Sanajjan Are Abarna Dhara

radarmadura.jawapos.com

Carpan Avan Fathurrahman

TA’ kapangrasa, are pon temmo beddhuk. Panas rassana terbas ka bun-embunan, tape paggun tadha’ artena bila enga’ dha’ robana dika, Le’ Saskiya. Pamesemma. Pajalanna. Palembayya. Patoju’na. Sakabbiyanna guli enneng ban pola tengkana dika se alos tadha’ pabandhinganna.

Bula ta’ tao Le’, ba’ sampe’a bila ate se rengsa’a. Re-saare coma lako enga’ dha’ ka dika. Ngakan ta’ kobassa. Tedhung ta’ pate ngeddha. Sepat abali’, se paddhang coma robana dika, Le’ Saskiya. Mon paggun rassana bula ekagila’a. Aneko se ekoca’ oreng palang ta’ kenneng alang.

Bula gi’ enga’, Le’. Lamba’, para’ asar dika dhateng ka bula. Molanna bula ta’ apangrasa ja’ dika se dhateng senga dika ta’ lok-ologan. Sabab bula pareppa’na marengkes darameyan. Bakto ganeko nemor pon para’ ondura. Ondhem celleng molae alung-gulung dhari bara’. Angen molae santa’. Nandha’agi sakejja’ aggi’ bakal maso’ ka osom nembara’.

”Ka’... Ka’ Suraji... Sampeyan gi’ ta’ lastare kalakowanna gi?” oca’na dika bakto ganeko sambi nga’-ngara’nga’. Bula takerjat. Ate yal-taseyal, polana dika ta’ tao dhapa’ ka saba bula. Napepole sowarana semmo abak perrat.

”Dika dhimma tao ja’ bula badha e dhinto, Le’?” e dhalem kabingongan, bula gi’ ngoddi matennang aba’.

”Kaula atanya ka Man Sujahra, Ka’,” saodda dika.

Ta’ padha ban biyasana. Robana dika acom, Le’. Acora’ bannya’ pekkeran. Molae ban sabbanna, biyasana dika mon atemmo ban bula lako ngesem. Tape sanonto bida parana.

”Bula bak heran, Le’, polana dika ta’ biyasana mara neko. Ban pole anape dika ma’ katon sossa parana? Molae gella’ bula ta’ nangale dika ngesem tekka’ sakone’.”

Dika maddek, Le’ Saskiya. Serep. Ta’ metto oca’. Coma dhangdhang ara se ngakaok. Nyalaot dhari bara’ dhaja. Bula tababeggen. Talgas ate nangale aeng matana dika motemmo agili e pepena. Nyapcap ka tana kerreng e saba bula. Ngabiyas buluna kole’ bula ngedhing dika sajan sasergudan.

”Badha nape se saongguna, Le’? Anape dika ma’ temmo nanges?” saongguna bula terro se arekkebba dika, Le’ Saskiya. Terro egellu’a epaserredda olle ambu se nanges. Coma bula gi’ enga’ ja’ dika ban bula neko gi’ oreng laen. Banne lake bine. Bula ban dika pera’ padhana bulan ban bintang. Coma bisa saleng pandeng. Saleng abas ta’ bisa saleng nenggu’.

”Ka’, rassana kaula ban sampeyan kodu apesa...” bula takerjat ngedhing oca’na dika.

”Nape, Le’? Ngoddi’ koca’agi pole, Le’, pola bula sala paedhing.”

”Bunten, Ka’, sampeyan ta’ sala mereng. Nyo’on sapora. Sakeng rassana kaula banne judhuna sampeyan.”

”Ba, anape, Le’? Jajal dika acareta, badha nape se saongguna,” ate rassana talebat panas ngedhing kabar ta’ nyaman dhari dika, Le’ Saskiya. Bula sakone’ bannya’ paggun ta’ parcaja, ba’ bendherra aneko dika se ngoca’ e adha’anna bula. Sabab, bula ban dika banne gun ajanji, Le’. Tape pon asompa dha’ Se Kobasa, ja’ bula ban dika padha’a saleng esto. Pas sanonto teng-dateng dika temmo ngoca’ kodu apesa. Bula paggun ta’ narema, Le’. Dhalem ate paggun ta’ nanggama.

”Ka’, bari’ malem, kaula ampon apareng oneng da’ eppa’ sareng embu’, ja’ sampeyan alamara kaula. Lastarena acareta, eppa’ ngolok paman sareng kae kaangguy aparembagan. Estona eppa’ sareng embu’ ampon padha saroju’. Mala talebat bungana amarga sampeyan kabitong lanceng se bajeng tor becce’ pola tengkana. Lastare mondhuk tor matotok sakola’an,” dika ambu sakejja’ sambi molet aeng matana.

”Saamponna ka’dhinto, eppa’ mareksane asmana sampeyan. Kantos jugan mareksane katerbi’anna sampeyan. Kaula apareng oneng, Ka’, asmaepon sampeyan Mohammad Suraji, seddheng katerbi’anna are Kemmes. Lastarena ka’dhinto, kaula pas entar ka embu’ e teppas. Nolonge nganggi’ orongnga topa’. Karana bak jau, kaula ta’ oneng ponapa’an se ekarembak eppa’, paman, sareng kae. Abit sakejja’, kae maso’ ka dhalem. Neng-oneng kalowar abakta ketab kona. Ca’epon embu’, ka’dhinto ketab mujarraba otaba parembun kona sangkolan dhari juju’. Dhari parembun ka’dhinto, kaula sareng sampeyan eaddu sasatonnepon. Kaula ta’ oneng kadiponapa carana. Coma saamponna ka’dhinto, eppa’, paman, kae, padha alenga’ dha’ kaula. Eppa’ pas adhabu on-laon. Ca’epon eppa’, sasatonna kaula sareng sampeyan ta’ bagus. Sampeyan katerbi’anna are Kemmes, seddheng kaula katerbi’an are Satto. Metorot panengguwan ka’dhinto ce’ juba’na. Manabi eterrossagi, sala settong reng seppona kaula badhi adinggal omor gi’ dha-ngodha.”

