radarmadura.jawapos.com |
CARPAN
AMIRUL MUTTAQIN*
MALEM ka’dhissa’ malem Jum’at bagi. Kaula sareng le’-ale’ entar ka dalemmepon Emba Sulaiman.
”Assalamu’alaikum.”
”Wa’alaikumussalam… adhu poy-kompoy
la ja-raja kabbi. Toju’...
toju’, Cong.”
Emba Sulaiman
ngamba’ kaula sareng
le’-ale’ kalaban sowara
ta’ pate jellas. Sowarana emba ampon ratrat. Biyasa, Emba Sulaiman
ampon seppo.
Taon katerbi’anna
emba nyapo’
ka para pajuang bangsa
Indonesia. Yuswa emba samangken korang langkong 90 tahun.
Namong emba paggun somangat negga’agi kabagusanna nagara Indonesia.
”Cong, ba’na kabbi tamaso’ na’-kana’
se gi’ ngodha. Na’-kana’
se badanna gi’
atamba’a raja,
pekkeranna gi’ ta’ ngalole.
Sengko’ la seppo. Daddi se bakal
nerrosagi sengko’ reya ba’na
kabbi,” dhabuna emba dha’
ka kaula sareng le’-ale’.
Kaula ampon
ekoca’ kompoyya emba se paleng towa,
kodu ngajari se bagus
dha’ ka le’-ale’ tor
kodu negga’agi kabagusan dha’
ka nagara. Negga’agi kabagusan bangsa ka’dhinto same sareng abillai
pan-saponapan se ampon kadaddiyan
e taon 1945. E taon
neka tepa’na tanggal 17 bulan Agustus, bangsa
Indonesia leppas dhari oreng-oreng Balanda.
Emba seggut acareta
oreng-oreng se abillai bangsa Indonesia. Otamana pahlawan
Indonesia 1945. E bakto kaula badha
e dalemma, emba ta’
loppa kaangguy acareta kamardika’an Indonesia se bakal
erammeyagi tanggal
17 Agustus.
”Cong,
lamba’ e jaman
panjaja’an
Balanda, bannya’ oreng Indonesia se abillai nagara
Indonesia dhari kakerrasanna oreng
Balanda se sanget sengngit. Oreng ba’-lamba’na
reya ta’ tako’ ka pate kaangguy
ajuwangagi nagara Indonesia.
Pole lamba’
tadha’ pestol enga’ sateya.
Sanjata se eangguy oreng Indonesia kaangguy alaban
oreng Balanda areya perreng epatajem. Mon sateya perreng
rowa ekoca’ tombak. Ban oreng se alaban
oreng Balanda areya ekoca’ pahlawan,” emba acareta ce’ somangatta sampe’ kol
sapolo lebat tello polo menit.
Emba gi’ somangat
kaangguy nyareta’agi oreng-oreng se ajuwangagi
Indonesia. ”Emba, Panjennengngan ta’ asarena?
Jam ampon kol sapolo lebat.”
”Biyasa embana ba’na
ajiya, Cong. Mon la acaca masala bangsa Indonesia, ta’ bisa
epellang pole. Mon gun tello jam korang kaangguy acareta,” sowarana Nom Parman se sambi nenggu TV e pangkengnga megga’ pamatoranna kaula sareng
emba.
Bendher
monggu Nom Parman, emba nyaretae kaula sareng
le’-ale’ dhari salastarena salat
Isya’ sampe’ para’ kol sabellas. Neka’
gi’ ta’ ambu tora. Kaula se
toju’ e lencak lowar ampon
arassa
katondhu. Namong
polana somangatta emba,
kaula jugan noro’
somangat kaangguy ngedhingagi caretana.
Emba onggu-onggu
somangat. Kaula terro
nerowa somangat
juwangngepon emba kaangguy
nagara Indonesia.
