Maskabin ban Bakto Samalem

radarmadura.jawapos.com

CARPAN HASMIDI*

”MARA bukka’ sowarana, ja’ dhiyem enga’ reya. Apa keya ollena mon gun akekep malolo?”

Saongguna ba’na reya kan tao keya apa bai se bakal ekabutowagi mon oreng aparlo. Enja’ ta’ gun nyadhiya’agi reng-tareng otaba terop. Teker ban ka’-angka’anna ewajibbagi badha. Areya sakeng banne parlo kene’.

Dallu, gi’ kaka’na se epacampo ta’ kantha ngonjang oreng sagame’ balekkadan. Ta’ reng gun sataretanan ban ga-tatangga se semma’ dhari taneyan dhinna’.

Bannya’ oreng se abanta dha’ kabinana kaka’na ba’na. Maske banne taretan asli otaba kaka’ asli se gun coma kaka’ sapopo ekarassa lopot moso reng-oreng ban ga-tatangga dhinna’.

Bila se baji’ ka kaluwargana ba’na bantana ta’ gun coma ngarasane masala pakabinanna, tape lebbi dhari jareya. Badha keya se ngoca’ ta’ etengkae se teppa’. Bandha se ngoca’ parlona kaka’na ba’na ena-dina ban reng towana ba’na. Banne gun jareya. Bannya’ gallu oreng abanta.

”Iya, mon ta’ keng ekakan dibi’ pessena.”

”Bitong otangnga ja’ barampa!”

”Nompo’, ta’ kabuwa’ ebitong kalaban garigi’.”

Tape enja’ ta’ abit cara apa oreng se abanta enga’ jareya. Yaktena oreng se abanta jareya oreng jat se ta’ perna senneng ka kalowargana ba’na. Tenggu bai oreng se enga’ jareya. Paleng gun terro ealemma moso emma’na kaka’na ba’na se badha neng Arab.

Mon baktona pojur, kabbi oreng padha ma’-manyemma’ ka kaka’na. Coba’ dallu gi’ se mangkada pole. Otabana se buru dhateng dhari Arab asabab kenneng oja, kan bannya’ keya se gun nampa cangkem otabana marangko to’odda neng amperra dibi’. Ta’ badha’a oreng se abang-bumbang ngamba’a emma’na kaka’na. Tape bila sateya bannya’ se aban-dalumban manyemma’ ka kaka’na.

Urusanna bengkona ba’na se gi’ ta’ ekole’ reya. Koduna osa pamare. Paberse ban panyaman baramma’a bai carana. Aotang gallu pesse otabana aotang beddhi gallu nyoro melleyagi ka oreng se andhi’ pesse. Iya, jareya ba’na bisa keya ebukuwi aotang beddhina. Banne aotang pessena.

Kan, ella nyaman? Iya, mon ajanji bajaran ka oreng se eotange ja’ ngala’ bakto se ma’-semma’. Pajau. Sakerana ba’na reya andhi’ kaloddhangan kaangguy majar sakabbiyanna otang ka reng-oreng.

Mon gun masala otangnga eppa’na ba’na ajja’ pekkere ba’na keya olle ta’ kapekkeran bi-kakabbi. Dinai keya eppa’na olle badha pangarasana ka ba’na se ella ta’ noro’ abalanjai baktona powasa se gi’ buru.

Cokop sateya ba’na manyettong pekkeran ka kaparlowanna ba’na dibi’ bai. Apa bai se korang ban parlo ebelli se ce’ ekabutona. Lamari ban lencagga ta’ cokop mon egabay bin-sambin ka bengkona oreng. Kodu pagenna’ ban korsena. Parabut ban kasorra gi ta’ ebelli. Mon gun sasap ban sapo’na ba’na ta’ osa kobater, gampang. Angguy se gi’ buru epakerem dhari Arab.

Sengko’ perna keya ngedhing ba’na ella mare melle karamik ennem eddhus. Labang se badha neng Kardhuluk oca’na keya ella mare ekone’e.

Terros baramma kalaban majadhi’na ba’na se badha neng tana Jaba? Ja’ kaloppae. Bila pole se bisa pol-makompol sataretanan mon ta’ sateya. Se jatem rowa kaenga’e keya. Maskeya ella tadha’ eppa’na rowa paggun laggi’ anyama sapopona ba’na. Banne gun se mondhuk rowa sapopona ba’na. Adhissa’ gun Sapi’ se anyama reng lake’na. Nyaena, emma’na, ban ale’na Sapi’ kabbi babine’ se atengka reng lake’.

