radarmadura.jawapos.com |
CARPAN HASMIDI
RENG-ORENG
padha manjeng neng taneyan ngabas
ka dhaja. Teppa’ ka dhalem kamar se gun settong kabbiyanna. Tadha’ se bangal
maso’ ka dhalem.
Sabadhana
oreng se ajemmor jareya gun aparsemmon. Asa-karasa sampe’ sowarana ta’ ekaedhing kopeng settong
balakkadan. Angen cellep ngendhing dhari temor nyambi sonarra are on-laon
dhari budhina bungkana sabu. Dineng
ramo’na ngoker padduna pakarangan se dhi temor loros kalaban kandhangnga sape.
Agalimbang
oreng bine’ kasorang neng dhalem kamar. Bengko pegun atandhu’ dhuwa’ neng attas
gentengnga
acora’ etombuwi dhuri-dhuri raja. Settong bine’ se laen toju’ marangko to’odda
babine’ se agentang ngolo bara’.
Teppa’
neng babana lamari se ngadhep
ka lao’. Dineng lencak ampar asalemot sasap rambing dhari sarong eseba’ dhuwa
kabendherran
badha neng attassa cethagga
reng bine’ jareya keya.
Badha tanges
ekempet neng dhadhana. Gariming
ngedhingagi sowara esaloy kalaban serro sake’ ta’ kowat balangaja. ”Dina gan
sakone’, ja’ ta’-santa’ anyaba. Areya paggun sake’ ka tabu’na ba’na”, sajan
aban, reng-oreng padha dhateng sajan bannya’ se manjeng.
Ta’ kantha badha
se laresa toju’ ka amperra. E lowar, anggidanna dhaun rakara ngampar abarna soklat towa
kerreng parana. Bathok se maroka aseba’ egabay kennenganna buceng dhari roko’
se epesel ka pabir dhulambar.
E
dhalemma ta’ etemmone gabussa roko’ sakale. Apana pole roko’ bungkosan se ta’
agabus, padha ta’ etangale. Badhana gun coma re-karena seppa’anna bibir neng
pabir pote akonco’ bak koneng neng bungkella.
Nemor
paggun nemor maskeya badha papareng dhari Se Kobasa. Ojan tao toron dhuminggu se buru.
Teppa’ ka malem Rebbu
epaterros Rebbu
gu-laggu samarena asalat Sobbu.
Belta
se mettek dhari cokla’an akambang kalaban tello dhaunna. Sempat keya oreng se
namen bako parai
dhari pekolan neng bauna. Ta’ nyeram, ta’ kalowaran dhari bengkona bang-sebang.
Neng Kampong Manyar
se jau dhari barung kobi, apana
pole dhari pasar, jellas
ta’ kera adina buceng roko’ gabusan. Areya banne sakeng dhari jauna ka oreng se
ajuwal roko’ gabusan,
tape asella
lakar pajat tadha’ se ekabelliya pole. Jagung
panambara’an ban se etambai kalaban jagung hasel dhari panemoran
tong-settongnga arta se daddi pangorebanna orang Kampong Manyar jareya.
Are
Ahad samarena lema are jareya, sabala padha agumpol kakabbi neng amper. Gun
coma bala lake’. Arembak
kabadha’an se bakal etarema saellana entar ka Disa Kobungan dhaggi’.
”Ompana kana’ lake’ jareya paggun ta’
ngako, tengka
apa se bakal etotorragi dhari dhinna’?” Sala settong
reng lake’ se toju’ neng penggir lao’ nyangdhar ka cangga nyella banta se ta’
kamareyan jareya.
Sabadhana
oreng se badha neng amper jareya padha manggerra’, salang saot. Kobi se badha
neng adha’na selana ta’ sepa’ pole totobba ngobussagi owa’na dhari dhalem
gellassa se panas. Okos
padha kalowar dhari lobang dhuwa’na elongnga, abarna pote jenneng sakejja’
elang egiba buru angen se ngalembang ka bara’.
”Mayu’, papadha saroju’. Bukte apa pole
se egiba’a ka dhissa’? Sampe’
sateya kabar se eantos tadha’ ngombar. Sampe’ bila sabala reya badha’a neng
edhinna’ kaangguy ngantos kabar se ta’ paste? Duli papaste. Parkara areya egiba’a ka
pangadilan, mayu’ ja’ baramma.
