Hasmidi |
SEGGUT atanya
dhari dallu, arapa keya epadaddi enga’ reya?
Sabban katemmo neng lorong, babana tabun se ondhung ka lao’, manyongkem mowana
nalekteggi garigi’ se ajajar neng soko kangan-kacerra.
Asandhal jeppet, atoles Swallow
barna mera babana. Dineng attassa abarna pote.
Sapa se madaddi moso kadhuwana?
Mon enga’ ka asal molana, tadha’ se bangal kaangguy mapesa tan-taretanna
kakabbi. Sale-olle egellu’a kakabbi dhalem settong roma, epajunge genteng otaba
ata’ dhari anggidanna janor.
Ta’ sakone’ reng-oreng ngoca’, ”Ambu
bai ja’ acarama, manyareng spiker gu-laggu sampe’ lem-malem. Jareya tadha’
gunana mon gi’ lalakona padhana jareya. Dhimma
badha sataretanan reya amosowan? Buru nemmo bangsana keyae enga’ jareya pas ta’
akor kalaban bala-balana.”
Banne gun coma mowang mowa bila
atemmo otaba tageppok neng jalan-jalan. Se lebbi matacengnga’
iya areya bila apolong neng tahlilan. Polana bila neng kompolan ta’ ekacatora
pole. Badha keya settong kompolan se ambu ta’ ajalan pole. Neng masjid iya
keya, acora’ apethak dhuwa’ antara Dusun Tengnga ban
Dusun Solo’. Padha addu buggik bila apolong
neng settong kennengan.
Ana’ se dhari Kampong Tengnga
ta’ epaolle asakola ka Kampong Solo’, bareya keya sabaligga. Oreng se asakola’a
ka Kamppong Tengnga mon dhari Kampong Solo’ ta’ eolleyagi.
Sakeng gun ta’ aperrang addu adha’.
Sanyatana dhuwa’ dusun reya ella
padha anga’. Sateya ella ta’ etangale pole kol-kompolan se lebur areng-bareng
satatangga, sakanca’an, ban sabala’an. Sanyatana areya gun coma
epangarowe kalaban badhana keyae se badha neng dhuwa’ kampong,
padha ngarebbu’ kakowasa’an.
Neng rung-barung seggut ekacaca
sabban-sabban lalakon se badha neng kampong. Dhari mabadha tahlilan, kompolan,
salameddan, tellasan, ban laenna. Acora’ tadha’ patengnga
se teppa’, sakabbiyanna padha sala. Tengnga
ban Solo’ padha. Padha nyare kasala’an ban-sebang.
Se gun coma tahlilan ta’ laju epakane
ella ekabanta. ”Bundu’an, sengko’ nangale dibi’ ja’ gun
juko’an pera’ tahu tempe moso tellor eseba’. Dhu arapa maskeya ta’ atahlil mon
gun eberri’ana tahu tempe ban tellor saseba’. Neng roma tedhung bai olle bila’
sacangker.”
Bakto gi’ laggu,
samarena asobbu, Saulla entara manceng
neng bates. Sanyatana neng bates jareya tadha’ juko’ se etangale. Gu-ongguna
Saulla se ta’ nemmo lako, epalagguwi entar ka bates sambi nyambi panceng se
ekagabay dhari eradanna perreng keles. Kateggu’anna bungkol bak raja.
Dineng ekonco’na acora’ padhana se tajem. Kene’.
Sambi eleledi sennar ban etoro’e
kaba’ se epabilu’, tajem, badha pangae’anna. Saulla toju’ masepa’ neng bato se
ngampar lecen, berse, ban lonyo. Ta’ ngangguy lama’ gun coma
acaddhang anggidan dhari darameyan se
epakerreng, segek.
Toju’ ella lebbi dhari saejjam,
Saulla paggun hoso’ ka poncana panceng se satengnga meter
dhari se eteggu’.
”Saulla!”
sowara nyenthak dhari morlao’, kaedhinganna kaburu. Etambai kalaban nyaba
ngangsor. Nyabana kalowar ka dhalem
ate-gante ru-kaburu. Dhadhana ka attas ka
baba, kelbu’na etangale dhari budhina kaos celleng se agambar oreng nompa’
sape. Oreng meccot sape se buru. Sape kerrap.
