Set Wahedi |
TANG ana’,
sapora’agi ebu.
Tadha’ maksod
ebu mowanga ba’na ka alas. Ta’ soddi
ebu masra’agi nasibba ba’na dha’ ka sape. Ebu se
kemma e dunnya se tega ban rida’ apesa kalaban buwana atena?
Tape,
ebu tapaksa apesa kalaban ba’na.
Ebu ta’ andhi’
kowasa tatkala papate, utusanna tang rama, kaena ba’na, rabu kalaban
settong pakon: ba’na kodu ebuwang. Ebu molar tatkala
narema pakon se ta’ andhi’ rassa kamanosa’an jareya.
Saaellana pan-barampan
taon, ebu arassa parlo kaangguy noles careta reya. Tape,
banne kalaban maksod sopaja ba’na nyapora
ebu. Dusana ebu se mowang ba’na ta’ kera
bisa lebbar kalaban okara otaba tanges salanjangnga. Dusa paggun dusa.
Coma, kalaban okara reya, ebu
ngarep, ba’na ta’ arassa todhus
otaba keddhi’ ngadhebbi para ponggaba.
Otaba rato se ta’ andhi’
rassa kamanossa’an ban ta’ tao
artena taresna.
Sengko’
ban ramana padha ngagunge settong taresna.
Ramana banne maleng
otaba oreng sakte se bisa maso’ dhalem mempe.
Ramana areya oreng lake’ gantheng se ngagunge bannya’
pangarteyan.
Tengka gulina ce’ bagussa. Totor basana alos. Ngabas salerana,
babine’ kemma se ta’ tapengsora.
E settong
are, ramana rabu ka dalemma
ebu.
Ramana, akadiya kabar se kalonta, abareng oreng seppo
lake’na -kaena
ba’na-. Rabu kalaban mata asonar. Pajalanna alos.
Carana adhabu,
akadiya oreng nganggit ra-karana katopa’. Saellana gubar, ebu
oneng ja’ oreng seppona ramana ban reng seppona ebu aropa’agi kanca
kona. E bakto gi’ padha anom, kadhuwana
padha panggurun.
***
”Pottre,
gella’…” ramana ebu,
kaena ba’, ngabidi okarana kalaban sowara lelere.
”Oreng se
kadhuwa rowa tang
kanca. Se nyama
Prabu Pandhan ban ana’na
se anyama Raden Sepudi. Sengko’ ban Prabu Pandhan
ella akanca ce’ abidda. Sampe’-sampe’, sengko’ ban Prabu Pandhan
ella ta’ nganggep oreng pole. Tape, ataretan
akadiya kaka’-ale’,” dhabuna
rama.
”Maksod
ban tojjuwanna Prabu Pandhan dha’enja…” dhapa’
ka okara maksod ban tojjuwanna Prabu Pandhan, rama
megguk. Socana akadiya nyempen ondhem se
ce’ calemodda.
”Badha
ponapa, Rama?” Ta’ burung
pole, saabidda rama neng-enneng,
sengko’ atanya kalaban rassa waswas. Samolae sengko’ akompol, buru sateya ngoladi rama
acora’ berra’ kaangghuy abu-dhabu.
”Prabu
Pandhan terro majudhuwa ana’na
kalaban ba’na, Raden
Sepudi,” tang
rama madhapa’ dhabuna. Akadiya oreng
mowang bato sapolo kilo se nongko’ e serana.
”Tape,
sengko’ tako’, Pottre,” tang rama ambu
ta’ nerrossagi dhabuna.
Terassa bengko
e bakto asar maba jareya, acora’ sompek nyakaleyan.
Biyasana cellep elebadi
angen ser-ngelesser.
Baramma’a
pole mon la tang rama nola’ lalamaranna Prabu Pandhan.
Maskena la nganggep kenca palotan dha’ Prabu Pandhan,
tape urusan judhuna
sengko’, kaena ba’na gi’ mekker dhukale.
Tang rama tako’ Prabu
Pandhan se karaja’anna
lebbi kene’, bisa matoron darajadda.
”Enggi,
ta’ aponapa, Rama,” kalaban berra’ tang ate
ngereng kapotosanna
rama.
