Carpan Hasmidi
SAPA se
ta’ tako’a, ja’ malem bai asapo’ ondhem sambi ngentep
robana bulan se ngombar samporna. Petteng ta’ kalaban badha titi’-titi’
bintang. Karteka bai majau nyandhing bulan pornama. Kabbi tako’ kalowar,
mangabas aba’na.
Bariya keya e Disa Tarebung. Ta’
tao ja’ arapa ma’ bisa enyamae Disa
Tarebung. Pola keng bannya’ bungkana tarebungnga
se tombu e sabannya’na teggal disa. E bakto Majid mate laju tadha’ se kalowara
malem. Kabbi notop labang ban asapo’ salemot se kandel
parana.
Biyasana,
mon baja malem dhateng, reng-oreng padha ta’ perna e romana bi’-dibi’
ebang. Barung se badha neng partellon daddi kennengngan
samporna. Bila mare magrib, gan
settong padha dhateng ka barung se gun noguwana
biddang sagellas.
Bila ra-kera marena esa’,
reng-oreng padha dhateng kabbi. Mossa’e barung. Se dhateng ta’ gun coma reng
Tarebung, Lembung, disa tatangga laenna padha dhateng keya.
E barung reya perna nangga’
kompolanna oreng amaen dum. Neng cak-lencagan se esaba’ neng
adha’na barung, se ngadhep ka lorong celleng, dum
jareya ekamaen. Se amaen
bannya’, ta’ gun coma sarombongan. Biyasana
sampe’ empa’ ka lema’ rombongan se amaen dum.
Mon lencagga se esadhiya’agi
ta’ kabuwa’, karena se maen dum toju’ e
penggirra jalan. Otaba e amperra romana
reng se andhi’ barung. Sabban malem paggun ramme, seggut
keya badha se atokar sabarengngan sakeng ta’
sampe’ amosowan.
Tokarra biyasana karana
ta’ perna mennang se
amaen dum. Atokar sakejja’, ka dhumalemanna
ella padha akor sambi amaen pole. ”Sateya sengko’
malessa se malemma. Kare
giliranna Asmoni se eokoma. Jaba dhaggi’
asapora ka sengko’ buru bisa ambu okomanna. Mon gi’ ta’ asapora kana ella menta
ambu, sokona ja’ gi’ nedda’ pole ka dhinna’ ma’ le ta’ epapotong.” Sambi sem-mesem se ngoca’ ka oreng se
toju’ sambi ngakan ring-guring se gi’ ngokos.
Gan pokol settong barung notop.
Biddang se etoguwi biyasana ella cellep parana kaebbunan. Kadhang se amaen gi’
ta’ ambu dhari sakeng hoso’na. Loppa bakto, loppa ngantok, ban loppa
mole. Samalem sabellunna Majid tadha’ omor, se amaen
dum sampe’ tarhem buru mole. Se paggun
addreng coma Padil, Suri, Yasit, ban Rasul sampe’ ta’ edhing Majid se tadha’ omor.
Ta’ tao ja’ sapa se nangale
lu-galluna, temmo badha kabar ja’ Majid areya ”daddi”.
Reng-oreng se ngedhing laju tako’ se kalowara dhari romana.
Barung se biyasana enger dhari ri’-bari’ sampe’ tengnga
malem, sateya elang sakaleyan. Barung seppe.
Malem seppe. Labang-labang,
bengko-bengko apettengngan, calemodan.
Seyang
arena, barung ramme pole. Ella daddi tabaligga
kabiyasa’anna barung e Disa Tarebung. Se bannya’ oreng marung ella seyang
are. Bila malem barung seppe. Salaenna tadha’ se marunga, se andhi’ barung
padha keya, tako’.
”Arapa
ma’ buru sateya Majid jareya se daddi. Kan
ella olle tello polo bellu’ are. Sadhumalem kan
pa’ polo arena?” Semmo tacengnga’ ngedhingagi caretana
reng-oreng. Cora’na oreng jareya se ngakan nase’ peccel satengngana ta’ partaja
kalaban kabadha’an careta se badha neng barung.
