Emmas Biru

Ma Leo

SONAR are se tera’ manggang bume. Sabab, nemor se lanjang, nambara’ ta’ ngombar dhalem pangarep. Maske ka’dhinto, reng-oreng neng Kampong Masaran rassana asokkor se talebat. Pangaterro bakal ngaolle pesse se langkong bannya’ paste kare adhante’ bakto.

Sajjegga argana bako agandhu’ arebban raja e bingkeng are, laju bannya’ oreng kadharuy namen, amarga giyar dha’ hasel se ekaolle. Manabi pojur, namen bako, hasella pajat bakal lebbi bannya’ dhari bandhana.

Tabaligga, lamon palang, namong nyadhang rogi. Sabab bandha se ecabbur balina ta’ saparo. Atane bako paneka saestona kalakowan malarat. Kalakowan se kodu ebandhai. Banne namong bandha pesse otaba barang. Tape, bandha pangalaman otaba pangataowan.

Saestona, tamennan bako ka’dhinto ampon abit ekaonenge tor etamen sareng oreng. Namong, sajjegga bannya’ brik-pabrik apaddek, kabutowan jugan atamba.

Molae reng-oreng padha asa’-longsa’ se namenna bako. Ngalecer dha’ kaontongan se bakal etarema. E dhalem pekkerra, saba otaba teggalla lamon etamenna padhi so jagung ontongnga ta’ sanapaa. Pajat ta’ sakone’ oreng se pojur amarga atane otaba namen bako. Mala, dibi’na sampe’ kellar maddek roma, melle saba otaba ongga ajji.

Kasabut Sodikin, lalake’ se ampon seppo omorra, ra-kera sabidak taon, kateppa’an badha e tengnga teggalla. Nyeram bako wa’-dhuwa’an abareng Sumiyati, binena. Maskena panas talebet, se kadhuwa ta’ sorop kaangguy nerrossagi lakona.

Pangaterro ngaolle pesse se bannya’ daddi tujjuwanna. Ana’na, Zaini ban Zahra ampon para’ se awisuda’a. Se jellas, paggun ngabutowagi pesse se ta’ sakone’. Napa pole otangnga ka Pa’ Kalebun Jarwo ta’ duli mare-mare.

Janjina, dhalem bakto dhubulan pesse bakal abali. Tape, bila janjina lopot, se jellas artana se badha bakal ekala’a paksa. ”Sum, ba’na hajadda apa mon pojur tane bako reya?” Sodik atanya ka binena bakto ngaop e babane bungkana pao.

”Dhu, Ka’, pangaterro kaula talebat bannya’ mon etong­-bitong. Terro gadhuwana motor, mateppa’ roma, pas terros melleya kalambi se gus-bagus. Tape, kaula kapekkeran ka Zaini ban Zahra. Kadhuwana samangken ngobutowagi pesse se talebat bannya’. Neser lamon ta’ lulus asakola,” oca’na Sum kalaban mamellas.

”Pas terros, otang ka Pa’ Kalebun dha’ramma?” tanya Sodik.

”Otang se jellas paggun otang, ta’ kera aoba. Tape, katembang otang ganeka, lebbi bagus nyamporna’agi kabutowanna ana’,” Sumiyati ropana enga’ se peggel. Ta’ tarema ana’na ta’ eken-reken.

”Bendher onggu oca’na ba’na, Sum. Mon dha’iya mayu’ pabajeng alako. Pola bakto se bakal dhateng, Pangeran apareng rajekke se bannya’,” Sodik ta’ malanjang parkara, kobater adaddiyagi tokar.

Saellana badha bak-rembak se jellas Sodik moso Sumiyati, kadhuwana sajan bajeng alako. Saare benteng kadhang baktona eabi’ e tengnga teggal, ta’ le-moleyan sampe’ lakona mare. Kadhang nyeram, mate’e ola’, mowang bu-tumbuwan, ban salaena.

Saamponna bako aomor dhubulan pas molae ngembang. E bakto sapaneka konco’na bungkana bako molae etoko’. Kalakowan nyeram ban abuthok ekorange.

Sabulan saampona noko’ dhaunna bako bisa epetthek. Metthek dhaunna bako ekala’ dhari se paleng baba terros ka attas.

Dhalem ajalane kalakowan arabat bako, Sodik raja pangarep bakona bakal ngasellagi pesse se bannya’. Bisa epajau dhari gangguwan alam tor se laen. Otamana akadiya ojan. Sabab saampona bako eseksek pas etata e attas saksak kalangguwanna pas temmo badha ojan, adaddiyagi argana bako modha bila etabar. Kadhang bisa ta’ paju. Kabadhaan gapaneka se langkong ejaga Sodik.

