Carpan Mohammad Toyu
BILIS agabay bengko
se tenggi. Bengko ganeko ekagabay dhalem samalem. Gi’ laggu bannya’ bilis se
pon bu-ambu ban mateppa’ tengnga. Badha se arotho’, badha se aroko’, ban badha
se minta oro’. Mateppa’ ban mabagus bengko ngabi’ ora’ bannya’.
Ratona marenta. Sakabbiyanna bilis
kodu bu-ambu. Ta’ olle ajalanan, ta’ olle sengla’an. Malle ta’ ababaja’an.
Bilis-bilis ganeko bu-ambu onggu. Tang-gentangan. Agaja’ ban bur-leburan abareng
binena.
Lis-bilis pon bannya’ se lep-ellebban. Kenyang
etamba bur-leburan kalaban binena nambai lempo se pon agattong e buluna mata.
Rato ajalan ta’ sa’-kasa’ ngalelenge karatonna se badha dhalem tana ganeko.
Rato bilis terro entara ka konco’na bengko se buru mare ekagabay. Terro
nengguwa hasella.
Pajat rato se arancang bangonna bengko
se ngolor ka ettas ganeko. E labang pon bannya’ bilis-bilis se ngantos.
Bilis-bilis peleyan. Bilis se pajat andhi’ pangormadan ban kakowadan se
laen dhari bilis-bilis se laen. Bilis-bilis se ngamba’ ganeko pajat pon eajak
rato kaangguy ajalan ka konco’na bengko se ngolor dha’ ettas ganeko.
Kalaban kodha se pon esaroju’i, Rato
Bilis ban bilis-bilis se molae gella’ pajat ngamba’ mangkat ka gudhangnga
kakanan. E gudhang ganeko pajat bannya’ kakanan se gi’ gus-bagus,
man-nyaman, ban ro’omma magaliya’an buluna elong.
Sapa se ta’ garamowana bila ngedhing ro’om
kakanan nyareddhem. Ro’omma nalbak ka elong. Taker bungkara canggana elong.
Rato Bilis ban bilis pon badha e dhalem gudhang. Gariming pon padha badha. Kaburu
se ngakana, kaburu apesta’a.
”Epabanasa laju,” oca’na settong bilis
se pon molae ngacaleyot tabu’na.
”Ta’ ehodu-hoduwa,
laju ehelena,” oca’na bilis se biyasa agiyak. Rato bilis masenga’ sopaja
ta’ nger-enger. Me’ badha bilis se ngedhing. Babaja. Pestana bakal
burung-burung bariya.
Rato bilis ngajak apesta ka konco’na bengko
ganeko. Rato marenta kaangguy nyambi kakanan se gus-bagus. Kakanan ganeko badha
se eosong ekadhuwai ban badha se ekatellowe. Jalan ka konco’na pendha sara
etembang jalan atangnga.
”Baramma siap kaangguy nae’?” Rato
atanya. Bilis-bilis se ga’-soga’ ganeko nganggu’.
”Bilis soga’ mangkat!” benthagga rato.
Bilis-bilis soga’ ganeko mangkat. Dhari
paleng baba, jalan gi’ nyaman. Atang. Nae’anna ta’ nanja’. Bilis ganeko terros
ajalan. Badha settong bilis se ngedhing giyagga rato ban leng-malengnga. Bilis
ganeko pon molae gella’ nyendhemme tengkana rato ban leng-malengnga. Bilis ganeko
terros nyendhemme dhari baba.
Bilis Sendhem ganeko gunna aonggu’. Bilis
Sendhem aenter e taneyanna karaton, akaton bingong kadibi’an. Ca-kancana se
laen tedhung anganga, ngerrok, jailla banjir. Bauna batthowang. Bilis Sendhem
ganeko paggun aenter.
Rato ban leng-malengnga paggun agiyak.
Tapegga se ngos-ngosan ta’ ekarassa karana meler antara settong ka settongnga namba
kowat.
”Rato, jalanna sajan sara, ambu gallu. Kaula
tapegga,” ca’na. ”Sampeyan ngala’ nyamanna dibi’,” oca’na pole lelere.
”Sengko’ ereken ta’ tapegga keya, apa?” Sakabbiyanna
agagak se ranyeng. Badha settong bilis maleng se roce. Bilis ganeko nyepcep
kakanan se esongguy.
”Areya ka attas kare saparona gi’an.
Buhhh… dina maske ta’ apesta, mon iya pera’ rato kadibi’an se bisa ngakan, teya
mate kakabbi,” oca’na ka kancana lelere.
”Mara terrossagi pole!” Parentana rato.
”Mayu’!”
Rato ban leng-malengnga nerrossagi dha’ ettas.
Jalanna sajan sara ban berra’. Rato paggun neret dhari attas. ”Ayuuu’. Para’
dhapa’a la. Pasoga’. Sapa oreng se soga’ bakal nemmo dha’ apa se ekaterrowe. Ja’
tedhung malolo. Dina se tedhung jarowa bakal olle jail,” oca’na rato.