”Sengko’ terro abukteyagina. Malem dhaggi’
sengko’ bakal entar nyendhemmana
ka koburanna. Dhimma Majid se ekobur, Buk?” Sambi
nyendhu’ nase’ se badha neng pereng belling
se etampa ngangguy tanang kanganna.
Malem petteng ajalan ngala’
sakencengnga. Monyena tekko’
se nongko’ neng ka’-bungka’an elang ta’ etemmo juntronganna. Bulan satengana
mella’ sakone’ se ta’ kalaban dheng-andheng ondhem.
Ondhem lakar earep reng-oreng. Ta’
coma neng Disa Tarebung, disa sakacamatan
ban disa sakabupaten sartana disa sapolo padha ngarep kabbi.
Neng e jauna, tello oreng se nengkong neng budhina
bet-ombet ngabassagi koburanna Majid temmo nyolet roko’ settong ebang. Matana
akeddep rang-rangrang maske etambu angen se
nyander lebat we’-lowe’na dhaun se badha neng adha’na mowana.
Ejjam se epasang neng pagellangan
tanangnga se kacer ella toju’ neng nomer settong lebat sagame’. Se epandeng
reng katello jareya tadha’ nyongop kebbulla owa’
kana. Maske bak jau dhari jasadda Majid se ebendhem,
oreng se katello bisa nangale kalaban samporna.
Ropana,
sonar bulan se gun sakone’ mokka’ bunterra bisa mapalasda dha’ gundhuganna tana
se epasange paesan dhadhuwa’ neng onjur ban olona se ngonjur dhaja lao’.
Kadhilagguwanna,
are ta’ ngombar maske ella bak aban. Ebbun gan sakone’ kerreng se nedda’
dhadhaunan ban rebba neng penggir lorong aspalan. Nyapcap ne’-sakone’ norone
dhaun sampe’ ka talanggaranna terros elang neng bungkana, ta’ sampe’ ka tana se
kerreng.
E barung, reng-oreng
padha toju’. Mossa’e katoju’an se esadhiya’agi
se andhi’ barung. Ngantos tello oreng se nyendhemme
koburanna Majid malemma. Ta’ sabbar. Jung gante gumesek, saleng abas.
”Mara
dhimma rowa oreng se katello. Sengko’ ella ta’ sabbar ngantos ja’ baramma
ollena malemma, nangale bujudda Majid apa enja’?”
”Padha,
sengko’ iya keya, ta’ sabbar.”
Eantos tadha’ eantos, se katello ta’
ngombar sakonco’na elong kana.
E Disa Tarebung sajan compet. Ta’
sampe’ Esa’ balakkadan
ella apettengngan kakabbi. Samarena oreng se katello
nyendhemme koburanna Majid sajan magariming
rassa tako’ se ella ekaandhi’ reng disa.
Se katello laju maelang dhari
disa. Dineng careta se edhantos molae laggu
neng barung ta’ napa’ tora. Tape elowaran santa’ parana careta se ella teba
dha’ reng katello rowa. Ta’ tao ja’ se kemma narema caretana
reng-oreng rowa. Dhalem bakto se sakejja’ bisa maposang
sabadhana reng disa.
”Sampe’a
bila reng-oreng e disa reya bakal ta’ tako’a pole kalaban badhana
careta se ngeba nyamana Majid?
Oreng lake’ se buru tadha’ omor aradda’ neng galadhak Songay Torjun.”
Keyae Syafi’ manjeng teppa’ neng galadhak
ngadhep ka bara’ nyakse’e kakonenganna are. (*)
Songennep,
2015
Carpan eattas epetthek dhari Jawa Pos Radar Madura (JPRM) eccaban Ahad, 6 Desember 2015.
Tidak ada komentar:
Posting Komentar