radarmadura.jawapos.com |
CARPAN MA LEO
JADWAL ajiyan ketab Safinatun Najah para’ emola’ana. Sadaja santre
toju’ abaris malanjang ngadhep dha’ bara’. Nadam Alfiyah ebaca areng-bareng kaangguy adhante’ rabuna Ustad Zaki Firdaus
se bakal molang.
Saamponna ustad
ampon alonggu eadha’, kalaban tarteb sadaja santre ambu se maca. ”Assalamualaikum
warahmatullahi wabarakatuh,” dhabuna sambi mokka’ ketab on-laon.
”Waalaikumsalam
warahmatullahi wabarakatuh,” jawabba santre kalaban alos, pas terros mokka’ ketabba.
Cethakka nondhu’, tanangnga neggu’ bulpen.
Malem samangken bakal
nerrangagi carana mele babine’ se akor sareng parentana agama Islam. Tantona babine’
se emaksod bakal epadaddi binena.
Bannya’ dalil
dhari ayat Alquran otaba hadis. Saengga nambai kowatta jajarba’an. Ustad
Zaki Firdaus, lalake’ lulusan Al-Azhar Mesir ganeka tamaso’ oreng se penter
ketab koneng. Tahfid Alquran tor bannya’ ngaonenge cem-macemma hadis Qath’i
Dalalah.
Saamponna sapolo
taon badha neng Mesir, Keyae Syamsul makonan dha’ Ustad Zaki Firdaus kaangguy
bisa ato-banto neng pondhukka. Ustad Zaki toman nyantre dha’ Keyae Syamsul.
Salaenna molang
ajiyan ketab diniyah, neng bakto formal gu-lagguna Ustad Zaki jugan ngaolle
bagiyan molang, saenggana elmona aguna dha’ oreng laen.
Kaangguy ngalampa’agi
pakonna keyaena, lastarena Isya’ Zaki Firdaus terros molang neng mushalla. Santre
bannya’ se aonggu’. Tandhana ngarte dha’ ponapa se ejarba’agi. Tape ta’ eka-sangka,
sabellunna ajiyan etotop badha santre se ngunjung tanang.
”Ka’dhinto, Ustad,
abdina badha petanya dha’ ajunan,” ropana Zaini na’-kana’ se emaksod.
”Enggi manddha,
Cong.”
”Hem…, bismillahirrahmanirrahim,
Ustad ampon bannya’ se ajarba’agi. Napapole etambai dalil-dalil Alquran otaba hadis. Samangken
se daddi petanya abdina, ponapa Ustad ampon ngagunge babine’ se akor sareng katerrangan
dhalem ketab ka’dhinto? Mator sakalangkong.”
Dek! Ustad Zaki coma
bisa neng-enneng. Ta’ metto oca’. Aba’na apangrasa sala karena ta’ bisa alaksanagi.
”Kadi ponapa, Ustad?”
takerjat onggu Ustad Zaki dha’ petanyana Zaini se ta’ sabbar terro taowa jawabanna.
”Saporana, Cong,
mon soal kalowarga, sengko’ laggi’ ta’ andhi’. Nyo’ona sambung du’a moga-moga
lekkas nemmo bakal bine se akor bi’ katerrangan neng ketab reya,” Zaini coma
bisa aonggu’ dha’ jawabanna Ustad Zaki.
Langnge’ rassana
lebur dhalem pangabasan. Etera’e bulan pornama. Malem paneka teppa’ tanggal
lema bellas. Tape kaleburan neng langnge’ ta’ bisa macernang atena. Pekkeranna alan-jalan
ta’ bu-ambu.
Rassa todhus dha’
petanyana santre. Tape badha jembarra sabab daddi enga’ dha’ settong kadaddiyan
se ta’ eka-sangka sabellunna. Babine’ se akodhung mera ngodha akor ban barnana kalambina,
maposang pekkeranna. Maske coma sakejja’ ngabasagi, bagussa akhlak tor alossa
oca’ mabingong ban terro taowa.
Teppa’ neng
malem Juma’at, Keyae Syamsul katamoyan kancana dhari Bangil, Pasuruan. Ropana,
Keyae Rahmat asareng kaluwargana gadhuwan kaparlowan se ta’ eka-sangka. Ana’na se
anyama Sodikin terro epacampowa kalaban Sitti Aisyah se tojjuwanna sajan makowat
tale kakarabatan.