”Jaggur!!!” Rato abenthak.
”Mayu’!” sawodda lis-bilis maleng.
”Gurjem!”
”Mayu’!”
”Gurdhem!”
”Mayu’!” benthagan ganeko eguna’agi
sopaja ta’ lekkas lempo.
”Jalanna banne gunna sara, Rato. Tape sempet.
Aneka kakanan se esambi raja, ta’ ennenga maso’ kose,” oca’na settong bilis.
”Jareya paleng katonna pera’. Ba’na mon
ngabas dha’ attas, gunna nengale tera’ se kene’ parana. Akaton sengko’ balakkadan
nyangka ta’ kera maso’a keya. Tape seddheng ejalane areya’ paggun maso’
ban dhapa’. Mara paksa. Mon epaksa paggun dhapa’ ka konco’na. Ja’ ngabas lobang
otaba jalanna sara mon terro ka nyaman,” ca’na se rato.
Bilis Sendhem ajagai bilis-bilis se eanggep
bannya’ pangatowanna. Epakompol ban arembak. Lis-bilis ganeko padha saroju’.
Sakabbiyanna bilis bakal kalowar dhari karaton bilis dhalem tana ka lowar.
Bakal ngolelenge bengko se ngolor dha’ ettas.
Sakabbiyanna bilis ejagai. Ekabala
parlona. Lis-bilis gunna nganggu’. Badha se laju abaladhas, badha se gi’ mandhi,
asalenan ban en-laenna. Para bilis kalowar lebat jalan se pon egabayagi mon
Bilis Sendhem. E bungkella bengko se ngolor dha’ ettas badha lobang ne’-kene’,
cokop kaangguy lebat bilis-bilis. Sakabbiyanna bilis kalowar kalaban gancang.
Badha se berka’, badha se tabarangka’.
Rato ban leng-malengnga molae arassa
tako’. Karana bengko se ngolor dha’ ettas ganeko agujek. Rato ban
leng-malengnga ambu e tengnga jalan. Paggun badha se akael kakanan bila bu-ambu
dhalem parjalanan. Kadhang bilis ganeko lako agalattong, maberra’ kancana
se laen.
Polana lako agalattong, bilis ganeko
ekacar, saengga bilis se ngakan kaadha’ ganeko gaggar. Dhalem gaggarra, bilis
ganeko tor-tabentor, robana renjem, badanna ancor, gaggar ka baba amonye ngek.
Bilis Sendhem gunna takerjat.
”Dina ma’ ngakan malolo. Ngala’
nyamanna dibi’. Maske noro’ ngosong mon laju akakana malolo, matadha’an ka bandar,”
rato gunna matao empolla. Bilis Sendhem nerrossagi lakona. Alobange bungkella
bengko. Rato arassa angen sajan tandhes. Karana bengko ganeko terros agujek.
”Mara duliyan. Malle lekkas bu-ambu ban
ngakan ka konco’na. Sakejja’ laggi’ dhapa’,” parentana rato. Lis-bilis pon
padha akompol ngolelenge bengko se ngolor dha’ ettas ganeko. Padha asandhakep.
Pada ngantos.
Bilis Sendhem nerrosagi lakona. Kare
sakone’. Rato para’ dhapa’a ka konco’na. Bengko se ngolor dha’ ettas ganeko
sajan aoleng.
”Te-ngate, angen sajan tandhes,” rato
masenga’. Lis-bilis padha ngedhing ban asorak. Rato takerjat ngedhing sowara
soragan ganeko. Rato ban leng-malengnga dhapa’ ka attas. Bengko ganeko sajan
aoleng. Kalakowanna bilis Sendhem mare. Bengko ganeko robbu. Rato ban
leng-malengnga akowak. Tako’ mate. Jaggur!
Monye robbuna bengko ganeko. Lis-bilis
asorak ban laju padha berka’ arebbu’ kakanan se esambi rato ban leng-malengnga.
Rato se ecapo’ cecce’e la’-bella’anna geddhung. Ta’ ebikes mon lis-bilis.
Lis-bilis padha arebbu’an.
Rato pajat wak-kowagan. Tape tadha’
se ngedhingagi. Rato ganeko tamba eonjep kalaban la’-bella’an. Bilis se ngacar
kancana gella’ ngoca’.
”Buh… kasta ta’ ngakan molae gella’. Kare
ngalodhu’ eber. Paggun ta’ melo. Dha-padha cara reya’a, sengko’ ngakan molae
gella’. Sela bariya todhus ekataowe tatangga ban lis-bilis se laen.”
”Palang!”
Tellasan
Reyaja 1436 H
Catheddan:
1.
Ehodu-hoduwa,
laju ehelena =
Ta’ esodhuwa, laju eselena. Eguna’agi ameler.
Carpan eattas epetthek dhari Jawa Pos Radar Madura (JPRM) eccaban Ahad, 27 Desember 2015
Tidak ada komentar:
Posting Komentar