CARPAN UBAIDILLAH HASANI
”KA’, wa...
entare teleponna. Molae gella’ amonye. Tadha’
se ngeddhebbi. Paleng
badha se buto ka ba’na,” ale’,
binena sengko’, ngolok dhari
dhapor.
”Iya antos
gallu,” sengko’ ajawab dhari taneyan.
Pareppa’na jareya sengko’ gi’ aseyol eadha’na
mano’ keteran. Sengko’ ta’ edhing monyena
telepon se esaba’ edhalem roma.
Samarena abarri’ pakan ka tang
mano’, sengko’ duliyan ajalan ka dhalem
roma kaangguy nenggu
sapa se nelepon gu-laggu. Edhalem
roma, telepon jareya ekala’ pas etenggu nyamana
sapa se badha e kacana.
E kaca
telepon jareya
se kalowar mangkana nyamana sala settong
guru se ngajar tang ana’, Salman. Samarena etenggu, sengko’
duliyan mece’ tombol se badha gambarra
telepon abarna biru dhaun.
”Halo,
assalamu’alaikum,” oca’na sengko’.
”Waalaikumussalam,”
guru jareya, Pa’ Gunawan, ajawab.
”Badha
ponapa, Pa’,
ma’ nelepon kaula?” oca’na sengko’ pole.
”Pa’, pottrana Sampeyan agabay parkara. Pottrana Sampeyan,
Salman, akeket
ban pottrana Pa’ Marto. Sampeyan kodu entar ka sakola’an
samangken.”
”Enggi, Pa’, kaula entara
ka sakola’an samangken.”
”Enggi, kalangkong, Pa’.
Assalamu’alaikum.”
”Waalaikumussalam,” telepon
etotop.
Samarena abanta
e telepon jareya sengko’ ngoso’ onggu. Banne
ngoso’ ka sapa, tape ngoso’ ka tang ana’, Salman,
se ta’ bu-ambu agabay parkara. Salman sabban are
lako matodhus sengko’.
Salman sabban are lako akeket ban
ana’na tatangga. Badha se
epananges, badha se eparoga,
pas badha se
sampe’ epapotong tanangnga. Sabban are sengko’ kodu ka roma sake’
kaangguy ngobadi ana’na
tatangga. Salman onggu korangajar.
Sengko’ gi’
enga’ bakto Salman akeket ban ana’na Pardi se sampe’ kalengnger.
Sengko’ onggu-onggu ngoso’ bakto jareya.
***
”Din,
Saridin, kalowar, Din, abas
apa se la ekalako ana’na ba’na!” Dhari
dhalem roma
sengko’ edhing oreng se athowat sambi ngoso’.
Sengko’ duliyan kalowar dhari roma, nengguwa sapa se nger-maenger
eadha’na tang roma.
Eadha’na
roma, sengko’ nangale tang tatangga, Pardi, ngemban
ana’na. Ana’na kalengnger ta’ aguli, loyo. Pepena ana’na se kacer
abarna biru petteng. Dhari jau sengko’ tao ana’na kalengnger
polana epokol oreng.
”Badha
apa, Di? Ba’na ma’ nger-enger
eadha’na tang roma?” oca’na sengko’ samarena
ngabas Pardi.
”Ba’na ta’
nangale? Ana’na sengko’ kalengnger
polana ana’na ba’na.”
”Ana’na
sengko’ keng alako apa ka ana’na ba’na, Di?”
”Ana’na
sengko’ kalengnger etokol ana’na ba’na. Sateya sengko’
menta’a pesse. Ana’na sengko’ egiba’a ka roma
sake’.”
Saonggguna sengko’ ta’ tarema epentae
pesse sambi eca’-koca’, tape
sengko’ tao Pardi ta’ kera lecek. Sengko’ tao Salman la agabay parkara
pole. ”Ba’na menta’a pesse barampa,
Di?” sengko’ la-ngalae.
”Sengko’
menta’a Rp 1 juta. Mon ana’na
sengko’ paggun sake’, sengko’ menta’a pole.” Pardi ngoca’ sambi mandellik ka
sengko’.
Sengko’ duliyan maso’ pole ka dhalem
roma kaangguy ngala’
pesse. Sengko’ saongguna ta’ sossa polana pesse. Sengko’ andhi’
pesse bannya’, tape sengko’ sossa polana ana’na
sengko’, Salman, ta’ gellem ambu
agabay parkara. Sengko’ ta’ tao bila Salman se
ambuwa matodhus sengko’, eppa’na.
”Ya’, Di.
Duliyan giba ana’na ba’na jareya
ka roma sake’. Sengko’ tako’ ana’na ba’na apa-rapa.”
Sengko’ magi pesse Rp 1 juta ka Pardi.
Sengko’ onggu-onggu todhus ban tako’ ana’na Pardi ta’ salamet.
”Ba’na kodu
ajaga ana’na pabander, Din. Ja’ torot mokol oreng malolo enga’ ba’na lamba’,”
Pardi ngala’ pesse se sajuta pas duliyan ondur.