”Sengko’ ella mare abanta moso Pa’ Ji. Oca’na seyap kaangguy ngone’e ban sambi naragi se mondhuk mole ka Jaba. Kejja’aggi’ parai samenggu polana teppa’ dha’ are Tellasan Reyaja.”

”Nyaman, mon enga’ jareya kan bisa nekkore dha’ kapekkeran.”

”Iya, enja’ kabbi epekker mon taretan kakabbi.”

Gat-baragat se laen gi’ ta’ mare eseyappagi kabbi. Dineng bakto karjana ella para’. Bisa ekoca’agi ra’-para’ elong. Gun kare metong are se napa’a ka parlona. Sabbanna sengko’ perna messen ka ba’na roma se dhidhaja jareya berse’e keya kaangguy nyandhangngagi tan-taretan se dhari lowar. Bila dhateng olle nyaman ngennenge.

Iya, sengko’ ta’ gun coma messenna ka ba’na. Bila sengko’ ella dhateng dhari sakola’an bakal nolonge kaangguy merse’e ban kes-marengkes rang-barang se ta’ ekaparlo. Mun keng lencagga eppa’ reya ealleya ka roma se dhilao’, iya, mayu’ ja’ bila se ealleya.

Sengko’ sateya kare atanya’a ka ba’na. Polana reya se ce’ pentingnga otamana ka ba’na ban sakabbiyanna kaluwarga ban tan-taretan se laen. Ejab kabulla ba’na ella mare ajar? Bakto akad reya se paleng ekobatere sakabbiyanna oreng. Banne gun ka oreng se noro’ bunte’ ba’na ka bengkona bakalla, tape oreng se badha edhinna’ padha kobater keya, ta’ kera lopot paggun kobater kakabbi.

Pole, maskabinna apa ella badha? Edhissa’ menta barampa kaangguy maskabin? Bila akad kan jareya yaktena madhateng pangolo dhari kacamadan, apa ella mare ekarembak ban reng dhissa’ masala se-pesseyanna kakabbi?

Enga’, sorat pindhana ban en-laenna mon bisa sadhiya’agi dhari sateya. Mon laggi’ ta’ andhi’ putu, duli aputu. Ta’ osa bagus, cokop se bisa etangale robana ba’na bai.

Ejjam acora’ sakejja’ se ngeba buru jarum se kene’ nojju ka nomer dhubellas.

Mara alle ale’na jareya ka dhalem, angenna sateya ta’ nyaman mon bit-abit gallu’ tedhung neng e lowar. Sateya lakar osomma reng kalesma ban reng abato’. Pong gi’ ta’ ecapo’ duli pakadhalem sambi pasange sapo’. Sadhiya’agi apa bai se ekaparlo ale’na se lalake’ ajanga lagguna se asakola’a. Mon keng saragam kaos, pas kala’ dhari dhalem lamari kaossa. Pagenna’ ban ku-buku moso sapatuna.

”Dina, reya’ reng ella malem, sengko’ moleya gallu. Laggu’ malem sengko’ abaliya ban ponakanna. Pola bisa ngenep samalem kana neng edhinna’.”

Bakto terros ngalocor nyambi bitonganna ejjam gan settong napa’ ka tengnga malem. Aeng sajan ekarassa jin-nyojjin ka kole’ napok dhari adha’na mata. Dhalem parjalanan sambi ngarena pekkeran ka karjana ale’.

Enneng sakejja’ napa’ ka bengko. Labang padha aentep kakabbi. Seppe. Tadha’ settong oreng se jaga. Ontongnga labang budhi ta’ esorok. Daddi sengko’ bisa maso’ ban makadhalem sapedha motor kalaban esothok ta’ eodhi’i. Sengko’ tako’ dhaggi’ majaga oreng se tedhung. Apana pole majaga ana’ se kene’. (*)

Songennep, 2016

Carpan eattas epetthek dhari Jawa Pos Radar Madura (JPRM) eccaban Ahad, 16 Oktober 2016 otaba e Maskabinban Bakto Samalem.