CARPAN MA LEO
JEMBAR onggu atena Subhan. Banne polana
andhi’ pesse sakobung, motor adharep, ban emmas alelet. Tape pangaterro lekkas
andhi’ ana’ sateya la tekka onggu. Ampon lema bellas taon ete’-dhante’ dhateng buwana
ate, kancana seppe. Sajjegga ala-bala bakto aomor sagame’ taon ban Tasifa,
bannya’ cara se elakone. Kadiya meyara mothak, ngangka’ ana’ tor panyo’on se
ta’ ambu sabban malemma. Samangken bakto omorra empa’ polo taon, Subhan
eparenge andhi’ poto lake’.
Menorot adat se
biyasa elakone, pettong are dhari se arembi’ kodu mabadha salametan se kalonta kalaban
sebudan ”molang are”. Nyambelli embi’ dhuwa’, madhateng bala tatangga, tor
keyae kaangguy areng-bareng adu’a’agi kasalametanna ana’.
Eker-pekker, egi’-gigi’,
nyatana berra’ onggu biyayana se ekabuto. Kadhang pesse sapolo juta atanya lambanna.
Ngenjam ka tatangga todhusssa ta’ sapera. Otangnga la nombu’, rangrang se
ebajarra. Tape, pangaterrona nyalamettagi ana’ kadhung ekaneyat modhi are.
”Dina la, Ka’, mon
pessena ta’ cokop. Kala’ se biyasa, ta’ usa gi-tenggi pangaterrona,” oca’na Tasifa
dha’ lakena sambi nganju ana’ se tangessa ta’ sakera.
”Sengko’ la kare
ajanji, Le’. Lamon andhi’ ana’ terro esalamettagina sambi nangga’a pangajiyan. Pantang pangala’ mon oreng lake’ nyalae
janji. Copa la kare gaggar ka tana. Sengko’ kodhu abukteyagi janji se lamba’
rowa,” Subhan se ajawab sambi matenggi dhadha.
”Tape, edhimma,
Ka’, nyareya pesse kaangguy jariya? Sateya bai se ekakana sengko’
apangrasa posang. Apa pole sampe’ mabadha’a pangajiyan. Dhu, talebat raja onggu,”
serrona binena adaddiyagi sorop oca’ lakena sambi ker-mekker.
”Ta’ usa bingong
ba’na, Le’, sengko’ se bakal nyare pessena. Cokop ajaga kacong ban ta’ usa
meker lanjang. Patennang ba’na sateya,” Subhan nyoba’ malae, saengga Tasifa coma
bisa neng-enneng, nondhu’ ta’ terros alaban.
Malem tera’ e tanggal
lema belles. Sonar bulan nerrangge bume. Monyena mano’ kowek aganteyan. Angen
se nyalepsep adaddiyagi cellep sagujur badanna. Bakto gapaneka Subhan toju’
bi’-dibi’an. E atas bato e babana bungkana pao. Roko’ merek Apache esolet. Ngebul
kokos ka man-dhimman. Pekkeranna posang, ngalengsang, ta’ nanto ngadhebbi odhi’
jau dhari pangarep dibi’.
Marga jembar, badha
ana’ se edhantos aon–taon. Tape rassana kajembaran aoba kasossa’an. Sabab malarat
ta’ bisa aberri’ manfa’at. Badhana coma mudarat se talebat. Menta’a tolong
ka taretan nyatana jau kabbi. Bannya’ loppa, notop mata kalaban arta. Ngenjam
ka tatangga apangrasa todhus ta’ sakera. Kerrep aotang, lonassa rangrang.
Mellas onggu
abasanna Subhan. Cethakka ecanggai ka tanangnga. Ru-garuwan e sellana, sambi
aroko’ ngebbul. Tello lencer se eabi’ coma akare bucengnga. Tape, pekkeranna
paggun ta’ nanto, ngambang ka bara’ ka temor. Dhalem kasosssa’anna, Subhan
temmo enga’ ka oca’na oreng seppo lake’na, baktona odhi’.
”Cong, mon
ba’na andhi’ settong kajembaran, senga’ ja’ kaloppae sokkore. Sabab, e modhi
are pangeran bakal agante’e se lebbi raja”.
Cethakka Subhan
eangka’ on-laon. Tandhana jembar ta’ sapera. Kapartaja’anna bakal agenteya se
lebbi raja. Saengga adaddiyagi aba’na bangal kaangguuy nyalameddi ana’.
”Mano’ se kene’
tadha’ akkalla andhi’ kamampuan nyare rajekke, napa pole manossa se ebarengnge akkal
pastena sajan gampang kaangguy nyare rajekke,” pekkerra sambi ngabas bulan se
tera’ mantellong.
