Arena Biru Dhaun

CARPAN HASMIDI

”Na’, buru badha tamoy dhateng ka sakola’an, nyambi kabar bagus ka sengko’ ban ba’na kabbi. Banne sakeng kabar pesse otaba kabar bantowan laenna. Kabar reya kaangguy ba’na  sopaja bisa ngalakone ujian kalaban tennang. Bisa ajawab kalaban teppa’, ta’ andhi’ rassa nyangsara, saenggana pekkeranna ba’na bisa tabukka, ta’ babbal. Polana dhari jareya sengko’ ban ba’na kodu ban wajib ngabunga’agi kalaban badhana kabar reya. Enga’, juntrongngagi sakabbiyanna pangarep se teppa’ dha’ pangeran. Tadha’ laen se bisa abanto kajabana pangeran. Sakabbiyanna kadaddiyan e dunnya reya. Lebbi-lebbi pagi’ neng aheradda.”

Lake’-bine’ red-mored se epagumpol neng aula padha nondhu’. Patoju’na epesa-pesa. Mored lake’ badha neng bagiyan kacer. Dineng mored bine’ ngennengnge bagiyan kangan. Badha keya se agu’-onggu’ nandha’agi ja’ jareya ngarte ban saroju’ kalaban badhana kabar se ebagi mon Pa’ Dasuki.

”Bilaepon, Pa’, badhi elampa’agi acara ka’dhinto?” Sala settong mored lake’ neng paddu bara’ dhaja manjeng sambi asandhakep. Satengnga dhari sabadhana mored se epasettong neng kennengngan jareya padha onga’ terro ngabassagiya dha’ ka oreng se asowara. Bangal atanya dha’ pa’ kapala. Sabagiyan ru-guru padha mengo serana nojju somberra sowara gella’.

Are naja’ panas ekarassa ngello’ badan. Pello ngalocor dhari attas cethak. Gilina mabacca badan. Dhari dhai narettes gan sakone’ sampe’ ta’ bisa ampet maskeya ngangguy pay-keppay. Keppay dhari buku se eangguy noles cateddhan kimia.

Sakabbiyanna oreng se toju’ neng aula padha aserro, agaliseng. Toju’na ta’ segek pole. Angen acora’ mate ta’ kantha nyalembu dhari bara’. Sajjegga candhila ella padha ebukka’ kakabbi tadha’ se atotoba.

Ta’ abit cara apa kana, acarana ella etotop. Pa’ Dasuki pola ta’ tega ngemmonge sabadhana mored se kapanasan sambi pay-keppayan. Red-mored arebbu’an se kalowara dhari aula. Sandhal kangan-kacer padha saleng cecce’. Badha keya se ta’ apolong moso pasanganna.

Pa’ Dasuki laju nojju dha’ kantorra samarena dhari aula. Tadha’ apa pole se elakone. Neng korse celleng ban lembu’, Pa’ Dasuki nyaba’ songko’ cellengnga neng meja, teppa’ se badha neng adha’na.

Cethagga eteggu’ kalaban tanang dhuwa’na. Nondhu’ ka mejana se aberna soklat towa. Pekkeranna semmo ngalengsang man-dha’emman. Bannya’ kerana se daddi pekkeranna Pa’ Dasuki.

Baramma marena bila na’-kana’ se badha neng sakola’an reya badha se ta’ lulus? Apa bisa ngolang sataon benteng? Mangkana ca-kancana se laen ompamana ella padha badha se nerrossagi dha’ pangajaran se lebbi tenggi. Baramma rassana bila agumpol moso le’-ale’na neng kellas se paggun?

Sanyatana benne gun coma jareya se daddi pekkeranna Pa’ Dasuki. Nyamana bai oreng se daddi nomer settong kaangguy ngurusi sakabbiyanna se badha kaedanna kalaban sakola’an. SK se ekaolle neng taon 2015 buru, teppa’ neng bulan Juni agante kapala se sabelluna ngobasane neng sakola’an jareya keya.

Pa’ Dasuki lakar andhi’ pangaterro kaangguy mamaju sakola’an jareya. Maskeya sakola’anna badha neng kacamadan. Neng daradan se tenggi. Neng jareya keya panas thar-centharan sabban are erassa ngello’ kole’.

