Ngalengsang

Sanja'na Marsus Banjarbarat

Langnge’ celleng sorem dhalem pangabasan

Samper leres bathek pote celleng

Akantha ate se tacellet dhalem cellot baceng

Dhu ale’ se jau e mata..!

Ba’ bila bula se gila nemmowa tamba?

Asabab pangarep se ta’ nemmo konco’

Kajaba kakobasa’an bisa matemmo odhi’ bula ban matena dika

Are tamba are, panas mapotthon ate se socce

Kole’ arassa sake’, ebulet obu’ cellengnga dika

Cethak bindheg ta’ kowat mekker taresna se baceng

Sumenep 2016