Kalagguwanna, artana
se badha ejuwal kakabbi. Kadiya sape tong-settongnga, tanana epagadhi, terros rang-barang
se badha e romana. Ta’ kaeber eobuwa pole. Neyat maraja’a molang are, sambi
nangga’ pangajiyan, ngonjang keyae Khalil dhari Bandabasa.
Kaangguy nyalameddi
ana’ tong-settongnga. Buwana ate se edhante’ sampe’ aon-taon, dhalem sabbar eja-kaja.
Ta’ epekker palangnga aba’ e modhi are. Sabab kaangguy tojjuwan bisa elaksana’agi.
Neyat se kadhung ekajanji bisa etekka’agi, maske aotang pole ka tatangga ta’
kaeber. Todhus ban aep epaelang on-laon.
Saterrossepon, e
malem se ete’-dhante’ nyatana acarana talebat raja. Bannya’ oreng se kadhung
lebur, neser tor bellas padha nyakse’e jalanna acarana. Baktona tabbuwan
hadra Nurul Fata nembang ranca’ salawatan dha’ Kanjeng Nabbi.
Ana’na Subhan
epakalowar ebaddhai talam. Edandane terros egiba dha’ ajunna keyae
kaangguy ecokor sakone’ obu’na. Sambi eserrop bun-embunna, alengleng dha’ reng-oreng
se hadir sambi menta du’a.
Roba gantheng
ana’na kadiya embu’na. Loncong elong, bibir marga jerruk salone, tor ngacernang
pote kole’na. Nyamana Abdul Latif. Keyae Khalil se ngesse’e pangajiyan
amoji-moji bagussa artena dhari se kasebbut. Sambi adu’a, ana’na aherra bakal
daddi manossa alos ropa, alos oca’, ban tengkana.
Saampona acara
molang are ampon lastare, pekkeranna Subhan nyata temmo tamba posang, ngalengsang
ta’ etemmo maksodda. Sabab ana’ se ekaandhi’ ngabi’ pesse se bannya’ kaangguy salametanna.
Arta se badha egabay sarat tadha’ kakabbi etambai tang-otang se nombuk ta’ ebajari.
Kadhang peggel,
perak, apangrasa sala tor bendher dhateng aganteyan. Sabban arena tatangga se maotang
biyasa dhateng dha’ romana Subhan. Kalaban ngoso’, abenthak ban ta’
kopalang sambi ngeba parang kaangguy mate’ana aba’na. Maskena epaenga’ nyata ta’
bisa. Sabab, reng-oreng apangrasa etepo kalaban janji-janji se tadha’ buktena.
Subhan la ta’
nemmo bendher mekkere kabadha’enna. Sabban are sabban malem peggel ngala’ kareppa
dibi’. Ta’ mekker se usaha’a. Ana’ tong-settongnga jugan ta’ lopot se esala’agi,
sambi epesowe.
E bakto malem
se sorop tera’ bulan, Subhan la ta’ nemmo cara laen ngadhebbi masalana. Kalaban
ta’ mekker lanjang, ana’na se tedhung ekala’, eketeng ce’ kasarra sambi egiba
ka budhina romana, wa’-dhuwa’an.
Are’ se tajem
eteggu’ tanang se kangan. Sambi ngatela’ ka bara’ ka temor, tako’ badha oreng
se ngabassagi kalakowanna. Pramela ebaktona dhapa’ dha’ tompo’anna sarka,
ngaleng dhari bungkana perreng, ana’na esaba’ eteng. Ngangka’ are’ sagi-
tenggina.
”Ba’na, Cong,
se daddi ta’ nyamanna kaodhi’anna sengko’. Pangara bakal daddiya jembarra,
nyatana coma daddi palangnga. Mon sateya ba’na kodu narema balesanna,” ana’na
coma neng-enneng ta’ li-guliyan maskenah Subhan mera mowa ban peggel talebat. Abasanna
pasra narema bala’ dhari reng towa lake’na. Tape...!
”Ka’, apa se
kalakone ejariya? Ba’na keng mateyana ana’na dibi’ ya? Pekker kabudhina, Ka’, pekker.
Ja’ gun coma norote napsona ba’na,” ngedhingngagi oca’na binena ta’ eka-sangka are’
se eteggu’ Subhan temmo gaggar laonan.
”Astaghfirullah, astaghfirullah,” jawabba sambi nondhu’.
Carpan eattas epetthek dhari Jawa Pos Radar Madura (JPRM) eccaban Ahad, 13 Desember 2015
Tidak ada komentar:
Posting Komentar