”Kaula takerjat, Ka’. Ate talebat seyal. Ta’ oneng ja’ kodu baramma. Kaula pera’ bisa meddek. Embu’ temmo agellu’ kaula sambi nanges, menta tolong kaangguy maburung maksod sareng tojjuwan kaula sareng sampeyan.” Dika paggun sasergudan, Le’. Seddheng bula ta’ tao kodu baramma.

”Dhari bingongnga, kaula ta’ oneng kodu acareta ka pasera, Ka’. Dhuware kaula ngampet, ate rassana padhana ecacca. Melana kaula pas entar ka sampeyan. Kaula ta’ terro se apesa’a sareng sampeyan, tape kaula jugan ta’ mangga bila enga’ ka panangessa embu’ sareng pangemmessa eppa’.”

Bula tababeggen ngedhing caretana dika. Napepole nangale aeng matana dika se sajan derres agili, padhana ojan nembara’. Bula lempo nyakaleyan, Le’. Ra’-ora’ padhana se elolos. Bula tatoju’ ta’ ekarassa. Sake’ rassana ate ngedhing kabar dhari dika, Le’. Ate, rassana banne coma ancor, tape ngarbu’ padhana abu tomang. Aeng mata ngalancar ta’ kenneng tamba’.

”Kaula nyo’on sapora, Ka’?”

”Ta’ anape, Le’. Coma, se kodu ekaenga’e, se nantowagi judhu neko Pangeran, Le’. Banne tong-bitonganna manossa. Barinto jugan se nantowagi ajal neko Se Kobasa. Omor neko ta’ ekenneng panyander, ta’ ekenneng panyorot manossana. Bula, dika, eppa’, tor ebuna dika pera’ ajalannagi takdir. Daddi maddha ja’ parcaja ka tong-bitongan ganeko.”

”Ka’, kaula ban sampeyan odhi’ e disa. Adat, pola tengka, guli enneng, kodu ajummoronge lalampanna reng seppo.”

”Bula ngarte, Le’. Tape poko’ dika paggun neser ka bula, bula nyareya parembagan laen. Bula nyabisa dha’ keyae e pondhuk. Anyo’ona tolong kaangguy alamar dika dha’ reng seppona. Pola kalaban mara neko, bula ban dika paggun bisa daddi judhuna, Le’.”

”Ka’, sampeyan gi’ ta’ oneng bannya’ kadiponapa panggaliyanna kae, eppa’, embu’ sareng dhi’-majadhi’ e compo’. Malarat se bisa’a eothek pole bila ampon adhasarragi parembun, Ka’.”

”Pas bula kodu baramma, Le’? Nape dika pon ta’ neser pole ka bula?”

”Nyo’on saporana, Ka’, banne polana kaula ta’ neser. Banne polana kaula pon ta’ esto. Tape kaula ta’ bisa kalamon kodu nyake’e reng seppo dibi’. Ponapapole embu’. Kaula ta’ terro ekoca’a ana’ se daraka, Ka’.”

”Aneko banne masala daraka nape enten, Le’. Neko aropa’agi darma, kaangguy neptebbi janjina bula ban dika. Napepole bula ta’ ngala’a adha’ dibi’, Le’. Bula paggun anyo’ona pamanggi dhimin dha’ keyae. Mon jat ta’ olle metorot agama, bula paggun nyorot. Tape mon ta’ sala metorot agama, bula bakal terros alamara dika.”

”Ampon, Ka’, kaula ta’ bangal. Ban pole kaula ta’ mangga manabi kodu ngorbannagi sampeyan. Dinggal kaula se ekorbana bai, Ka’. Coma settong se kodu sampeyan kaenga’e. Sampe’ bila’a bai. Sampeyan paggun eanggebba lake kaula. Sampeyan settong gantonganna ate kaula.”

Ta’ sempat bula agi’-gigi’ oca’na dika, Le’ Saskiya. Mo-temmo dika maelang dhari adha’anna bula. Berka’ mabanget. Sajan abit, sajan ta’ etangale. Coma tanges ban robana dika se cekka’ e ate.

***

Ta’ kabitong atosan babburu se lot-nyalaot e penggir tase’. Sattanang koneng, tandha pangesto dhari dika paggun ekagabay pajimadan mon bula. Ka bara’ noro’ ka bara’, ka temor noro’ ka temor. Sanonto, ta’ kabitong mosem bara’ ban nemor se ondur-dhateng te-ganteyan. Bula paggun teggen neggu’ janjina dika, Le’ Saskiya. Sanajjan are abarna dara, kaenga’e, Le’, bugel dhalem atena dika, ja’ bula paggun dhateng pagi’, kaangguy menta dika dha’ reng seppona. Maske dika pon ebalakbak e kamar budhina. (*)

Songennep, Jumadil Awal 1438 H

Epetthak dhari: Sanajjar Are Abarna Dhara