Carpan Budi Santoso
KONCO’NA padhi
apelkot, ngarambay ka tana. Dhaunna se mangoneng, anandha’agi towana padhi.
E bun-tabun bungkana sabrang cer-noccer samaramba tenggina bi’ bungkana
maronggi.
Terrong,
rante, ban cabbi jamo maraddin tabun sabana kalaban kothakan ne’-kene’
senthek. Bungkana nyeyor masoga’
du-padduna, dhaunna biru popos berse tadha’ kalarena,
gun duggan ban cengker se dhung-ghandhung nalpe’ e pappana.
Aromasa cellep kobassa bila
reng-mereng ngala’ meddem e barungnga se badha e nga’-tenga’anna kothakan.
Sabban are Jamal ta’ tobang
nyongop ka sabana. Marga sabana aropa’agi roma se nomer dhuwa’ kaangguy Jamal.
Landhu’ ban temba se daddi kanca lakona. Landhu’ epangale gelluranna saba ban
temba ekagabay baddhana aeng kaangguy epanyeram bang-kembang emmas se badha e
bun-tabunna.
***
Teppa’na mare arebas tamenanna se
saare benteng, Jamal so-ngaso
e romana Tagur. Tadha’ laen se daddi jejjer careta salaenna peleyan bupati
e kotthana. Tagur ekataowe oreng se andhi pangaro raja dha’ reng-oreng e
kampongnga, bi-lebbi
sakabadanan.
Dhari katatakanna ban
kabajinganna adaddiyagi Tagur eabas bi’ bun-kalebun.
Ban ta’ burung pole bila la badha
peleyan kalebun maste Tagur se daddi katowa panglima kaangguy mamennangagi.
E bakto sateya, dhapa’ dha’
peleyanna bupati. Bannya’
pangraja-pangraja partai se nyemma’e Tagur. Kalaban
maksod kaangguy memennangagi calonna. Dhari tabaran
pangraja-pangraja partai banne abunga’agi Tagur. Tape,
tabaran jareya jan
masossa, marga arassa bingong kaangguy nantowagi
peleyan.
Se bara’ ban se temor patot ban
parjuga kaangguy epele, padha pantes elebbusi. Tamba are kabingonganna
tamba mabakbak marga tadha’ oreng se bisa ekagabay parembagan salaenna ngola
pekkerana dibi’.
Kabendherran,
teppa’ re-mare Duhur, Tagur katamoyan Jamal. Kalaban
panceng se samar Tagur apangara nyendhu’a esse pekkeranna Jamal kaangguy
mapona’a kabingonganna.
”Dhu,
Ka’, sanonto
mon gun kalongedanna caca se eangguy, tape
tadha’ tongketta ja’ sa-ngasae apele bupati,”
oca’na Jamal se toju’ e salongketta Tagur sambi nyergu’ roko’na.
”Nape ganeko
se ekoca’ tongket, ma’ bula
ta’ ngarte? Pola padhana tongketta Bung
Karno?” tanyana Tagur majellas kalaban
pangabasan se cora’ majerna’a aba’na se ta’ ngarte.
”Enten, Ka’,
mon tongketta Bung Karno rowa laen careta. Tape, se
ekamaksod bula neko settong saeket otaba sacethak saeket,”
jawabba Jamal sambi sem-mesem alajjane
gella’na Tagur se ngakak kantha nenggu lawa’na Ke
Sugambar.
”Buh ... mon dika
neko nemmo bai, Le’,” Tagur
ageppa’ re-lere sambi esellae gella’ se ta’ re-mare sampe’ bato’na ngelkel
marga talebat ngakak. ”Edhimma dika se nemmo
oca’ nga’ ganeko ma’ bula buru ngedhing?”
oca’na Tagur pole sambi ngabasagi Jamal se
theng-sarethengan bi’ roko’na. Tekka’a Jamal pon
ta’ alajjai agella’, Tagur
paggun se ngakak ngejjel kadibi’an.
”Kadi napa, Ka’, peleyan
se bakal dhateng neko? Pasera
se patot tor parjuga kaangguy epele?”
tanya Jamal maambu gella’na Tagur se ngakak. Kalaban tegges, Tagur ajawab,
”Bula, Le’!” sambi ngonjukkagi
tonju’na.
”Maddha
ja’ kala’ meler, Ka’, se ekerraba neko
pera’ badha dhupasang. Tadha’ nyamana dika e ghu’ussa’!” oca’na ta’ agella’.
”Nga’ neko, Le’,
bula se saongguna posang kaangguy mele pasera se
epadaddiya rato otaba bupati e kabupaten neko,”
kalaban sowara re-lere.
”Terros?”
tanyana Jamal nabang.
”Enggi pon
dinggal ja’ entar ka TPS...!” oca’na
Tagur sambi mateppa’ selana.
”Empon, Ka’, ja’
nga’ ganeko. Dika neko
aberri’ conto se ta’ sorop dha’ na’ poto. Maddha nyare jalan se teppa’ kaangguy
mele pamempen se lerres,” Jamal manglo
sambi pek-kepekkan.
***
Rammena Pasar
Daso’ paggun padhana se sabban. Reng ajuwal
juko’ e paddu dhaja ngeray, marga se melle ondur-dhateng.
E bun lao’, tongar ban tampar se biyasana
akondhang e sampayan gun kare dhubigi. Sajan e mor-temor, pasotowan
na’-karena’an pessena marga jajuwalla pon tompes sabellun pasaran obus.