Tape,
jujur, Na’, saongguna e dhalem ate engko’ ta’ narema. Sebab, ramana ba’na ella
namen belta se bakal tombu bako. Ate tapengsor.
Kaangghuy matennang
aba’, sengko’ nyo’on edi kaangghuy nyeppe dha’ settong guwa.
E guwa jareya, ebu nyo’on partolonganna Se Mahakobasa. Saellana
olle tello pornama, ramana rabu ka sengko’.
Ramana ba’na,
akadiya oreng seppo lake’na, Prabu Pandhan,
lakar gu-onggu taresna kaangghuy ngabin ebuna areya.
”Pola me’ areya petoduna
Se Mahakobasa?” pekkerra
ebu e bakto ramana ngajak
akabin ta’ kalaban esaroju’i reng seppo dhuwa’.
Pan-barampan bulan saellana
akabin ban ramana, ebu agandhu’ ba’na.
Molana, tang rama ban oreng-oreng
karaton tadha’ se taowa. Tape, akadiya
ca’-oca’na banga seppo, edhimma bauna babathang se
ta’ ekaedhinga.
Saellana omor kandhunganna
ebu maso’ pa’ bulan, utusanna kaena, Pangeran
Kanton, rabu kalaban ngemban pakon. Ana’ se
badha e dhalem padha’aran
ebu,
bila laher kodu epate’e. Salaen jareya, sengko’ ta’ ebagi atemmo
ban ramana ba’na pole.
Tape,
ontong, Pangeran gi’
bellas. Papate se eutus
sareng rama ta’ tega se mateyana
ba’na. Papate gella’ gun coma’
mowang ba’na ka tengnga alas. Tape,
se paleng manyake’ atena ebu banne
baktona ba’na epateyana otaba ebuwang.
Ja’ sakenga ba’na epate’e baktona
laher, pola ebu bakal noro’ seda keya.
Caretana saellana ba’na ebuwang ban ebu apesa
kalaban ramana se ce’ ta’ adilla. Ebu, ramana,
ban ba’na, edhalem caretana oreng-oreng karaton se ta’ soddi ka sengko’,
eompama’agi oreng-oreng se ta’ bajjra.
Edhalem careta se ekarang kaangghuy
notobi aibba karaton, sengko’ kalaban ramana
atemmo ban ajima’ e dhalem mempe. Ramana eompama’agi bintang gaggar
ka dhalem mempe.
Karana bintang jareya,
sengko’ daddi agandhu’ ba’na. Kalaban caretana sengko’ se ngandhung
karana bintang, reng-oreng karatan ngarep marga sare nganggep
ja’ sengko’ ban ramana areya oreng sakte. Dhari
sakeng saktena, ba’na esebbut menangka ana’ se elaherragi
ta’ kalaban ajima’.
Ba’na tao, arapa ebu ma’ ce’
sake’na mereng careta reya? Sabab, ebu
partaja, mahlogga Pengeran se elaherragi
ta’ kalaban ajima’ coma badha dhuwa’
oreng. Iya areya Nabi Adam ban Nabi Isa.
Careta laenna se masake’ tang
ate, iya areya caretana ba’na se esosowe
sape. Sampe’ sateya ebu gi’ ta’ bisa narema.
Baramma
carana sape bisa adulangagi konco’na sosona ka
colo’na ba’na.
Ba’ bisa’a
korbina empe’ mangendhep soko budhina kaangghuy
masemma’ konco’na sosona dha’ ka colo’na ba’na? Ba’ bisa’a sape ngator
sokona kaangghuy ta’ adidda’ ba’na?
Tang ana’, engko’ noles careta
reya lebat tanangnga settong oreng lalake’ se gi’ ta’ narema ja’ sengko’ reya ngandhung
ta’ kalaban ajima’. Reng lake’ se arassa sossa kalaban caretana ebu se ngandhung
karana egaggari bintang ban ba’na odhi’ kalaban
esosowe sape.
”Sengko’
yakin, bintang eguna’agi kaangguy notobi
aibba karaton,” karettegga reng lake’ jareya ebaktona
ebu nyosop dha’ sokmana. (*)
Carpan eattas epetthek dhari Jawa Pos Radar Madura eccaban Ahad, 11 Oktober 2015.
Tidak ada komentar:
Posting Komentar