Ngantos Gettana Bato

radarmadura.jawapos.com

CARPAN MUDHAR CH*

CA’-OCA’AN reng lake’ emmas 24 karat para’ elanga eanyo’ jaman, otamana neng e sakobeng pakotthan. Nangeng maksot ban kanyata’anna reng lake’ paggun lebbi tenggi darajat sabab e dhalem nantowagi peleyan, reng lake’ lebbi bibas. Se emaksot, banne reng bine’ ta’ bisa mele, tape e dhalem kakabinan oreng alake bine, reng bine’ ngantos epele kalaban oreng lake’. Buru reng bine’ motosagi antara narema otaba nola’.

Tadha’ caretana oreng bine’ alamar kadha’ ka oreng lake’. Tadha’ caretana. Sanajjan badha’a paleng reng bine’ gun ngoca’, ”Sengko’ taresna ka ba’na, mara sengko’ lamar!” Jareya bai mon ekedhing oreng bannya’ bakal daddi caca ekacareta ban daddi kandha ta’ nyaman. Amacem badanan se kodhu etarema. Badha ngoca’ babine’ modha, dujan ngonggai, ban en-laenna.

Coma ja’ kaloppae, naleka reng lake’ alamar pas ta’ etarema, alam akaton rempa’, birsek, ban ancor ataltalan. Dunnya se ekaandhi’ ta’ aguna. Odhi’ tadha’ argana. Nanggung malo, ta’ nemmo era. Ta’ nemmo panyaba’anna mowa. Saengga bannya’ oreng se apekker pandha’, ”Katembhang pote mata bango’ poteya tolang,” nyaba daddi tarowan ban peleyan.

Reng lake’ emmas 24 karat banne pas amodha’agi argana oreng bine’. Buktena reng bine’ ta’ olle mamodha. Ta’ olle ngonggai. Reng bine’ olle narema otaba nola’ naleka badha reng lake’ alamar. Sanaossa badha ca’-oca’an, reng bine’ ta’ olle nola’ lamaran oreng lake’ se dha’-adha’ sabab tako’ sangkal.

***

”Mara, An, ba’na la cokop omor, Bing. La neggu’ kalakowan teptep, gi’ ta’ ala’-bala’a ya? Ja’ le-mele bukkol, Na’, tako’ teppa’ ka se dhingkol.” Nom Toha, majadhi’ dhari eppa’ se dhari Songennep atanya sambi mesem semmo agaja’. Sengko’ mesem keya noro’e pamesemma Nom Toha.

”Napa, Nom?” ajulu tanang asallim pas toju’ atempo e erengnga.

”Abba mara..., pongpong anomma reya gi’ padha baras salamet. Ro-karo embana la tadha’ kabbi. La ta’ nyapo’ kabbi. Masa’ la epasakola gi-tenggi, la sarjana pole, gi’ ta’ bisa mele pacanganna. Pas gi’ nyorowa anomma ya?”

”Adhu nape, Le’, ganeko gun ca’-kanca’an ettho’,” emma’ sambi nyaba’ kobi o-tao nyambung kandha, ”Eatore, Le’, kobina terrossagi!”

Emma’ duli abali pole ka dhapor nyaba’ talam. Nom Toha mokka’ kodhungnga cangker baddhana kobi. Dhakkala kokossa ngolbu’. Ro’om asareddhemman.

”Kaula ta’ oneng se matora, Nom.”

”Arapa, Na’?”

”Ta’ oneng, Nom. Emma’ ganeka se..., ta’ oneng, Nom,” sengko’ nondhu’ ta’ tao se materrosa.

”Ba’na taowa, Bing, ja’ mon kobi reya pae’. Se manes reya gulana, Na’. Tape pole, sanajjan pae’ kalamon jareya jamo, ja’ pas buwang. Sabaligga, manes. Mon manessa aesse racon, jareya duli buwang. Sateya, An, abali ka se gella’ pole. Ba’na kan la epasakola, daddi ba’na kodu bisa abida’agi se kemma se juba’ ban se kemma se becce’ ka aba’na. Dhing-ngedhing, ca’na gi’ bakto akuliya semma’ ban reng Songennep? Arapa ma’ ta’ epaterros? Korang gantheng ya?” Nom Toha sambi sot-ngosot tang obu’ dhari attas ka baba.

”Mmm... bunten, Nom.”

”Mon korang gantheng tambai dibi’ ra, gu-lagguna. Ban pole, ca’na reng jung-kejungan, ja’ melleyan juko’ bandeng, juko’ bandeng bannya’ tolangnga. Ja’ alakeyan oreng gantheng, oreng gantheng bannya’ otangnga. Hahaha...” Nom Toha agella’. Sengko’ noro’ agella’. Badha romasa senneng mon akandha bi’ Nom Toha. Sanajjan oreng disa ta’ asakola gi-tenggi, tape pamekkeranna legga. Akadi ca’-oca’anna, manossa kodu nyagara.

”Enggi manabi aotangan, Nom.”

”Senga’, Bing, ja’ nyareyan oreng gantheng, nyare reng patot bai, Na’. Enga’ Nom Tohana. Ta’ gantheng keng patot, hahaha... Pelak pole, hehehe...,” Nom Toha agella’ pole. Mowana daga mera se agella’ kel-ngelkel.