Tagur se ju’-toju’ e penggirra
pakasetan, gu’-onggu’an ngedhingagi gendhingan angling sapolo. Monyena
kalenangan, kennong, kendir, ban gung mapona
atena se busen ngantos pasaranna sape. Peccot
se ekasandhang ete’-kete’agi, norodi langngoyanna gendhingan
se agarumung sambi noro’ bunte’ jalan pekkeranna se ngabang dha’ peleyan bupati.
Atena na’-karena’an kaangguy abandhingagi
ban ngakoragi bi’ pangaonenganna.
Ngedhingagi rak-orakanna
reng-oreng, pekkeranna se ngabang lebbar ban serna. E bun dhaja, Tagur
ngabasagi mobil ngennyer se macet. Sopirra kalowar dhari dhalem mobilla,
makalowar pesse dhari kapengnga.
”Pa’...!
menta’a tolong, sothokkagi mobil dan kaula se macet ka’dhinto,”
oca’na oreng se andhi’ mobil dha’ ka reng-oreng sambi ajulu pesse. Bannya’
oreng se nolonge nyothok. Ngaremmot
kantha bilis ngangko’ kacepot. Badha se asapatu, acaddhangan, akalambi pote,
biru, koneng, mera, res-leres, ban cem-macem laenna. Badha pole se daddi gella’
ka Tagur bakto ngabasagi oreng akalambi belukbuk alonca’ dhari
mobil pajuko’an lantaran nangale du’umanna pesse.
Saellana esothok kantos adherreng,
mobilla terros ajalan ta’ kantha akalakson. Reng-oreng se nolonge
asorak ban mameso, marga tadha’ sakalangkongnga. Badha pole se mamanglo, ”Ja’ la eopae pesse ma’
gi’ ngoca’a kalangkong. Neng-enneng
ja’ gan mameso,” oca’na sala
settong oreng se asongko’ tenggi ban songot merrong dhari
paddu mordhaja. Selaen serep, ta’ metto
oca’.
Ngabasagi kadaddiyan nga’ jareya, Tagur lep-kelleppan maelop
roba. Pekkeranna ngabang pole dha’ aba’na se bingong. Monyena
gendhingan ekaedhing mersa, peccotta se
asalla ete’-kete’agi aoba sodek ta’ aguli.
Cengngeng ban lo’lo’. Maske bannya’ ca-kancana
se nyapa, ta’ daddi karena’an. Marga pekkeranna
se saleng tambu, padha alettes kantha ola’
senne’.
”Maddha
ta’ ka dhalemma dika, Ka’?” sapana sala settong kancana kalaban
songot merret.
Tagur ta’
duli nyaot.
”Ka adha’, Le’,”
jawabba ta’ atole ka kancana. Saellana la abak jau, Tagur pas atole. Tolena banne
keng polana ngoloka, tape gun ngabasa ja’ sapa se ngajak.
Pareppa’na Tagur atole, badha oreng satengnga
towa jan-kerjanan pangetrapanna sapeda motorra. Tadha’ oreng se nyander,
tape reng se ngabas bannya’. Saellana eabasagi mello, pas bannya’
oreng se nyander.
”Anapa, Ka’?”
tanya Tagur sambi’ dhing-ngendhing.
”Macet, Le’”
jawabba sambi ngerjan. Tagur nyoba’ ngerjan. Saellana
ngerray pellona ngalle ka busina se etalektek agi. Kalaban ollena nalektekkagi,
”Tadha’ masala e pangapoyanna,” kalaban
tegges, Tagur nebbak, ”Neko bensinna dika se tadha’, Ka’,”
orengnga dhapa’ mokka’ baddhana bensinna sapeda motorra.
”Enggi
onggu, Le’, bensinna
asteng!” oca’na sambi le-toleyan nyare kennenganna bensin.
”Ka’emma
kennenganna reng ajuwal bensin, Le”? tanyana ngabas
ka Tagur. Tagur ta’ nyaot marga pangabasanna alengleng, nyare reng ajuwal
bensin.
”E bula, Ka’…”
saodda dhari budhina Tagur. Tagur atole sekat.
”Enggi
onggu, Ka’, ganeko
andhi’ toko se ngecer bensin,” oca’na Tagur.
Reng-oreng abungleng, padhana
oreng nenggu adduwanna ajam. Cacana enger ban badha se aserro lantaran oreng jariya
ekennal lamba’ ban
sogi tape ta’ thak-masethak ngala’ biyasana
ban kaprana, nyamana Ji Tamrin.
Sa’ellana bensinna etongtang, pas
e-starter langsung
odhi’, threng-theng-theng-theng,
threng.... threng....
Sabellun mangkat,
Ji Tamrin aga-raga ka kapengnga, kantos ajulu pesse ka oreng se
melleyagi bensin kalaban maksod ngongkosa jalanna,
tape keng etola’.
”Mator
sakalangkong gi sadajana, nyara.....!” ametta Ji
Tamrin sambi majalan sapeda motorra.
Reng-oreng pas ondur. Abali
ka kennenganna bi’-dibi’ sebang. Tagur gun pera’
gu’-onggu’an kantha nemmo andaru se rabbang.
Slopeng,
16 November 2015
Carpan eattas epetthek dhari Jawa Pos Radar Madura (JPRM) eccaban Ahad, 29 November 2015.
Tidak ada komentar:
Posting Komentar