radarmadura.jawapos.com |
CARPAN MUSYFIEQ RZ.*
MARE adan Sobbu tadha’ oreng ngaji ka corongan. Biyasana, na’-kana’ se ngenep e langgar ngaji ka keyajina. Are gi’ ta’ kalowar, ajam la nganthang akongko’. Dulasmar
ru-kaburu entar ka langgar abala ka keyaji ja’ sapena la elang.
”Assalamu ‘alaikum, etojjuwagi dhari sadaja masyarakat
Pordhapor, sapena Dulasmar ampon elang. Ngereng dha’ sadaja masyarakat pakompakkagi nyare sape.” Seyaran e masjid ekaedhing ka
man-dhimman.
Kabbi masyarakat Pordhapor seyal. Tacengnga’ polana mangken neka disa badha kaelangan. Molae dhimin, bajingan dhari Pordhapor bisa masteyagi kaamanan disana. Kalebunna
jugan kowat arangkol bajingan
dhari Pordhapor ban se dhari lowar disa. Bajingan
dhari lowar se
ngeco’a sape e Pordhapor
tako’. Bannya’ oreng
ngoca’, ”Biyasa, paleng jareya bajing gi’ buru
ajar. Entara nerragi nyaba, paleng.”
”Kan iya jat. Mon maleng gi’ buru ajar reya jat nga’-masanga’. Enga’ se ce’ angkona,” ca’na oreng laen se padha akompol
e romana Dulasmar.
Sambi nyongkelagi arek ka gulungan sarongnga, Dulasmar ngoca’, ”Mayu
ka, mon mangkata pong gi’ ta’ ce’ abanna,” Dulasmar ngajak oreng-oreng
se toju’ e per-amper romana.
”Neserra Dulasmar, mangkana sapena ebelliya e bakto anakna se bine’ alakeya. Dulasmar
la para’ masanga reng-tareng.”
”Se biyasana Dulasmar
ebantowa, sajan
ekeco’ ban oreng sapena,” ca’an Bun Nurasan ka Sahriya se
mangkata ngare’ ka saba.
”Areya
sapena epakalowar ra-kera pokol
tello’an. Ja’ engko’ pokol dhuwa’ gi’ entar ka jeddhing, akemme. Mare
jareya engko’ nenggu
sape reya gi’ badha,” Dulasmar acareta se
malemma.
”Ken
malemma dhatengnga
kompolan enga’ se badha kalemba’na
oreng e babana accem e sabana Man
Jusup,” Oca’na
Addul. Masyarakat Pordhapor terros noro’e lampatta kokotta sape dha’ bara’. Tape ta’ jau dhari romana Dulasmar, lampatta sape abiluk dha’ dhaja.
”Buru dha’emma reya, ma’ mosange
mase,” ca’na Addul.
”Areya jat ma’ le posang se nyare,” Asmawi nyaot.
Are ampon seyang, panassa are, lapar, pelka’ la
padha badha.
Lampatta kokotta sepe terros ongga ka
gunong. Lampatta sape apencar daddi dhaduwa’. Masyarakat apencar. Badha se noro’ Dulasmar
ban badha se
noro’ Asmad. ”Areya paleng
etaro e Guwa Pajuddan”, sangka’anna
Asmawi se ajalan neng
e budhina Dulasmar.
”Tak
kera! Paleng reya esaba’ e dhajana guwa, ja’ polana engko’ tao nyare sape keya neng edhiya dhin majadhi’,” ca’na Addul.
”Andhi’ roko’ ba’na, Dul? Pae’ colo’ la…”Asmawi atanya ka
Addul.
”Engko’
ta’ sempat ngeba roko’. Engko’ jagana tedhung langsung mangkat polana bine
ga’-jaga’an ja’ sapena anom
reya elang,” ca’an
Addul.
Para’ dhapa’a ka Guwa Pajuddan,
Dulasmar tatemmo ban oreng bine’ se
ngala’ aeng neng dhing-jeddhingan. Aeng jareya agili dhari somber
se badha e Guwa Pajuddan. ”Le’, badha sape lebat edhiya?” Dulasmar atanya ka oreng
babine’ jareya.
”Badha gi’ buru, Ka’, dha’ dhaja. Duli entare, mi’ tager
ce’ jauna.”
”Kalangkong,
Le’!”
”Areya edhiya,” sala settong se noro’ Dulasmar
aberri’ tao ka kancana. Langsung sape se gi’ ta’ sempat epangger ka kajuwan
ekala’ ban Dulasmar. Se laen nabang
malengnga. Kono, malengnga, terros buru ka baba gunong. Sandhalla locot, songko’na
ngalto’ ta’ etemmo
ja’ dha’emma. Kono
ekenneng, epokol ngangguy kaju ban bato. Tadha’ rassa neser. Bibirra leddu’ nampes dhara. Cethakka bucor, tolang bettessa potong. Talebat ngoso’, Dulla langsung natta’ dhadaha Kono.
