Pangeran Katon

CARPAN MA LEO*

BAKTO seyang, sonar are rassana ngobbar kole’. Panas talebat. Adaddiyagi posang se ta’ sapera. Reng-oreng la padha posang nyare panaongan. Kadiya ojan ta’ gellem toron. Mabacca kerrengnga bume.

Bakto gapaneka, Darmo ajalan bi’-dibi’an sambi neggu’ butol aesse arak se kare saparo. Sambi dhung-sarondhung ta’ nanto jalanna. Ban, colo’na acaca malolo. Ta’ jellas maksodda.

”Adhu, Na’, ba’na arapa ma’ dha’iya?” oreng bine’ se la towa aromasa takerjat ngabassagi ana’na se ta’ jellas badhana.

(Baca: Mat Ecoco’ Dhuri)

”Arapa’a ba’na, Bu’? Sengko’ sateya dhateng dhari sowarga,” cacana la sajan mabingong embu’na.

”Maksodda, ba’na apa, Na’, ma’ ta’ jellas maksodda?”

”Ba’na oreng towa se ta’ tao apa urusan na’-kana’ ngodha. Dina sengko’ tedhunga. Maso’a ka roma. Sateya lesso kabbi tang badan reya,” sambi nondhu’ ban ajalan dhung-sarondhung.

”Tape, sabellunna tedhung abajang gallu, Na’. Sateya la para’ asara.”

”Ba’na ma’ acaca malolo, Bu’, mon urusan bajang dina gu’-laggu’ bila la towa.”

”Astaghfirullahaladhim,” dhadhana embu’na etapet sambi agili aeng matana.

Onggu ta’ kowat rassana malae ana’ tong-settongnga se ta’ bisa ebalai. Maskena coma ana’ settong, tape rassana padha ban se andhi’ ana’ tello polo meggi’. Sabab, orengnga ce’ mellerra. Lakona bu’-mabu’an. Ahlakka ce’ sarana. Seggut gigir dha’ reng towana. Sajjegga oreng towa lake’na adinggal dunnya. Lakona sajan sara.

Sakolana coma sampe’ SMP. Ta’ bisa materros ka SMA. Sabban taon aba’na seggut ta’ ongga kelas neng sakola’an. Salaena seggut alanggar paratoran, kadhang andhi’ babine’ se epadaddi pacarra. Contona, Sumina. Babine’ se bagus ropa tor biyasa ngenneng juara e kellassa tao eco-koco moso Darmo.

Sumina jareya ta’ apangrasa ja’ aba’na coma eco-koco. Aherra, sabban arena Sumina seggut ero-soro moso Darmo. Kadhang, pessena epatadha’ eajak ka gir sereng gun coma neng-sennengngan. Tape tadha’ gunana.

Sampe’ olle tello bulan Sumina temmo la ngandhung. Tape neserra, Darmo ta’ atanggung jawab dha’ lakona se ta’ bagus. Saenggana aba’na epenjara bi’ kapolisian. Sampe’ empa’ taon sapolo are. Tape maske la epenjara, lalakonna Darmo paggun bai ta’ bisa aoba.

Mare epenjara, Darmo laju abarengngan ban na’-kana’ barandhalan se juba’ lakona. Sabban malem, biyasa neng-sennengngan sambi ngenom bu’-mabu’an neng rung-barung ban e lan-jalan.

Atokaran ban kancana mosona. Kadhang pole ngalakone ngeco’ pesse tor barang neng lan-jalan. Saengga adaddiyagi ta’ aman dhalem badhana na’-kana’ jareya.

Kalakowan-kalakowan jareya rassana ta’ pate sara bila ebandhingagi ban reng towana. Bakto badha e romana, Darmo seggut agir-gigir dha’ embu’na bila esoro nyamporna’agi kawajiban salat lema bakto, apowasa bila dhapa’ dha’ bulan Ramadan otaba majar zakat dha’ ka oreng mesken, tor salaenna.

Saengga, bila embu’na maksa, Darmo kadhang sampe’ nokol sambi agir-gigir. Ngadhebbi ana’na se meller, embu’na coma bisa nanges sambi paggun adu’a sabban baktona kaangguy aobana kalakowanna ana’na.

”Bu’, ba’na ta’ usa ro-nyoro se malarat lakona. Sengko’ la raja, tao kalakowan se nyaman ban se ta’ nyaman,” oca’na bakto sobbu sambi agir-gigir.

”Cong, ba’na la raja, bila se atoro’a dha’ parentana reng towana? Eppa’na la tadha’ sateya, mastena ba’na se bisa agante dha’ lakona. Banne akadi reya lakona,” jawabba kalaban alos.

”Huh, ma’ pas gun jareya se ekacaca malolo. Tadha’ laen, apa?”

”Cong, senga’, sengko’ embu’na. Ba’na ta’ tao ya, mon reng towa ekasare, Allah bakal kasar dha’ ba’na? Ca’na oreng Jaba, oreng towa reya pangeran katon. Daddi, ja’ gampang ngalakone se ne-banne dha’ reng towana ba’na,” embu’na terros malae.

”Ca’ na ba’na kabbi, Bu’, sengko’ ta’ tao masala jareya. Sateya ba’na ondur dhari dhinna’. Sengko’ ce’ katondhuna sateya.”

Ta’ bannya’ penta pole, embu’na pas terros ondur. Nyengga dhari ana’na se ta’ bisa ebalai, sambi napet dhadha ban nanges se etotope. Darmo ta’ apangrasa ja’ cacana embu’na bakal daddi kamalaratan tor mosiba se talebat raja dha’ aba’na. Kabukte, bakto Darmo ban ca-kancana aneyat ngeco’a dha’ toko emas.

Bakto jareya kabadha’an seppe. Kalaban napso se talebat, Darmo terros ngancam dha’ se andhi’ toko lebat are’ se tajem. Ca-kancana se laen terros ngoras emas ban pessena. Tape na’as. Badha oreng se tao. Saenggana dhalem bakto se sakejja’, reng-oreng la padha dhateng kabbi. Ngeba bato, kaju, ban se laenna, kaangguy ngoja ban aberri’ pangajaran dha’ maleng se aneyat sala.

Ca-kancana ontongnga bisa buru ngangguy motorra. Tape laen ban Darmo. Aba’na ta’ bisa buru. Sabab ekeppong bi’ reng-oreng sambi eontale bato ban barang se laen. Sampe’ ta’ enga’.

Aherra. Maskena nyo’on sapora, ngolok nyamana embu’na, tadha’ oreng se parcaja. Terros eontale kaju. Edidda’. Kalowar dhara. Sampe’ aherra mate neng tengnga jalan. (*)

*)Ketua PAC IPNU Guluk-Guluk, Sumenep.

Carpan eattas epetthek dhari Jawa Pos Radar Madura (JPRM) eccaban Ahad, 15 Mei 2016