”Gaja’ reya, Bing. Keng mon badha gunana makke gaja’ kala’. Senga’ kaemane badanna, kaemane aba’na. Kaneserre reng towa ban la-balana. Ja’ patodhus marga tatengkan se ta’ genna.”

***

Sengko’ gi’ buru mare narema telpon dhari kanca kantor. Dhari oreng lake’ se ta’ tobang nelpon naleka malem. Kadhang nelpon bakto sengko’ la tareddep, akadi malem sateya.

Arip nyamana. Oreng lake’ se lako nelpon sanajjan gun atanya mare ngakan apa enja’. Mare abajang, gi’ ta’ tedhung, ban en-laenna. Oreng lake’ jareya se ta’ bu-ambu nyemma’e sengko’. Oreng lake’ se bisa ngeco’ atena sengko’. Oreng lake’ se tatak ngoca’agi sajja bagussa dha’ ka sengko’.

Sengko’ rida’ elang kalakowan kor daddi binena. Sanggup daddi ma’mum dhari reng lake’ se anyama Arip. E dhalem adu’a sabban mare abajang se lema’ bakto nyamana eatorragi dha’ Se Amorba Jagat, kaangguy epagampang urusan ban hajadda.

Settong se daddi cekka’na sengko’ ta’ duli alake, emma’ ta’ asaroju’i antarana sengko’ bi’ Arip. Sabab sengko’ mon daddi bi’ Arip, Arip ta’ ngaolleyagi sengko’ alako neng e kantoran. Sabatara emma’ ta’ endha’ mon sengko’ sampe’ elang kalakowan. Ban eppa’ noro’agi sakale. E antara alasanna emma’, polana sengko’ la ebandhai asakola, epanyare lako. Mangkana sengko’ ta’ olle daddi oreng bine’ se gun akeddhem neng e roma.

Emma’ terro ngatela’a sengko’ daddi babine’ se ta’ gun ngurus dhapor, somor, ban kasor. Sengko’ kodu daddi wanita karir. Jareya arepanna emma’ se paleng raja. Saengga emma’ ngarep sengko’ duli alake esaba’ e kennengngan se ta’ tanto. Nomer se ta’ etemmo bitonganna.

Mon enga’ ka kandhana Nom Toha, sanajjan sengko’ ta’ ngarte satos persen, tape mon egi’-gigi’ bannya’ bendherra. Bannya’ oreng kaloppae ja’ mon kobi reya pae’, saengga oreng barai ka kobi. Tape ta’ endha’ ka rassana kobi. Oreng bannya’ ngoca’ senneng ka kobi sanyatana aba’na senneng ka rassana gula se manes.

Sateya gun Arip, oreng lake’ se akarep ngabina sengko’. Dullu badha polisi ngoca’ abarengnga reng seppona alamara sengko’ ka roma, tape eppa’ se langsung nola’ sabab ta’ nyaman rasanna oreng mon pas amanto polisi. Ban emma’ ngeggunge sakale.

”Ja’ nya’-bannya’ karena’an, Ti!” Emba ngoca’e emma’. ”Pola nyapo’ ka omorra sengko’.”

”Mon Ebu’!”

”Kalla la duli tarema! Sapa? Sarip?”

”Arip ko, Sarip.”

”Iyya, Arip. Bi’ reng Songennep la rung-burung bariya.”

”Ta’ gampang, Bu’.”

”Eee... kake, Bing, Ana jiya bine’. Kandhana reng towa, ngantos gettana bato. Senga’ ana’en kake ekanceng bi’ reng Songennep! Ta’ paju lake, kaler kake.”

”La ambu, Bu’!” Emma’ duli ngalle.

Ta’ ngabiddagi pole, saellana emba mare ngoca’e emma’, eppa’ ban emma’ tabukka’ laju narema lamaranna Arip.

”Mator sakalangkong, badan kaula sabala etarema e ka’dhinto. Saterrossepon, sabab na’-kana’ se kadhuwa ampon same-same cokop omor, badan kaula ta’ badhi ngabiddagi lampa kabinna Arip sareng Ana,” reng seppona Arip mendek sakejja’.

”Enggi...,” Eppa’ aonggu’.

”Lerresa sabulan aggi’ dhari mangken, na’-kana’ se kadhuwa ngereng pakabin! Areepon Rebbu tanggal lema bellas bulan Sappar.”

”Enggi ngereng, kasokannepon. Manabi eka’dhinto, babine’ polana, namong nadhai.”

Sabulan eantos arassa sataon. Sajan are sajan semma’ rassana sajan abit. Dhapa’ ka malem are laggu’ akabina, la-bala dhari eppa’ ban emma’ molae dhateng padha akompol. Nom Toha dhateng sabala ban poy-kompoyya rombongan nyalter motor ekkol.

Koko, tanang, lengngen, ban soko la mare epacare bi’ pangeyas. Eppa’ sangaja ngonjang pangeyas se paleng kalonta e kottha dhinna’. Adan Sobbhu dhari masjid ban langgar padha patang santo. Sengko’ ngejjit abaladhas.

”Ba, pacarra ma’ ta’ cekka’? Gun samalem la lontor?” Koko, tanang, lengngen, ban soko elang-telang. Sengko’ toju’ pole ka kasor, magenna’ sokma. Emba, Nom Toha, Arip, ban reng seppona coma mekko e dhalem kembangnga tedhung. (*)

Epetthek dhari: Ngantos Gettana Bato