Parkara epamareya neng kakalebunan, iya mayu’ sabala dhinna’ reya ja’
akarebba apa,” oreng se koros
ta’ aroko’an jareya mette’ banta.
Se laen padha esep. Ker-mekker
jalan se saterrossa. ”Areya
ella mare epategges
ka se bine’ ja’ onggu-onggu reng lake’ jareya se bakal ekentare? Pagenna, olle ta’ sala
sangka ka oreng,” oca’na pole.
Lalake’
se badha neng paddu mordhaja nyalko’ sakaleyan, ”Sengko’ kan ella ngoca’ molae dhari sabbanna, senga’
matoro’a aba’ ban reng towana se laen. Ja’ reng pas ta’ atoro’
sakale. Bila enga’ reya,
aba’ keya
tanoro’ dha’ masalana. Reya
buktena ta’ atana’
ebulla’i apoyya. Senga’ dha’ budhi ajja’ sampe’ masala se padha ban reya ta’
ekadhukale’anna. Cokop gan sateya.”
Mare
asalat Esa’, kalema oreng
ekerem ka Disa Kobungan kaangguy menta kapasteyan dha’ reng towana ban
la-balana kaluwarga
se lake’. Jaran ella mare eparanta. Compet are
gella’ sabadhana kaparlowan dhalem parjalanan padha esadiya’agi. Samarena
tarongkeng esolet, kareya ella daddi tandha ja’ se kalema oreng bakal mangkat.
Tengnga malem,
teppa’ pokol satengnga
dhubellas reng budhi padha ngantos dhatengnga oreng se ekerem. ”Le’, badha
kabar dhari anomma ba’na. Lakena
bakal mole lagguna dhari Sorbaja,” sowara jareya se nyenthak sakaleyan dhari
baligudan pagar adha’ maseyal sakabbiyanna oreng.
Ta’
koceba Isa se ngemban baji’na neng dhalem. Ngaseyap dhara se agili
dhalem badanna. Acora’
badha oreng se nyeram aba’na kalaban aeng panas. Lemmes sakaleyan ngedhingagi
eppa’na bakal dhateng.
”Bariya bai, lagguna bila ra-kera emmak
reya ella para’ napa’a kodu badha oreng se abarengnge Isa neng
dhinna’. Jaga emmak ame’
kongse ta’ mella’ atena. Ame’
pola loppa dha’ ka Isa ja’ ana’na dibi’. Neng masala areya, Isa ta’
burungan bakal esake’e,” oca’na oba’ ka
emma’na Isa.
”Sengko’ banne sakeng ta’ abala’a ka
ba’na otaba ka embu’. Sakeng sengko’ ella andhi’ pangrasa tako’ se raja dhalem
ate ban pekkeranna sengko’, Buk. Tako’ sara ka eppa’. Polana eppa’ seggut messen ka sengko’
ajja’ matodhusan kaluwarga
dhinna’. Senga’
jareya,
pas sateya
banne gun matodhus.”
”Sengko’ areya sampe’ makoceba sabadha
la-bala dhinna’ ban bala lowar. Sengko’ banne ta’ terro se magaggarra baji’ se
rembi’ areya, Buk. Sakeng sengko’ eman ban ta’ bisa. Sengko’ ta’ arapa eppa’na
baji’ reya ta’ ngako ka baji’na dibi’. Sengko’ lebbi bunga odhi’ kadibi’
katembang odhi’ abareng oreng lake’ se ta’ bisa tegges ban mamare masala areya
kalaban tatagga oreng lake’. Sengko’ lebbi bunga.”
Dhuareyaggi’ pentana
reng dhissa’ bakal aberri’ kabar. Dhi’-majadhi’na padha ngator parembagan
kaangguy matatemmo kadhuwana neng settong kennengan. Sale-olle patatemmo neng
dhinna’. Ajja’ endha’ ompamana esorowa entar ka dhissa’. Mon ella ta’ endha’
neng dhinna’, mo-temmo neng kennengngan se ngadhuwai. Se ta’ ka dhinna’ apana
pole semma’ ka dhissa’. (*)
Songennep, 2016
*)Ajar e LKSB Pangestoh Net_Think Community
Sumenep, Komunitas
Kampoeng Jerami, tor Komunitas
Sastra Nusantara.
Epetthek dhari: Banne Ta’ Terro Magaggarra Baji’
Tidak ada komentar:
Posting Komentar