Samarena mamare dhuwa’ bangunan se epadaddi kellas, banne sajan mamare kabbi kakorangan se badha neng sakola’an. Kennenganna ru-guru sanyatana parlo keya epadhai se anyar. Saterrossa keya, parkir sapedhana red-mored kodu epateppa’ kalaban kennengngan se nyaman.

Laggi’ bannya’ kabutowanna sakola’an se daddi kaparlowan se sanget ngaburuwagi. Kamar UKS, pramuka, WC, ban kamar se bisa eguna’agi kaangguy asalenan kalambi olahraga. Banne gun jareya, panas neng sabban-sabban kellas ban kennengngan laenna ella daddi PR keya ka Pa’ Dasuki.

Neng ruanganna dibi’ gun ngangguy kipas angin. Ropana, jareya hadiya se ebagi dha’ sakola’an dhari na’-kana’ se ella mare alaksana’agi PPL. Sabban taon biyasa edhatengnge na’-kana’ se aparaktek ngajar neng sakola’an.

Kagiyadan jareya gunana kaangguy ba’-coba’an kaangguy mahasiswa sabelluna dhaggi’ toron ka sakola’an-sakola’an. Sanyatana jareya sanget ekaparlo kaangguy sangona na’-kana’ se biyasa asakola neng jurusan pendidikan.

Pan-barampan pangara ella erancang neng pekkeranna Pa’ Dasuki ban ella etotorragi dha’ sadaja bakkel-bakkella se abanto lalakonna. Ongguna, pangaterro jareya ta’ coma dhateng dhari Pa’ Dasuki. Sanyatana kapala se sabelluna ngobasane neng sakola’an tao keya ngabarragi kabadha’an se kodu duli epamare.

”Taon pangajaran se anyar se bakal teba neng bulan Juli sakejja’aggi’ paneka. Pangarep dhari kaula tor sadaja ru-guru se ngajar kaagama’an onggu-onggu nyo’on kaangguy maodhi’ musolla se badha neng paddu bara’ lao’ ka’dhissa’. Utamaepon manabi ampon maso’ bakto duhur. Saenggana na’-kana’ bisa ajama’a neng ka’dhinto sareng sakanca’an. Bi-lebbi asareng ru-guruepon.”

Pa’ Dasuki laju ngadhep dha’ dhatengnga sowara se buru aberri’ pamanggi. Matana loros nojju dha’ oreng lake’ se asongot. Ropana ta’ pate seppo. Toju’ neng biriyan se nomer dhuwa’ dhari bara’. Teppa’ neng budhina Pa’ Asmoni. Sambi abarengnge mesem dhari bibirra, Pa’ Dasuki aonggu’ sampe’ tello kale.

”Enggi, sae. Badan kaula paggun nyokong dha’ pamanggi dhari sampeyan. Satuju!”

”Pramela dhari ka’dhinto, ngereng badan kaula sareng ajunan sadaja areng-sareng maranta sadaja kaparlowan dhari ana’ mored e ka’dhinto kaangguy ngadhebbi ujiyan se bakal elaksana’agi bulan empa’ paneka. Istighasa are Ahad dhateng saestona wajib etoro’e kalaban sadaja red-mored. Tor pangarep dhari badan kaula se ta’ kala wajib enggi paneka bimsus. Ajja’ badha mored se ta’ noro’.”

***

Napa’ ka romana, Pa’ Dasuki ta’ nemmo enneng. Posang ka bara’ ka temor. Li-baliyan neng adha’na labang.

”Ngereng, Ka’, atahajjud dhimen. Pola sampeyan dhaggi’ ta’ pongsa pole mekkere na’-kana’ se bakal alaksana’agi ujiyan lagguna. Du’a’agi ka pangeran ponapa se daddi berra’na ka sampeyan.”

Pa’ Dasuki apamet dha’ binena. Nenteng ettas celleng, esandhangagi. Epaterros nyandhak tanang kangan. Eseom. (*)

Songennep, 2016 

Carpan eattas epetthek dhari Jawa Pos Radar Madura (JPRM) eccaban Ahad, 5 Juni 2016