Kajunelan

radarmadura.jawapos.com

CARPAN HASMIDI

AHMAD nondhu’ acora’ se lesso neng korse e adha’na labang kamar roma sake’. E attas adegga etoles ”Kamboja”. Neng tanangnga neggu’ dalubang pote, etelang-telang. Elempet. Ebukka’ pole. Maca ne’-sakone’ kaja eeja gan settong. Sambi metong garigi’na se kacer. Matana mancella’ ta’ partaja ka tolesanna.

Oreng se bat-lebat neng e adha’na ta’ kantha alerek ka Ahmad se gun nondhu’. Asandhal jeppet, kalambina takwa pote se ta’ toman egerrus. Dineng neng cethagga songko’ celleng se ella ambung ta’ apaddu.

Sabellunna kalowar dhari kamar se badha neng budhina korse se ekatoju’i kalaban lesso, Ahmad ta’ aromasa ja’ bakal ngadhebbana kasossa’an enga’ reya.

Pekkeranna sang-nyangsang ka man-dhimman. Ta’ manyettong dha’ kasossa’anna se teba ka Ahmad. Tanang dhuwa’na nyanggai cethagga sambi bi’-ngombi’ obu’na se lanjang gan bauna.

Laju pekkeranna enga’ dha’ almarhum eppa’na. Enga’ bakto acareta sabellunna tedhung. Sambi esap-osap obu’na, Ahmad kene’ neng gellu’anna eppa’na, dhari bara’ ka temor ecareta’agi kakabbi. Ta’ tao ja’ dhari dhimma asalla Ahmad laju enga’ dha’ kajunelan gadhuwanepon Aljailani.

Caretana bariya.

Badha dhuwa’ oreng entara ka Aljailani kaangguy nyabis. Oreng jareya aropa’agi keyae raja e nagarana. Nyamana Assabari ban Alhariri. Kadhuwana padha nekka’agina hajat.

E settong are, teppa’ dha are Ahad, tanggal tello bellas, bulan Sappar, taon lema ratos saeket. E bakto jareya Aljailani entar ka jeddhingnga kaangguy ngala’ udu’.

Neyat nyocceyana badanna. Dineng e sokona etangale’e ngangguy sandhal pacca’. Sandhal se ekagabay dhari kaju sambi epengkot dhari ebban bekkas se ella ta’ kaangguy.

Samarena audhu’, Aljailani terros ngalakone salat sonnat dhuwa’ raka’at. Mare jareya, Aljailani kalowar dhari langgarra kaangguy maso’ dha’ dalemma. Sabaelluna maso’ ka dalem, e bakto Aljailani napa’ gan taneyanna laju acerreng sawat-kowadda sambi nambuwagi gamparan se kacer dha’ bang-abang.

Gamparan gella’ ta’ etemmo jungtronganna, ja’ buru ka dhimma ban gaggar neng dhimma. Ta’ etemmo.  Ta’ etangale.

Saterrossa, gamparan se salajana Aljailani ekotebbagi keya ka bang-abang. Ngabber keya ta’ etemmo sakale. Aljailani ta’ terros maso’ dha’ dalemma. Aljailani toju’ pole ka dhalem langgarra.

Oreng se kadhuwa nangale kadaddiyan se buru nyempang dhari adha’na matana padha tacengnga’. Ta’ partaja dha’ apa se ella etangale. Colo’na satengana abukka’ cokop abit saenggana beccana copa se enneng e dhalem gerrunganna kerreng sakejja’ sampe’ akekep ban ngalodhu’ eber.

Eber jareya on-laon norone gerrunganna sampe’ elang neng le’erra ka baba. Matana ta’ akeddep. Paggun mancella’ saabidda ngabas kalakowanna Aljailani buruwan. ”Sampeyan partaja dha’ kadaddiyan buru?” Alhariri nyoba’ mecca rassa takerjat se ekaandhi’ kadhuwana keyae jareya.

