Anggidanna Soe
Marda Paranggana*
gunong soga’ mandiga’
tase’ mosse’ aomba’
saleng salep ler-keleran nyapsap
nyorong mardha
naja’ poncana nyaba, datkala
kole’-kole’ akombi’, daging-daging
nyelbat
ta’ ka langnge’. bigina badan nompa
ta’ ka tana
bila dhapa’ ka baktona
tabu’ bume ngota apoy
bulan kalero ngombar
are kolbas panggang sakelan
ekolop bai’ sera-sera manossa
pello ronto nopowe dunnya. long-hallongan
ta’ badha panaongan
dhu ka’emma’a dhu ka’emma’a
dhu eka’dhimma dhu eka’dhimma
pello ropana lethek asaloy cellot kolot
nabi ibrohim ngoy-langngoyan
nabi musa lok-olokan
nabi isa ro-serrowan
:
Muhammad!
Muhammad!
bula bisareng dika ummat muhammad
ngap-engngapan. di-kadiya oto’ gurpong
ngakarambang
:
Muhammad!
Muhammad!
abdi dalem lecek
abdi dalem dzolim
abdi dalem se saestona, ros-terrosan
nyare tareka. ta’ bu-ambu ngala’ antara
sangaja ale’es dhari ngalocor dharaepon
padana
abdi dalem tha-kantha, ngalocor taresna
aeng mata
nyebbut asmaepon padana
:
Muhammad!
Muhammad!
abdina jugan ta’ apangrasa
ngajak bala tangga nyolet aksara
noto okara lesan padana
namong ajunan lembu’ gilina aeng
ta’ busen nyeram elop ngopeni lomot
ka duli-duli iman
ka duli-duli ihsan
ka duli-duli Islam. Allah!
manabi pagi’ abdina etamen ka dhalem
tana
ekaromo’ mangga ola-’ola’ bakto
--
manabi pagi’ abdina ecabbur ka rabak
seksa
eontal apoy dhalem naraka. saka’dhinto
abdina bakal ekello’ pae’ kasta
:
Muhammad!
Bulan Sora. 2016
Sanja’ eattas
epetthek dhari Jawa Pos Radar Madura (JPRM) eccaban Ahad, 16 Oktober 2016 otaba
Puisi-Puisi Berbahasa Madura Soe Marda Paranggana
Tidak ada komentar:
Posting Komentar