya tang biddang. Sambina ba’na
teng dhimma kose ngangsor mara eburu setan bai?”
”Kae Suri egiba polisi. Buru sengko’
nangale ongga neng adha’na bengkona pa’ kalebun.” (*)
Songennep,
2016
Epetthek
dhari Jawa Pos Radar Madura (JPRM) eccaban Ahad, 4 Desember 2016.
Tidak ada komentar:
Posting Komentar