Le’-ale’ ampon tedhung sadaja. Namong kaula terros
anya-tanya kabadha’an
e jaman lamba’ ban
napa se emaksod pahlawan neka dhalem careta se
ecareta’agi emba.
Monggu Emba Sulaiman, pahlawan
ka’dhinto badha dhuwa’. Se kabidan,
pahlawan Indonesia. Pahlawan Indonesia ka’dhinto oreng se abillai nagara tor bangsa
Indonesia. Kong-
langkong kaangguy arebbu’ kamardika’an.
Pahlawan-pahlawan se arebbu’
kamardika’an, akadiya, Pangeran
Diponegoro, Imam Bonjol, RA Kartini, tor
salaenna. Se kapeng dhuwa’ pahlawan daerah. Akadiya Ke’
Lesap ban salaennepon.
Bannya’ elmo se
ekaolle dhari Emba Sulaiman. Berkat
caretana emba, kaula bannya’ tao sajara-sajara kamardika’an Indonesia tor para pajuwang otaba pahlawan Indonesia.
Jam ampon kol dhubellas
pas. Emba paggun acareta. Namong matana kaula ampon ta’ kowat
nyegga katondhu, sampe’ kaula taleyer adina emba se
paggun acareta parjuwangan
Indonesia.
***
Ta’ ekarassa are ampon nyonar dhari
temor. Kaula sareng ale’ amet
paleman ka emba. E dhalem
parjalanan, kaula nangale bannya’ mandhira mera pote. Mandhira ganeka
kaangguy maemot dha’ kamardika’an Indonesia.
Kamardika’an Indonesia se lako eparengette sabban taon e
tanggal 17 Agustus. Oreng-oreng biyasana ngarammeyagi kamardika’an
kalaban cem-macem lomba. Akadiya lomba lari karung, nae’ bungkana penang, tarik
tambang, ban
salaennepon.
Saamponna dhapa’ ka
compo’, kaula laju mangkat ka sakola’an. E sakola’an, kaula ekon-pakon
sareng Pa’ Trio, kapala
sekolah Yayasan
Al-Karomah kaangghuy maranta acara 17 Agustus. Yayasan Al-Karomah ka’dhinto yayasan SMA se badha
e temor jalan dhari compo’na kaula.
Dhalem maranta acara agustusan, para guru e Yayasan
Al-Karomah, otamana Pa’ Trio
ngarep dha’ sadaja mored
kaangguy noro’ maramme. Sabab, para guru bisa maemot
dha’ ka mored bila bakto
kamardika’aanna bangsa
Indonesia.
Are tanggal 17 etos-dhantos
mored, guru, tor masyarakat kaangguy eparamme. Salanjangnga jalan ampon possa’ kalaban
lampu ana-barna ban mandhira mera
pote se acem-macem okoran. Badha se kene’,
raja, ban
se sa-biyasa.
Nom Parman
se biyasana gun
adagang alat-alat
toles, karana 17 Agustus ampon para’, jugan
ajuwalan mandhira sareng
lampu kelap-kelip. Badha se barna
mera, koneng, biru, ban
pote. Poko’na e are gapaneka oreng
padha emo’ ngamba’ dhatengnga are kamardika’an.
***
Tanggal 17
Agustus ampon korang pettong are. Lomba-lomba
neng e ban-sabban yayasan ampon emolae. Husussepon neng SMA Al-Karomah. Bannya’
ca-kanca kellas
se noro’ lomba se ampon ajalan.
Akadiya lomba tarik tambang ban nae’ bungkana penang. Kaula se jugan noro’ lomba sanget senneng polana bisa
arassa’agi onggu ja’
para pahlawan Indonesia ka’dhinto patot econto dhalem
maddek nagara Indonesia sampe’ mardika. (*)
*Guru basa Inggris e Pondhuk Annuqayah Latee, Lu'-Gulu', Sumenep.
Epetthek dhari: Maemot Kamardika’an Indonesia
Tidak ada komentar:
Posting Komentar