Nyabana Kono la ngap-pelngapan. Pekkeranna enga’ ka
oreng towana se epate’e ban Dulasmar. Neyat malessa Dulasmar kalaban ngeco’ sapena,
la-nyala ka ana’ bini’na ban
mate’e Dulasmar la tadha’ areppan. Pekkeranna enga’ ka oca’na eppa’na e bakto mangkata mondhuk.
”Senga’, Cong, neng pondhuk reya
ja’ co-ngocowan
kancana, ngeco’an dhin kancana. Mon ngeco’ jerum e pondhuk, dhapa’ ka romana
ngeco’ jaran. Pabajeng ajar, kaneserre engko’,
mamondhuk ba’na banne ken lebbi pesse. Engko’ gun terro odhi’na ba’na ta’ padha ban se engko’.”
”Enggi,
Pa’.”
Kono tao kabadha’an e romana malarat. Se
ekakana ban arena ollena aotang. Lakona eppa’na gun ngare’. Ngowan sape dhin
tatanggana, gun ollena agadhu.
Settong are, Dulasmar nagi otang ka eppa’na Kono. Polana ta’ kellar
nyerra, gun ejanji’i malolo.
Aherra, eppa’an Kono etatta’ le’erra ngangguy are’ ban Dulasmar. ”Lebbi tello juta otangnga
ba’na ka engko’. Engko’ malakeyana ana’. Buto pesse bannya’.”
”Engko’ ta’ andhi’ pesse, Mar.”
”Sapena
juwal!”
”Banne dhin engko’ sape jareya. Engko’ gun ngala’ gadhu.”
”La ta’ taowa, kor poko’na sape jareya mon ta’ ejuwal, engko’ se ajuwala dibi’.” Dulasmar ngoso’. Aherra natta’ eppa’na Kono. Eppa’na Kono langsung mate bakto ganeka keya. Kono kateppa’na badha e pondhuk. Ngedhing toklar jareya, Kono
langsung mole dhari
pondhuk.
Kono enga’ ka oca’na eppa’na e sabban ngerem. ”Senga’, Cong, pabajeng ajar, ma’ le daddi oreng se pojur.”
Kereman lako tellat. Kono lako buto pesse. Asalla sabbar, Kono lako apasa neng karana tadha’ se ekakana. E settong bakto,
Kono andhi’ kesempatan
ngecok pessena pasantren. Tabu’ lapar,
berras se etana’a tadha’. Otang la nombuk ka
kancana.
Kono ngala’ sakone’,
sacokoppa melle berres ban nyerra
otang. Karana ekarassa nyaman, Kono lako ngeco’ pesse
dhin kancana. Kalakowanna Kono laju aoba lako ngeco’.
Lebur ngabas santre bine’ se mangkata
asakola. Alonca’ pagar,
rat-soratan ban santre bine’,
aroko’, ban laen macemma.
E bakto ajiyan ketab
bu-sobbu, Kono tha-kantha sake’ tabu. Amet entara ka WC. Tape, Kono entar ka kamarra kancana se gi’ buru ekerem. Neyat
ngeco’ pesse tageppok ka pangurus. Pangurus
alaporan ka keyae polana ta’ kellar ngadebbi kalakowanna Kono se lako ngeco’an
pessena kancana. Kono tao ngeco’ e koperasina pondhuk.
Ngeco’ roko’ tello lencer. Kono edikane keyae ka dalem.
”Arapa ba’na ma’ lako ngala’an dhin kancana?”
”Bunten,
Keyae. Abdina coma neyat ngenjema.
”Iya, ma’ ta’ amet?”
Maske lako etegger sareng keyae, lako eparenge nase’
dhari dalem ma’ le lekkas ambu ngeco’an, Kono ta’ lem
ngarte ka maksodda. Kadang, e bakto
Kono ngeco’a enga’ ka eppa’na,
keyaena ban kadeng ka emma’na
maske ta’ perna tao robana.
Sabban atanya edhimma
emma’na, eppa’na ta’ tao abala. Ta’ tao, apa alako ka lowar nagara, apesa ban eppa’na otaba la mate. Tape
mon mate edhimma koburanna?
”Dina,
masala reya epasraagina ka pangurus,” dhabuna keyae.
”Ba’na egundhula ban abajang jama’a lema bakto,” oca’na pangurus e kantor kaamanan.
