Pangarep se Agantong

Ma Leo

           

RAHMAN aromasa jembar abasanna. Ka bara’, ka temor, ka dhaja, ka lao’ ta’ bu-ambu nyebbut nyamana Neng Aisyah. Babine’ se ampon macellep atena, adaddiyagi taresna sabban arena.

Sabab se molae lamba’, ete’-dhante’ bisa kaangguy males taresnana. Ta’ eka-sangka e bakto acara haulla Ke Masduqi, se majaga pondhuk, Neng Aisyah anyata’agi andhi’ rassa neser tor taresna dha’ Rahman.

Bakto acara ka’dhissa’ Rahman andhi’ jadwal kaanngguy ato-banto makalowar dha’aran dha’ undangan se rabu. Jumlana cokop bannya’, ra-kera ebuwan oreng. Aropa’agi settong kawajiban dhalem ato-banto Keyae Syuja’e, pottrana almarhum Ke Masduqi. Sabab Rahman aropa’agi santrena se ampon sapolo taon apareng elmo tor jugan ngajari ahlak se bagus.

Kasempatan tatemmo sareng Neng Aisyah baktona ngala’ biddang e dhapor. Babine’  manes ropa se emaksod parappa’na nowang biddang ka cangker. Rahman se ampon talebat taresna laju ngoca’agi maksod atena. Pojurra bannya’na oreng se ato-banto ta’ aganggu dha’ maksotta Rahman.

Nyatana, ta’ eka-sangka Neng Aisyah jugan aromasa taresna dha’ ka Rahman. Kalaban dhus-todhus, Neng Aisyah lekkas nyengla dhari Rahman saamponna masteyagi jawaban.

Dhari kadaddiyan acara ka’dhissa’ perasa’anna Rahman sabban are pas ta’ nanto. Ropana Neng Aisyah seggut aganggu pekkeranna. Bakto ajiyan ketab, sakola diniya, sakola formal, tor bakto-bakto se laen, abasanna ta’ jekjek. Kadhang agella’ kadibi’an, nanges, acaca ta’ jellas maksotta.

Sodik, kanca pondugga se paleng semma’ dha’ Rahman, daddi bingong. Ngabassagi kalakowanna se ampon bannya’ aoba tor laen dhari sabelluna. Ta’ kalaban mekker lanjang Sodik atanya onggu karebba Rahman se bendher.

”Man, ba’na arapa sateya ma’ abasanna laen dhari se sabban arena?” Sodik atanya sambi ngajak Rahman toju’ e babana bungkana comara odhang.

”Sengko’ ta’ arapa, Dik, ta’ usa kabingong tang kalakowan reya,” jawabanna Rahman sajan mabingong Sodik.

”Rahman, Rahman, ta’ usa dhus-todhus, sengko’ kancana ba’na, pas koca’agi se saongguna. Sengko’ dhaggi’ paste bakal abanto dha’ masalana ba’na,” Sodik terros maksa Rahman ma’ le jujur.

”Sengko’ sateya bingong, ta’ tao arapa tang ate pas taresna dha’ Neng Aisyah, pottrena Keyae Syuja’e.”

”Sip, Man, sip. Sengko’ ce’ adhukungnga ka ba’na. Pas terrossagi ta’ usa dhus-todhus. Mon parlo terros penta ka abana.”

”Dhuh, Dik, sengko’ aromasa cangkolang daddina reya.”

”Ma’ pah dha’iya? Katembang ba’na ngalakone ma’seyat, lebbi bagus pajujur bai ngadhep ka Keyae Syuja’e.”

”Dha’remma ya?”

”Ta’ usa bingong, pas terrossagi. Senga’, kasempatan ta’ kera aulang dhukale.”

Marena tao oca’na Sodik, pekkeranna Rahman sajan ta’ nanto. Ebang-tembang, nyatana bendher onggu. Maka, saellana andhi’ kasiyapan kaangguy ngadhep dha’ Keyae Syuja’e, Rahman laju matennang pekkeran sambi terros adikker ngarep hajat bakal daddi kanyata’an.

Teppa’ e malem Juma’at manes pokol 20.00, samarena salat Isya’, Rahman ampon badha e adha’na dhalemma keyae.

”Assalamualaikum,” oca’na.

”Waalaikum salam, ba’na, Cong? Mara maso’ pas pateppa’ toju’,” Keyae Syuja’e  langsung apareng edi dha’ Rahman.

”Badha apa ya, ma’ buruwanna ngadhep ka sengko’, pola ba’na andhi’ hajat?” Rahman aromasa todhus ka petanyana. Tape, sabab pangaterro se talebat raja, Rahman terros maksa kaangguy bisa.

”Cabis pamator ka’dhinto, sabellunna abdina cangkolang manabi badha ca’-oca’ se korang sae monggu dha’ Ajunan,” oca’na Rahman.

”Iya ta’ arapa, badha apa?”

”Abdina gadhuwan hajat terro adaddiyagiya Neng Aisyah, pottrena ajunan, daddi se halal monggu ka abdina. Kadi ponapa ka’dhinto, etarema ponapa bunten?”

Keyae Syuja’e ta’ langsung ajawab dha’ petanyana Rahman. Tape, buru maso’ ka dalemma. Rahman apangrasa bingong daddina. Ta’ sampe’ abit baktona, keyae ampon rabu pole. Mateppa’ longgu, tennang salerana.

”Cong, ba’na andhi’ bandha apa kaangguy menta tang ana’?” Rahman sajan bingong ngadhebbi keyaena.

”Sengko’ banne ta’ narema’a dha’ ba’na. Tape ba’na kodu pangarte, oreng akabin reya banne pang-gampang. Bannya’ kabutowan se kodu elaksana’agi, padhana pesse, elmo, mental, ban salaenna. Sengko’ ngabassagi ba’na laggi’ korang dhalem elmona. Apapole masala agamana. Dina, gun polana judhu ta’ usa pekker lanjang. Pateppa’ gallu neyatta, pabannya’ gallu bandha elmona, buru mon samporna ngadhep pole dha’ sengko’. Insya Allah mon judhu tang ana’ ta’ kera buru ka se laen.”

Rahman coma bisa nondhu’. Ta’ ngangka’ cethakka polana tudhus. (*)

Carpan e attas epetthek dhari Jawa Pos Radar Madura eccaban Ahad, 6 September 2015