”Dhu, saporana, Ka’,
bula ampon narema pentana oreng se alamar Aisyah,” oca’na Keyae Syamsul. Kalaban
nondhu’, Keyae Rahmat rassana ta’ parcaja dha’ jawabanna kancana.
”Ma’ pas
sapaneka sampeyan, Le’? Dika kan ampon
padha tao bakto abareng mondhuk neng Probolinggo kaangguy bisa macampo ana’na bula
ban dika bila ampon padha dibasa?” Keyae Rahmat rassa ta’ sabbar dhalem ngator
cacana.
”Saporana, Ka’, saporana,
banne bula ta’ enga’ dha’ janjina dika. Tape dika temmo tadha’ kabar saabidda dhu-taon.
Daddina bula narema oreng laen.”
”Dhu, ya Allah ma’
bula ta’ kacapo’ se menta’a, Le’?” Keyae Rahmat ta’ bisa nerrosagi cacana. Coma
bisa nondhu’ sambi ngakone dha’ kakalerowanna se ta’ mekkere ana’na ka adha’na.
Are, minggu, tor
bulan ampon ate-gante. Molae dhari pottrana keyae, ana’na ponggaba, bala
tatangga. Kadhang oreng sogi. Sadajana tadha’ se etarema’a. Kayakinan se eteggu’
Keyae Syamsul ta’ bisa eoba kaangguy adhante’ kapotosan dhari settong oreng se ampon
menta bakto modhi are.
Ropana kabar ta’
bisana Keyae Syamsul se ta’ narema manto dhari reng-oreng maskena sogi,
apangkat tenggi, kasohor tor kalonta dha’ para santre. Jugan ustad se molang. Ustad
Zaki Firdaus jugan terro onenga dha’ bakal mantona Keyae Syamsul.
Pangrasana, calonna
paste andhi’ kapenterran se talebat tenggi. Jugan toronan keyae raja se kalonta
neng tana Jaba. Napapole Sitti Aisyah raddin onggu, bagus akhlak, tor alos
oca’. Sapa oreng se ta’ tagudha’a?
Ustad Zaki takerjat
bakto ngaonenge babine’ se ngangguyan kodhung mera ngodha akor ban barna
kalambina aropa’agi Sitti Aisyah. Tape aba’na coma bisa ngarep tor adhu’a polana
ta’ bisa nekkane hajat madaddi Sitti Aisyah oreng se halal monggu aba’na.
Lebat tello
bulan. Keyae paggun ta’ narema manto. Teppa’ e malem Rebbu, Ustad Zaki edikane Keyae
Syamsul. ”Assalamualaikum,” oca’na kalaban alos. E dhalem ampon alonggu bannya’
tamoy.
”Waalaikumsalam,”
jawabba areng-bareng. Rassana akadiya acara kalowarga.
”Ngereng Ustad Zaki alonggu e ka’dhinto,” takerjat bakto Zaki acabis
dha’ tong-settonga tamoy.
”Subhanalla, ma’ badha Ajunan, Ummi, eka’dhinto?” oreng seppona coma
bisa kasokan ngabasagi ropana.
”Ustad Zaki ampon dhateng, kare Mas Luqman kaangguy majarna’ parkarana.
”Se kabidan, nyo’on sapora, otamana dha’ Cong Zaki polana ta’ eparenge oneng
sabellunna. Tojjuwan mabadha papanggiyan e malem samangken tadha’ laen kaangguy
nyambung silaturrahim. Se nomer dhuwa’, kaangguy nyambung bala. Artena antara Mas
Syamsul sareng bula ta’ asa-pesa. Maka ana’ bula badhi epacampowa sareng Bing Sitti
Aisyah.”
Dek! Rassa ta’ parcaja agulek neng ate tor pekkeranna Ustad Zaki Firdaus
polana parkara bala tor epacampowa ta’ ngaonenge sabellunna. Tape, aba’na jembar
ta’ sapera hajjadda bakal daddi kanyata’an.
Rassa jembarra sajan raja nalekana babine’ se akodhung mera ngodha aropa’agi
Sitti Aisyah. (*)
*)Katowana PAC IPNU Lu’-Gulu’,
Sumenep.
Carpan eattas epetthek dhari: Kodhung Mera Ngodha
Tidak ada komentar:
Posting Komentar