Maske eokom jama’a lema bakto, Kono ta’ jerra. Pondhuk Al-Hikam lako kaelangan.
Molae dhari sandhal,
kaos, pesse otaba buku-buku. Pangurus
la padha saroju’ mamoleya Kono.
”Ella,
Kono ja’ pamole, pondhuk
reya jat kennengnganna oreng ta’ baras. Padhana roma sake’. Mon sake’ giba ka roma sake’. Mon
ta’ baras akalla, giba ka
pondhuk, pamondhuk.
”Ka’dhinto ampon sara. Eokom aberseyan pondhuk lastare.
Hadiran salat jama’a lema bakto lastare. Egundhul lastare.
Elaporragi ka oreng seppona lastare, keng ta’ dhateng acabis dha’ Ajunan.”
”Dina bar-sabbar, mi’ pola gan sateya, laggu’ otaba sadhumalem Kono bisa aoba pole
enga’ lamba’ se gi’ buru
mondhuk. Oreng reya padha ta’ etemmo. Dina du’aagi ma’ le
lekkas baras.”
***
E bakto parai pasa’an, Kono marung e lao’na
romana. Apol-kompol ban kancana eppa’na e berungnga Bun
Jumae. Kono anya-tanya kabadha’anna eppa’na gi’ ngodha.
”Angko, Cong,” ca’na Makbul.
”Mon ngeco’?”
”Pole ngeco’, Cong, eppa'na
ba’na reya ratona. Mon ngeco’ sape gan kadibi’. Etonton biyasa eadha’na romana oreng se ekeco’ sapena. Molae ba’na
mondhuk pas
ambu. Se biyasana akompol
e barung, adha’ ta’ entaran pole. Ban bakto abajang ka masjid, tokang
adan neng masjid, dhari cacana baih,
se biyasana kasar adha’ pas, alos enga’ oreng
se tako’an. Mangkana odhi’na eppa’na ba’na malarat polana ambu ngeco’. E bakto atokar ban Dulasmar keng ta’ alaban. Buh, mon eppa’na alaban, bangka rowa Dulasmar,” Makbul
acareta ka Kono.
”Sapa se
ta’ kennal ka eppa’na ba’na, Cong, kabbi
oreng tao. Eppa’na ba’na
reya bajingan raja.
Ja’ acem-macem ka eppa’na ba’na mon
ta’ terro sapena elanga. Pole gun sape, binena ekala’ ban orengnga
epate’e.”
”Sapa se
ekatako’e sareng eppa’?”
Kono gi’ paggun panasaran caretana eppa’na.
”Adha’, Cong. Pole gun enga’ engko’, kalebunna tako’.”
Teppak malem Juma’at, bulan ka
totopan ondhem. Tadha’ angen. Kono entar ka barung
Bun Jumae, kennengnganna
jing-bajing biyasa
akompol. Makbul ban se laen la padha akompol ngenum kobi. Makbul ngajak Kono
ngeco’ e disa tatangga, dhin Samsuri. ”Enten, Nom, kaula palemana, sobung oreng e compo’.”
”Siyah, ba’na, Cong, sapa se entara ngeco’ ka romana
ba’na. Jing-bajing badha edhinna’.”
Pekkeranna iri ka eppa’na polana mon ngeco’ sape gan kadibi’. Malem jareya keya, Kono ta’ mekker
lanjang, pekkeranna la elompa’ peggel ka Dulasmar. Samarena
acareta ban jing-bajing,
Kono mangkat nyendhemmi kandhangnga Dulasmar. Ju’-toju’ neng babana accem sambi’ ngabasagi gulina Dulasmar e per-ampera romana. E bakto Dulasmar maso’ ka
romana, Kono siyap makalowar
sapena Dulasmar. Tape burung polana gi’ pokol
sabellas.
”Buuk...” Kono eonjep ngangguy
bato.
”Bangka
ba’na.”
”Ngala’ ka jarangkongnga.”
”Se pate’.”
Oreng padha ca’-ngoca’e Kono se la ta’ aguli.
Asmad neggu” lengngenna Kono.
”Enja’ gi’ odhi’. Penthong pole,” ca’na Asmad. ”Mayu ka mon ebuwanga ka
jurang.”
”Ella, dina torot, ma’ ekakan pate’ neng edhiya,” Dulasmar ta’ magi.
Bas-abasanna bureng. Pekkeranna kasta. Neyat males
ka Dulasmar aherra mate ka Dulasmar. Petteng. Pekkeranna
elang. (*)
*)Mahasiswa
Instik Annuqayah Lu’-Gulu’,
Sumenep.
Epetthek dhari: Kasta
Tidak ada komentar:
Posting Komentar