Tello lekor are saterrossa, dhateng settong rombongan dhari nagara majja kaangguy acabis dha’ Aljailani. Sala settong dhari rombonganna mokka’ cabisanna, ”Kaula sakanca’an gapaneka gadhuwan cabis pamator dha’ Ajunan,” mandhek sakejja’. Se laen padha esep ngedhingagi.

”Kaula sakanca’an gadhuwan nadar dha’ panjenengan. Pramela dhari ka’dhinto, badan kaula makkele rombongan se sakanca’an ka’dhinto nyo’on edi kaangguy madhapa’ cabisan paneka,” oreng se ngoca’ jareya atengka’ sakaleyan ka adha’ kaangguy mapaddhang abasanna ka Aljailani.

Assabari ban Alhariri kabendherran badha e dalemma Aljailani kaangguy madhapa’ cabisan. Aljailani laju adhabu dha’ kadhuwana, ”Assabari ban Alhariri mara kala’ nadar rombongan oreng se jau reya.”

Ta’ saapa’a, dhari rombogan jareya magi pan-barampan barang ka se kadhuwa. Kalambi sotra ban emmas padha ebagi. Se matacengnga’ kadhuwana, iya areya, sala settong oreng se badha neng rombongan jareya ajuluwagi dhuwa’ gamparan ka Assabari, saenggana matombu petanya se sanget dhalem atena.

”Gamparan reya acora’ gadhuwanna Aljailani se ebuwang ka bang-abang, dullu?”

Assabari atanya ka se magi gamparan jareya, ”Sampeyan sadaja ampon anadar ponapa? Sampe’-sampe’ sampeyan sadaja bisa nadarragi dha’ Aljailani?”

”Sapaneka, Keyae. Kaula sareng rombongan paneka e settong are teppa’ are Ahad tanggal tello bellas bulan Sappar, rombongan paneka oneng erampok neng settong kennengan. Rang-barang sareng emmas kasogiyanna rombongan paneka erampas. Tadha’ se ceccer settong balakkadan. Coma maceccer lampat.”

”Kaula sadaja mekker, neng-enneng penggir jurang se ce’ dhalemma kaangguy arembak dha’ kadaddiyan se gella’. Saenggana ekaolle kasaroju’an dhalem rombongan paneka. Enggi ka’dhinto sopaja lekkas awasila dha’ ajunanepon Aljailani tor menta partolongan manabi gi’ badha’a papareng kasalameddan dha’ kaula sadaja.”

”Tor arta-arta se ampon erampas sareng rampok moga abali dha’ kaula sadaja. Sampe’ kaula ka’dhinto anadar.” Ta’ kalaban mamengo matana, reng se acareta jareya maddek sakejja’.

”Nyatana panyangka dhari kaula sadaja paneka lopot. Satengnga dhari rampok galla’ dhateng ka badan kaula sadaja saampona edhatengnge sowara bentar tor sabagian pole ampon kalengnger sambi daddi katako’an.”

Rombongan...! kanna’ ba’na kabbi noro’ sengko’. Kala’ pole arta-artana ba’na kabbi se ella erampok sengko’ gella’. ”Sambi ngeret tanang sala settong rombonganna kaula kaangguy noro’e katowa se ngajak ngala’ rang-barang tor arta-arta kaula sadaja.

Abali pole ka Ahmad.

Samarena asojud neng musalla se badha neng padduna roma sake’, paddu bara’ lao’ se gun aosso’ pettong oreng etandhai kalaban bannya’na sajada se eampar. Ahmad toju’ segek adhep ka bara’ nyettongagi aba’na ka Se Kobasa.

”Guste, samoga’a badha juga papareng dhari ajunan saenggana kaula bebas dhari panyake’ se teba,” nyapcap aeng matana Ahmad, ta’ ekarassa. Gilina gan sakone’ norone mata sampe neng pepena terros elang samarena peggea dhari cangkemma. (*)

Songennep, 2015

*Oneng daddi pangurus HMI STKIP PGRI Sumenep.

(Epetthek dhari: Kajunelan)