Kadhang seyang-malem ta’ tedhung. Mekkere bakona bisa ngontongagi. Ca’-oca’ dhari Kalebun Jarwo se talebat tama’ dha’ arta tor ta’ mekker kabadha’an masyarakat e kaenga’e pole.

”Sodik, ba’na bisana coma ajanji ros-terrosan, tadha’ buktena. Mon paggun enga’ reya kalako’na ba’na, ja’ sala’agi sengko’ mon maksa nagi pesse dha’ ba’na budhi are,” oca’na talebat peggel.

”Tore, Pa’ Kalebun, badan kaula lakar ta’ gadhuwan obang samangken. Napa pole Zaini sareng Zahra ngabutowagi pesse bannya’ kaangguy wisudana,” Sodik tanangnga nadha sambi nges-tatanges.

”Cuih….! Sengko’ ta’ ngabutowagi tangessa ba’na, Dik. Sengko’ buto pesse, pesse, pesse,” cacana Jarwo sajan tenggi.

”Enggi, Pa’, enggi, kaula ngarte, tape…”

”Alah…….ta’ usa pe-tapeyan pole. Se jellas, samarena osom bako, ra-kera dhubulan se bakal dhateng sengko’ bakal dha’enna’ pole. Misalla pessena tadha’, ba’na ban kalowargana pas kalowar, ondur pajau. Sabab, romana daddi gante dhari otangnga ba’na. Kaenga’e jareya! Sengko’ ta’ kera ngulangana pole.”

Tangessa Sodik sajan daddi, posang nantowagi jalan se bendher. Etamba ana’na, Zahra ban Zaini, bakal ta’ asakola mon ta bisa majar. Settong jalan se bisa earep, coma dhari hasel tane bakona.

Saampona etata e attas saksak kaangguy ejemmor panassa are talebat terrang. Rassa jembar abasanna ekaandhi’ Sodik. Arebbanna bakal daddi kanyata’an. Tape, marena adan Duhur panassa are molae sorop. Petteng calemodan kadiya bakal gaggara ojan.

Pekkerra Sodik molae posang. Ka bara’, ka temor ta’ nanto. Nyo’on ka Pangeran kabadha’an bisa panas pole.

Sampe’ adan Asar, kabadha’an langnge’ paggun petteng ta’ aoba. Se ros-terrosan maskena adan Mangrib. Ontongnga, ojan ta’ gaggar.

Kalagguwanna, panassa are molae tera’ pole. Rassa jembar dhalem atena Sodik ta’ bisa epangaleng. Sambi nyo’on se talebat, panassa bisa terros tera’ sampe’ baktona ajemmor bako cokop.

Bakto malem, ra-kera pokol sanga’, bako se la cellep pas terros ebundu’ ngangguy teker dhari dhaunna tarebung. Hasel bako se ampon eebbali olle dhadhuwa’ adaddiyagi odhi’ Sodik jembar se talebat. Coma adhante’ dagang se bisa melle bako se bagus.

Saampona tello are, nyatana dagangnga korang ngalecer dha’ bakona Sodik. Sabab, bakona Sodik ekoca’ korang akor kalaban kabutowan pabrik roko’ se badha. Kadhang tabaran argana modha, jau kalaban bandha se epakalowar. Saellana eker-pekker, aherra Sodik ajuwal bakona maske argana ce’ modhana.

Sossa tor bingong ampon badha neng pekkeranna Sodik. Napa pole Pa’ Jarwo bakal dhateng nagi otangnga. Sabban are terros Sodik nyare cara kaangguy ngatase masalana.

”Sodik, sateya sengko’ dhateng pole. Edhimma janjina ba’na se majara otangnga?” Cacana Jarwo tenggi kalaban mata se rangrang akeddep. E seddi’na empa’ oreng se talebat raja badanna.

”Ka’dhinto obangnga Pa’ Kalebun,” oca’na sambi ngetter.

”Dik, pessena ma’ korang bannya’? Edhimma kakoranganna? Ooo… ba’na ma’ co-ngoco sengko’, ya? Jumad, Marmo, oja reng-oreng se badha neng roma reya.”

”Saporana, Pa’, saporana,” bandanna ta’ bisa nola’ kareppa Jarwo. Sambi nges-tatanges Sodik kalowar dhari romana ebarengnge kaluwargana e budhina. (*)

Carpan eattas epetthek dhari Jawa Pos Radar Madura (JPRM) eccaban Ahad, 18 Oktober 2015.