”Pola
reya dhateng ngerrap, nyabana santa’ enga’ se eburu sape e dhadhana,”
pekkeranna eolem neng babana obu’na se celleng.
Saulla tacengnga’
dhari ologan se buru ekaedhing teppa’ ka lobang kopengnga
se kacer. Panceng perrengnga taocol sakaleyan, egiba buru aeng
santa’ se agili noro’ ka lembana.
Dhari baba tabun, Saulla adhanga ka oreng se akalambi
celleng se buru ngolok.
”Apa? Ba’na
acora’ oreng se etabang sape gila, buru ta’ kapra,” sambi
asap-osap ka kalambi bati’na se aberna biru butol ales-toles neng-koneng ban
ru-biru dhaun.
”Ella,
ba’na sateya kodu duli mole. Sengko’ buru ebalai Nom Sale ja’ ana’na ba’na
badha e puskesmas. E pasar buru ce’
rammena. Bannya’ oreng adungngo’ ka ana’na ba’na,”
terros alerpo’, ta’ tao ja’ se etoju’i beddhi dhari li’-giliyanna
aeng ba’a.
Ta’ mekker pole dha’ aba’na,
Saulla buru masanta’ dha’ dhaja nojju ka puskesmas e bara’na pasar se gun mukka’ saduhur.
Enja’ apa se badha neng dhalem pekkeranna Saulla saenggana buruna ta’ kenneng
tabang oreng laen.
Jalan se aluk-biluk acora’ ta’
padha ban biyasana. Sajan jau ban malanjang parana. Jalan se
satengngana aspalan laju ebalas kalaban soko se ta’ asandhal, ta’ kalaban
asapatu. Sokona gun eocol coma. Saratos meter e lao’na pasar Saulla tajalerret
ka baliker kene’,
para’ labuwa.
”Areya’
eppa’na ella dhateng, Saulla dhateng! Berri’i lebat. Menggir, menggir, menggir!”
Dhari bilugan se lu-gallu e bara’na pasar Saulla etangale nengteng
sandhalla se dhadhuwa’ neng tanang se kacer. Tengka’na laon, ta’ buru pole.
Oreng se ngandheng e labangnga
puskesmas laju meyak manangale ana’na
Saulla se epatedhung neng lencak besse kasorra esasape kaen biru pellay.
”Arapa
ba’na, Cong?” Sambi ngosap bun-embunna ana’na. Obu’na
esot-gusot on-laon ka attas ka baba ngangguy tanang se kacer. Sokona paggun
epabangkang, sandhalla eocol teppa’ neng bibirra labangnga puskesmas. Atompo’
ban sandhal laenna. E lowar, reng-oreng
padha akoto’ ja’ esarempet sapedha.
”Mara se
laen ja’ gun diyem, onga’, kalaba sateya reng ella badha
Saulla. Sengko’ ta’ abilla’anna
sapa-sapa mon sateya. Bila sala paggun epasala. Kabala ja’ sapa
se sala. Mon tako’, Suri Kampong
Tengnga ngadhebbanna,” Suri ca’-ngoca’ sambi ngabas ka lao’
neng adha’na labang. Matana mera bak becca.
”Ampon,
Pa’. Ja’ nger-maenger neng ka’dhinto,” oreng
se akalambi pote kalowar dhari dhalem kamar settonganna nyambi panyontigan se
ella badha essena e dhalem, abarna mera bak
benneng.
”Kalebunna
kodu tao,” Saulla
onga’ gan sakone’. Ngabas ka Suri se nyandhar ka adegga labangnga
puskesmas.
”Dina
ba’na ta’ osa ro’-noro’, sengko’ se entara kadibi’ ka kalebunna. Sengko’ ta’
bas-ngabasa kalebunna ko oreng Tengnga otaba
Solo’. Bendher kalebunna reya romana epaddhek neng Solo’, tape sengko’ reya
ra’yadda kodu epapadha ban reng Solo’. Kodu adil!”
tambana. (*)
Carpan eattas epetthak dhari Jawa Pos Radar Madura eccaban Ahad, 25 Oktober 2015.
Tidak ada komentar:
Posting Komentar