Pardi la elang dhari
adha’na roma, tape atena sengko’ paggun peggel. Banne peggel ka Pardi, tape ka Salman.
Onggu sengko’ terro mokola ana’ arowa bila etemmo, tape Salman ta’ gellem mole
ka roma. Sengko’ maso’ ka dhalem roma pole pas toju’ eattassa korse.
Sengko’ ngantos Salman
sampe’ malem. Sampe’ ta’ enga’ se ngakana. Binena sengko’ pan-barampan kale
masenga’ sengko’ kaangguy ngakan. Tape sengko’ paggun ta’ ngakan, mekkere Salman
malolo. Sengko’ paggun ngoso’ ban ngomet ka ana’ arowa.
Pokol ballu’
malem Salman mole ka roma. Sengko’ ngabas sambi peggel, tape Salman ta’ ngabas
ka sengko’. Tako’.
”Man, dhateng dhari
dhimma ba’na, ma’ gi’ buru mole?” sengko’ atanya, abenthak. Salman manjeng eadha’na
sengko’ sambi nondhu’.
”Sengko’ entar
ka romana kanca, Pa’,” oca’na Salman, ngetter.
”Daddi ba’na amaen
ka romana kancana ba’na samarena mokol ana’na Pardi?” sengko’ la manjeng
kaangguy mokol Salman. Tape, sengko’
burung se mokola polana bine, Fatima, dhateng pas agellu’ Salman.
”Ella, Ka’,
ba’na ta’ usa mokol Salman. Mon ba’na mokol Salman, ba’na gun sajan marosak,” Fatima
ngoca’ sambi agellu’ Salman.
”Daddi Salman etoroda
ban ba’na? Salman epadaddiya tokong pokol?” sengko’ sajan ngoso’.
”Dina Salman ta’
usa pokol. Salman enga’ jareya polana ngala’ ka ba’na,” samarena ngoca’, Fatima
laju ajalan ban Salman ka dhalem kamarra. Adina sengko’ kadibi’an.
E malem jareya
sengko’ onggu-onggu ngoso’ ka Salman ban Fatima. Ca’-oca’na Fatima se gi’ buru
paggun ekaedhing edhalem kopeng. Maenga’ kadaddiyan se lamba’, sengko’ padha
tokang pokol. Onggu sengko’ ta’ terro Salman, tang ana’ tonggal, daddi enga’
sengko’ lamba’. Onggu sengko’ ta’ terro.
***
Samarena ngabala
ka Fatima apa se ekalako Salman e sakola’an, sengko’ laju mangkat ka sakola’an.
E sakola’an jareya sengko’ maso’ ka kantorra pas ngadhep Pa’ Kapala Sakola. Dhari
Pa’ Kapala sengko’ edhing Salman mokol ana’na oreng sampe’ loka.
”Pa’ Sardin,
saporana kaula kodu makalowar Salman dhari sakola’an ka’dhinto polana kaula
tako’ Salman agabay parkara pole,” oca’na Pa’ Kapala, alos.
”Daddi Salman
ta’ bisa sakola eka’dhinto pole, Pa’?” sengko’ atanya.
”Enggi, Pa’, saporana,
Pa’.”
Samarena abanta
bannya’ parkara, sengko’ kalowar dhari kantor jareya. Dhari lowarra kantor
jareya sengko’ laju ngeret Salman kalowar dhari sakola’an. Salman aserro sake’
polana kalambina etaja’ ban sengko’, tape sengko’ paggun ta’ bas-ngabas.
Sengko’ paggun ngeret Salman sampe’ ka penggir jalan.
”Ba’na apa
karebba, Man?” Ba’na ma’ pas lako agabay parkara?” sengko’ abenthak e penggir jalan.
Salman marenges tako’ sambi nondhu’.
”Man, arapa
ba’na ma’ lako mokol oreng?” Sengko’ abenthak pole. Salman paggun ta’ ajawab.
”Man, jawab!”
sengko’ ngoca’ pole.
”Sengko’ lako
mokol oreng polana sengko’ ngala’ ka ba’na, Pa’!” Salman ajawab kalaban ranyeng.
Marena jareya pas buru.
E penggir jalan
sengko’ paggun manjeng ta’ aguli. Saongguna sengko’ terro nabanga Salman pas
epoppowa. Tape atena sengko’ ngetter. Saongguna sengko’ ta’ senneng Salman
daddi oreng se lako mokol oreng.
Atena sengko’
apangrasa ta’ pantes se ngoso’a ka Salman polana sengko’ lamba’ padha ban Salman.
Lamba’ sengko’ tokang carok se lako mate’e oreng.
Sengko’ la aoba.
Sateya sengko’ tao Salman mokolan oreng polana ngala’ ka sengko’. Salman
mokolan oreng polana ana’na tokang carok. Bendher onggu ca’oca’, ”Buwa ta’ kera
jau dhari bungkana.” (*)
*)Mahasiswa di Instika Annuqayah Lu’-Gulu’,
Sumenep.
Carpan eattas epetthek dhari
Jawa Pos Radar Madura (JPRM) eccaban Ahad, 18 September 2016
Tidak ada komentar:
Posting Komentar